എഡ്മണ്ടൺ ഇ-സ്‌കൂട്ടർ: നിരോധനം ഉണ്ടായിട്ടും പിഴ ചുമത്തിയില്ല! കാരണം ഇതാ

എഡ്മണ്ടൺ: ഇലക്ട്രിക് സ്‌കൂട്ടർ ഉപയോഗിക്കുന്നവർക്ക് ഒരു ആശ്വാസ വാർത്ത, ഒപ്പം ഒരു മുന്നറിയിപ്പും. സ്വന്തമായി വാങ്ങിയ ഇലക്ട്രിക് സ്‌കൂട്ടറുകൾ ഓടിക്കുന്നത് എഡ്മന്റൺ നഗരത്തിൽ നിയമപരമായി നിരോധിച്ചിട്ട് പോലും, ഈ വർഷം ഇതുവരെ ഒരാൾക്ക് പോലും പിഴ ചുമത്തിയിട്ടില്ല. അധികൃതർ കടുപിടുത്തം ഒഴിവാക്കി, ജനങ്ങളെ പഠിപ്പിക്കുന്നതിലാണ് (Education) ഇപ്പോൾ ശ്രദ്ധ കേന്ദ്രീകരിക്കുന്നത്. എങ്കിലും ഈ വർഷം സെപ്റ്റംബറിൽ ഒരു 49-കാരൻ സ്വകാര്യ ഇ-സ്‌കൂട്ടർ ഓടിക്കുമ്പോൾ അപകടത്തിൽപ്പെട്ട് മരണമടഞ്ഞ സംഭവം ഈ നിയമലംഘനത്തിന്റെ ഗൗരവം ഓർമ്മിപ്പിക്കുന്നു.

പ്രവശ്യയിലെ ട്രാഫിക് നിയമം (Traffic Safety Act) അനുസരിച്ച്, എഡ്മണ്ടൺ നഗരത്തിലെ പൊതുനിരത്തുകളിലോ, സൈക്കിൾ പാതകളിലോ, കാൽനട യാത്രാവഴികളിലോ സ്വകാര്യ ഇ-സ്‌കൂട്ടറുകൾക്ക് പ്രവേശനമില്ല. ഇവയെ ‘ചെറിയ വാഹനങ്ങൾ’ (miniature vehicles) എന്ന വിഭാഗത്തിലാണ് ഉൾപ്പെടുത്തിയിരിക്കുന്നത്. ഈ നിയമം തെറ്റിച്ചാൽ, ഏകദേശം $250 ഡോളർ വരെ പിഴ ലഭിക്കാൻ സാധ്യതയുണ്ട്. എന്നാൽ നഗരത്തിലെ അധികാരികൾ പറയുന്നത്, പിഴ ചുമത്തുന്നതിന് മുൻപ് നിയമത്തെക്കുറിച്ച് ജനങ്ങളെ ബോധവൽക്കരിക്കാനാണ് ശ്രമിക്കുന്നത് എന്നാണ്. അതുകൊണ്ടാണ് “നിയമവിരുദ്ധമായ ഇ-സ്‌കൂട്ടറുകൾക്ക്” ഈ വർഷം ഒരു പിഴ പോലും ചുമത്താത്തതെന്നും അവർ വ്യക്തമാക്കുന്നു.

ഇ-സ്‌കൂട്ടറുകൾക്ക് കൃത്യമായ നിയമങ്ങളും ചട്ടങ്ങളും ഉണ്ടാക്കുന്ന തിരക്കിലാണ് നിലവിൽ പ്രവിശ്യാ ഭരണകൂടം. അതുവരെ എഡ്മണ്ടൺ, കാൽഗറി പോലുള്ള നഗരങ്ങളിൽ ഇ-സ്‌കൂട്ടർ ഉപയോഗം സംബന്ധിച്ച വിവരങ്ങൾ ശേഖരിക്കാനായി പരീക്ഷണാടിസ്ഥാനത്തിലുള്ള പദ്ധതികൾ (Pilot Projects) നടപ്പിലാക്കുന്നുണ്ട്. യാത്രക്കാരുടെ സുരക്ഷ, ഉപയോഗരീതി തുടങ്ങിയ കാര്യങ്ങൾ മനസ്സിലാക്കി ഭാവിയിൽ പുതിയ നിയമങ്ങൾ കൊണ്ടുവരാനാണ് ഈ നീക്കം. ഈ അവ്യക്തതയാണ് അധികാരികൾക്ക് പിഴ ചുമത്തുന്നതിൽ ചില ആശയക്കുഴപ്പങ്ങൾ ഉണ്ടാക്കുന്നത്. അതുകൊണ്ട്, നിയമം വരും മുൻപ് പിഴ ചുമത്തുന്നതിൽ ഉദ്യോഗസ്ഥർക്ക് സ്വന്തമായി തീരുമാനമെടുക്കാൻ (Discretion) അനുവാദമുണ്ട്.

സ്വകാര്യ ഇ-സ്‌കൂട്ടറുകൾ തിരിച്ചറിയാൻ മറ്റു വാഹനങ്ങളെപ്പോലെ നമ്പർ പ്ലേറ്റുകളോ മറ്റ് വഴികളോ ഇല്ലാത്തതും പിഴ ചുമത്തുന്നതിൽ കാലതാമസം വരുത്തുന്നുണ്ട്. നിയമപരമായ അവ്യക്തതകൾ തുടരുമ്പോൾ തന്നെ, യാത്രക്കാർ അപകടങ്ങൾ ഒഴിവാക്കാൻ ശ്രദ്ധിക്കണമെന്ന് അധികൃതർ ഓർമ്മിപ്പിക്കുന്നു. “പൊതു ഇടങ്ങൾ പരസ്പരം ബഹുമാനത്തോടെയും സുരക്ഷിതമായും പങ്കിടണം” എന്നും അവർ ആവശ്യപ്പെടുന്നു. നിയമം വരുന്നതുവരെ, നിങ്ങൾ ഇ-സ്‌കൂട്ടർ ഉപയോഗിക്കുമ്പോൾ അങ്ങേയറ്റം ജാഗ്രത പാലിക്കുന്നുണ്ടെന്ന് ഉറപ്പുവരുത്തുക.

📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82

Edmonton e-scooter: No fines imposed despite ban! Here's why