കാനഡ പോസ്റ്റ് തൊഴിലാളി യൂണിയൻ പ്രഖ്യാപിച്ച പണിമുടക്ക് രാജ്യത്തെ ചെറുകിട ബിസിനസ്സ് ഉടമകൾക്കിടയിൽ വലിയ ആശങ്കയും സമ്മർദ്ദവുമാണ് സൃഷ്ടിച്ചിരിക്കുന്നത്. പൂർണ്ണമായ സമരം ഒഴിവാക്കി, മാറിമാറി പണിമുടക്കുന്ന രീതിയിലേക്ക് യൂണിയൻ മാറിയെങ്കിലും ഇത് വ്യാപാര സ്ഥാപനങ്ങൾക്ക് എത്രത്തോളം ആശ്വാസം നൽകുമെന്ന കാര്യത്തിൽ സംശയങ്ങൾ ബാക്കിയാണ്. തപാൽ സേവനങ്ങളെ കാര്യമായി ആശ്രയിക്കുന്ന സംരംഭകരുടെ പ്രതികരണങ്ങൾ ഇങ്ങനെ:
സസ്കറ്റൂണിൽ ‘റിവൈറ്റലൈസ് ഫിസിയോതെറാപ്പി & റീഹാബ്’ എന്ന ബിസിനസ്സ് ആരംഭിച്ച നിരാലി പട്ടേലിനെ സംബന്ധിച്ചിടത്തോളം ഈ സമരം കനത്ത തിരിച്ചടിയാണ്. തന്റെ മാർക്കറ്റിംഗ് ബഡ്ജറ്റിന്റെ 50 ശതമാനവും ചെലവഴിച്ചുകൊണ്ട് കമ്മ്യൂണിറ്റിയിൽ വിതരണം ചെയ്യാൻ ഉദ്ദേശിച്ച 10,000 പ്രൊമോഷണൽ ഫ്ലൈയറുകളാണ് നിരാലിയുടെ കൈവശമുള്ളത്.
“ഇത് തങ്ങളുടെ ബിസിനസ്സിന് വളരെ അത്യാവശ്യമായിരുന്നുവെന്നാണ് നിരാലി പറയുന്നത്. “ഞങ്ങൾക്ക് നിലവിൽ കാര്യമായ ബന്ധങ്ങളില്ലാത്തതിനാൽ വേറിട്ട് നിൽക്കാൻ ഈ മാർക്കറ്റിംഗ് കാമ്പയിൻ അനിവാര്യമായിരുന്നു.” പ്രശ്നം അതല്ല, ഈ ഫ്ലൈയറുകളിൽ നൽകിയിട്ടുള്ള പ്രത്യേക ഓഫറിന് നവംബർ 8-ന് കാലാവധി തീരും. തപാൽ അയക്കാൻ പദ്ധതിയിട്ടതിന് ഒരാഴ്ച മുമ്പാണ് യൂണിയൻ പണിമുടക്ക് പ്രഖ്യാപിച്ചത്. വലിയ ചെലവുകൾ കാരണം മറ്റൊരു കൊറിയർ സർവ്വീസിനെ ആശ്രയിക്കാൻ നിരാലിക്ക് കഴിയുന്നില്ല. കുറച്ചെണ്ണമെങ്കിലും കാലാവധി തീരുന്നതിന് മുൻപ് ഉപഭോക്താക്കളിൽ എത്തുമെന്ന പ്രതീക്ഷയിലാണ് അവർ.
സസ്കറ്റൂണിൽ ഹോം ബേസ്ഡ് ബിസിനസ്സ് നടത്തുന്ന മോണിക് പോയിസൺ-ഫാസ്റ്റിന് യൂണിയൻ രാജ്യവ്യാപക സമരം അവസാനിപ്പിച്ചത് “വലിയ ആശ്വാസമാണ്” നൽകിയത്. ആഭരണങ്ങൾ, സ്റ്റിക്കറുകൾ, പ്രിന്റുകൾ തുടങ്ങിയ ചെറിയ സാധനങ്ങൾ നിർമ്മിച്ച് വിൽക്കുന്ന മോണിക്കിന് കുറഞ്ഞ ചെലവിൽ കാനഡ പോസ്റ്റ് വഴി അയക്കാൻ കഴിയുന്ന ലെറ്റർ മെയിൽ സേവനം അത്യാവശ്യമാണ്.
