ജീവന് ആപത്ത്! ഇത്തരം രോഗങ്ങൾക്ക് AI ഉപദേശം തേടരുത്: കർശന മുന്നറിയിപ്പുമായി ഡോക്ടർമാർ

നിത്യജീവിതത്തിലെ സംശയങ്ങൾക്കായി ഇപ്പോൾ ആർട്ടിഫിഷ്യൽ ഇൻ്റലിജൻസിനെ (AI) ആശ്രയിക്കുന്ന പ്രവണത വർധിക്കുന്ന സാഹചര്യത്തിൽ, ഗുരുതരമായ ആരോഗ്യപ്രശ്‌നങ്ങൾക്ക് AI-യുടെ ഉപദേശം തേടരുതെന്ന് ഡോക്ടർമാർ മുന്നറിയിപ്പ് നൽകുന്നു. ഭക്ഷണക്രമം, ചർമ്മസംരക്ഷണം, മാനസികാരോഗ്യ പ്രശ്‌നങ്ങൾ എന്നിവയെക്കുറിച്ച് AI-യോട് ചോദിക്കുന്നത് പോലും ദോഷകരമാകുമ്പോൾ ജീവൻ അപകടത്തിലാക്കുന്ന അവസ്ഥകളിൽ AI-യെ സമീപിക്കുന്നത് കൃത്യമായ ചികിത്സ ലഭിക്കുന്നതിൽ കാലതാമസം വരുത്തുമെന്നാണ് ആരോഗ്യ വിദഗ്ധർ ചൂണ്ടിക്കാട്ടുന്നത്.

നെഞ്ചുവേദന, സ്‌ട്രോക്കിൻ്റെ ലക്ഷണങ്ങൾ, അസഹനീയമായ വയറുവേദന, ഉയർന്ന പനിയും വിറയലും ആശയക്കുഴപ്പവും, വിശദീകരിക്കാനാകാത്ത ക്ഷീണവും ഭാരക്കുറവും, ശ്വസന പ്രശ്‌നങ്ങൾ എന്നിവയാണ് AI-യുടെ സഹായം തേടാൻ പാടില്ലാത്ത ആറ് ഗുരുതര ആരോഗ്യപ്രശ്നങ്ങൾ. നെഞ്ചുവേദനയോ പക്ഷാഘാത ലക്ഷണങ്ങളോ ശ്രദ്ധയിൽപ്പെട്ടാൽ ഒട്ടും വൈകാതെ രോഗിയെ ആശുപത്രിയിൽ എത്തിക്കേണ്ടത് അത്യാവശ്യമാണ്. അപ്പൻ്റിസൈറ്റിസ്, വൃക്കയിലെ കല്ല്, ആന്തരിക രക്തസ്രാവം പോലുള്ള ഗുരുതരമായ രോഗങ്ങളുടെ ലക്ഷണമാകാൻ സാധ്യതയുള്ള അസഹനീയമായ വയറുവേദനയെ നിസ്സാരമായി കാണരുതെന്നും ഡോക്ടർമാർ ഓർമ്മിപ്പിക്കുന്നു.

ഈ ലക്ഷണങ്ങൾ കണ്ടാല്‍ AI-യെ സമീപിക്കുന്നത് ഗുരുതരമാണ്. കാരണം, AI-ക്ക് രോഗിയെ ശാരീരികമായി പരിശോധിക്കാനോ രോഗത്തിൻ്റെ വ്യാപ്തി വിലയിരുത്താനോ കഴിയില്ല. മനുഷ്യൻ നൽകുന്ന ലക്ഷണങ്ങളുടെ വിവരങ്ങളെ അടിസ്ഥാനമാക്കി പൊതുവായ മറുപടികൾ നൽകാൻ മാത്രമേ AI-ക്ക് സാധിക്കൂ. ഇത് കൃത്യമായ രോഗനിർണയം സാധ്യമാക്കാതിരിക്കുകയും, തെറ്റായ വിവരങ്ങൾ നൽകി അനാവശ്യ പരിഭ്രാന്തി ഉണ്ടാക്കുകയും ചെയ്യും.

കൂടാതെ, അടിയന്തര വൈദ്യസഹായം ആവശ്യമുള്ള ശ്വസനപ്രശ്‌നങ്ങൾ പോലുള്ള കാര്യങ്ങളിൽ, AI-യോട് സംശയം ചോദിച്ച് സമയം കളയുന്നത് ചികിത്സ ലഭിക്കുന്നതിൽ കാലതാമസം വരുത്തും. ഈ കാലതാമസം രോഗിയുടെ അവസ്ഥ കൂടുതൽ വഷളാക്കാൻ സാധ്യതയുണ്ട്. ക്ഷീണവും ഭാരക്കുറവും പോലുള്ള ലക്ഷണങ്ങൾക്ക് AI നൽകുന്ന ഭക്ഷണക്രമത്തെക്കുറിച്ചുള്ള നിർദ്ദേശങ്ങൾ ഗുരുതരമായ രോഗങ്ങളെ മറച്ചുവെച്ചേക്കാം.

അതുകൊണ്ട് തന്നെ, ആരോഗ്യപരമായ എല്ലാ കാര്യങ്ങൾക്കും ഒരു രജിസ്റ്റേർഡ് ഡോക്ടറെ മാത്രം സമീപിക്കുക എന്നതാണ് ഉചിതം. ഗുരുതരമായ ലക്ഷണങ്ങൾ കണ്ടാൽ ഉടൻതന്നെ ആശുപത്രിയിൽ എത്തുകയാണ് വേണ്ടതെന്നും, AI-യുടെ സഹായം തേടുന്നത് ഗുണത്തേക്കാൾ ഉപരി ദോഷം ചെയ്യുമെന്നും ആരോഗ്യ വകുപ്പ് നിർദ്ദേശിക്കുന്നു.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82