ഒന്റാരിയോ: കാനഡയിലെ ഒൻ്റാരിയോയിൽ പ്രവർത്തിച്ചിരുന്ന ഹൈലൈൻ മഷ്റൂംസ് (Highline Mushrooms) എന്ന കമ്പനി അടച്ചുപൂട്ടാൻ തീരുമാനിച്ചതോടെ, അവിടെ ജോലി ചെയ്തിരുന്ന ഡസൻ കണക്കിന് താൽക്കാലിക വിദേശ തൊഴിലാളികൾ (Temporary Foreign Workers) ജോലി നഷ്ടപ്പെട്ട അവസ്ഥയിലാണ്. ഈ വർഷം ഡിസംബറോടെ കമ്പനി പ്രവർത്തനം അവസാനിപ്പിക്കുമെന്നാണ് പ്രഖ്യാപിച്ചിരിക്കുന്നത്.
കാനഡയുടെ ഭക്ഷ്യമേഖലയിലെ ഒഴിച്ചുകൂടാനാവാത്ത ജോലികൾക്കായി,താൽക്കാലിക വിദേശ തൊഴിലാളി പദ്ധതിയുടെ (Temporary Foreign Worker Program – TFWP) ഭാഗമായി എത്തിയവരാണ് 300-ഓളം വരുന്ന ഈ തൊഴിലാളികൾ. തൊഴിലാളികളുടെ വർക്ക് പെർമിറ്റ് നിലവിലെ തൊഴിലുടമയുമായി ബന്ധിപ്പിച്ചിരിക്കുന്നതിനാൽ, കമ്പനി അടച്ചുപൂട്ടുന്നതോടെ ഇവർക്ക് പുതിയ ജോലി കണ്ടെത്താനോ രാജ്യത്ത് തുടരാനോ കഴിയാത്ത പ്രതിസന്ധിയിലാണ്. ഇതോടെ, കാനഡയിൽ നിന്ന് നാടുകടത്തപ്പെടാനുള്ള ഭീഷണിയിലായിരിക്കുകയാണ് ഈ തൊഴിലാളികൾ.
വർഷങ്ങളോളം ദിവസേന 15 മണിക്കൂറിലധികം ജോലി ചെയ്ത പലർക്കും ടെർമിനേഷൻ പേയ്മെൻ്റായി 250 ഡോളർ മാത്രമാണ് ലഭിച്ചത്. കമ്പനിക്കെതിരെ സംസാരിക്കുന്നതിൽ നിന്ന് വിലക്കുന്ന ഒരു വ്യവസ്ഥയുമായി ബന്ധിപ്പിച്ചാണ് ഈ തുക നൽകിയിരിക്കുന്നത് എന്നും റിപ്പോർട്ടുകളുണ്ട്. ഈ സംഭവം കാനഡയിലെ കുടിയേറ്റ കർഷകത്തൊഴിലാളികൾ നേരിടുന്ന കടുത്ത അസമത്വം തുറന്നു കാണിക്കുന്നതായി തൊഴിലാളി സംഘടനകൾ പറയുന്നു.
ഈ തൊഴിലാളികൾക്ക് ഓപ്പൺ വർക്ക് പെർമിറ്റുകൾ, എംപ്ലോയ്മെൻ്റ് ഇൻഷുറൻസ് (EI) ആനുകൂല്യങ്ങൾ, യഥാർത്ഥ തൊഴിലാളി സംരക്ഷണം എന്നിവ നൽകാൻ ജസ്റ്റിസ് ഫോർ മൈഗ്രൻ്റ് വർക്കേഴ്സ് പോലുള്ള സംഘടനകൾ കനേഡിയൻ സർക്കാരിനോട് ആവശ്യപ്പെട്ടു. രാജ്യത്തെ കാർഷിക മേഖല കടുത്ത തൊഴിലാളി പ്രതിസന്ധി നേരിടുന്ന ഈ സമയത്ത്, ന്യായമായ പരിഗണനയും കാനഡയിൽ തുടരാനുള്ള അവകാശവുമാണ് ഈ തൊഴിലാളികൾ ആവശ്യപ്പെടുന്നത്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
Migrant Workers Face Job Loss and Deportation After Ontario Plant Closure