“5 ഡോളർ വിലയുള്ള ഒരു സ്റ്റിക്കറിന് ആരും 15 ഡോളറോ 20 ഡോളറോ ഷിപ്പിംഗ് നൽകില്ല,” മോണിക് പറയുന്നു. കാനഡ പോസ്റ്റ് മാത്രമാണ് തങ്ങളെപ്പോലുള്ളവർക്ക് ആകെയുള്ള ആശ്രയം. സമരം കാരണം മോണിക് താൽക്കാലികമായി വെബ്സൈറ്റിലെ ഷിപ്പിംഗ് നിർത്തിവച്ചിരുന്നു. ഇത് നഗരത്തിന് പുറത്തുനിന്നുള്ള ഓർഡറുകൾ കുറയ്ക്കാൻ ഇടയാക്കി. കറങ്ങുന്ന സമരം അനിശ്ചിതത്വം കുറയ്ക്കുമെന്നും സ്ഥിരതയോടെ പ്രവർത്തിക്കാൻ സഹായിക്കുമെന്നും അവർ പ്രതീക്ഷിക്കുന്നു.
എങ്കിലും, പണിമുടക്ക് ചെറുകിട ബിസിനസ്സുകൾക്ക് കാര്യമായ ആശ്വാസം നൽകില്ലെന്നാണ് കനേഡിയൻ ഫെഡറേഷൻ ഓഫ് ഇൻഡിപെൻഡന്റ് ബിസിനസ് (CFIB) പറയുന്നത്. “ഇത്തരത്തിലുള്ള സമരം അനിശ്ചിതത്വം വർദ്ധിപ്പിക്കാനാണ് സാധ്യത,” CFIB-യുടെ ദേശീയ കാര്യങ്ങളുടെ വൈസ് പ്രസിഡന്റ് ജാസ്മിൻ ഗ്യൂനെറ്റ് അഭിപ്രായപ്പെടുന്നു. എവിടെ, എപ്പോൾ പണിമുടക്ക് നടക്കുമെന്ന് അറിയാൻ കഴിയാത്തത് വിൽപ്പനയെയും പണത്തിന്റെ ഒഴുക്കിനെയും ബാധിച്ച ചെറുകിട സ്ഥാപനങ്ങൾക്ക് കൂടുതൽ സമ്മർദ്ദമുണ്ടാക്കും.
പരിമിതമായ തപാൽ വിതരണം തുടങ്ങുന്നത് ഒരു നല്ല സൂചനയാണെങ്കിലും ഇത് തപാൽ കെട്ടിക്കിടക്കുന്നതിനും (Backlogs) കാലതാമസത്തിനും ഉപഭോക്താക്കൾക്കിടയിൽ നിരാശയുണ്ടാക്കാനും കാരണമാകും.
“ഇതൊരു ചെറിയ കാൽവെപ്പ് മാത്രമാണ്, പക്ഷേ ആവശ്യം സമരത്തിന്റെ പൂർണ്ണമായ വിരാമമാണ്,” ഗ്യൂനെറ്റ് കൂട്ടിച്ചേർത്തു.
സേവനത്തിലെ തുടർച്ചയായ വെല്ലുവിളികൾ കാരണം എല്ലാ സർവ്വീസ് ഗ്യാരണ്ടികളും താൽക്കാലികമായി നിർത്തലാക്കുമെന്ന് കാനഡ പോസ്റ്റ് അറിയിച്ചു. യൂണിയൻ പ്രഖ്യാപിച്ച പണിമുടക്ക് ശനിയാഴ്ച രാവിലെ ആരംഭിക്കാനാണ് പദ്ധതി. ഓരോ പ്രാദേശിക ശാഖയും എപ്പോഴാണ് മാറിനിൽക്കേണ്ടതെന്ന് അതിനോട് അടുത്ത സമയത്തായിരിക്കും അറിയിക്കുക.
No relief, only pressure!; Small businesses on edge as Canada Post strike turns sour
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
