ബര്ലിന്:യുഎസ് പ്രസിഡന്റ് ഡോണള്ഡ് ട്രംപിന്റെ എച്ച്1ബി വീസ നിയന്ത്രണങ്ങൾക്കിടയിൽ, വൈദഗ്ധ്യമുള്ള ഇന്ത്യക്കാരെ ജർമനിയിലേക്ക് സ്വാഗതം ചെയ്ത് ജർമനിയുടെ ഡൽഹിയിലെ അംബാസഡർ ഡോ. ഫിലിപ്പ് ആക്കർമാൻ രംഗത്ത്. അടുത്തിടെ അമേരിക്കയുടെ എച്ച്-1ബി വിസയ്ക്ക് ഫീസ് വലിയ തോതിൽ വർധിപ്പിച്ചു. ഇത് ഇന്ത്യയിൽ നിന്നുള്ള ചെറുപ്പക്കാർക്ക് വലിയ തിരിച്ചടിയായി. എന്നാൽ, ഈ സാഹചര്യത്തിൽ, ഇന്ത്യക്കാർക്ക് പുതിയൊരു സാധ്യതയുമായി ജർമനി മുന്നോട്ട് വന്നിരിക്കുകയാണ്. ഇന്ത്യയിലെ ജർമൻ അംബാസഡർ ഡോ. ഫിലിപ്പ് അക്കർമാൻ നേരിട്ട് ഇന്ത്യൻ പ്രൊഫഷണലുകളെ അവരുടെ രാജ്യത്തേക്ക് ക്ഷണിച്ചിരിക്കുകയാണ്.
“തങ്ങളുടെ കുടിയേറ്റ നയം ഒരു ജർമൻ കാർ പോലെ വിശ്വസനീയവും നേർരേഖയിലുള്ളതുമാണ്. പെട്ടെന്ന് ഒരു ഫുൾ സ്റ്റോപ്പ് ഉണ്ടാകുമെന്ന് നിങ്ങൾ ഭയപ്പെടേണ്ടെന്ന് അദ്ദേഹം പറഞ്ഞു. ഇന്ത്യക്കാർ ജർമനിയിൽ ഉയർന്ന വരുമാനം നേടുന്നവരാണെന്നും, ഇത് ജർമനിയുടെ സാമ്പത്തിക വളർച്ചയ്ക്ക് സഹായകമാണെന്നും അദ്ദേഹം കൂട്ടിച്ചേർത്തു. ജർമനിയിൽ തൊഴിലെടുക്കുന്ന ഒരു ശരാശരി ഇന്ത്യക്കാരൻ ഒരു ജർമൻ പൗരനെക്കാൾ കൂടുതൽ വരുമാനം നേടുന്നുണ്ടെന്നും അദ്ദേഹം ചൂണ്ടിക്കാട്ടി.
ടെക്നോളജി, എൻജിനീയറിങ്, മാനേജ്മെന്റ് പോലുള്ള മേഖലകളിൽ ജർമനിയിൽ വലിയ തൊഴിലവസരങ്ങളുണ്ട്. കൂടാതെ, പുതിയ കുടിയേറ്റ നിയമങ്ങൾ വഴി ജർമനി വിസ നടപടികൾ എളുപ്പമാക്കി. ഈ മാറ്റങ്ങൾ കാരണം അമേരിക്കയെയും കാനഡയെയും ആശ്രയിക്കാതെ ജർമനിയിലേക്ക് പോകാൻ കൂടുതൽ ആളുകൾക്ക് താൽപ്പര്യമുണ്ട്.
ജോലി തേടുന്നവർക്ക് പുതിയ വഴികൾ തുറക്കുന്ന നയങ്ങളാണ് ജർമനി ഇപ്പോൾ നടപ്പാക്കുന്നത്. ഉദാഹരണത്തിന്, ‘ബ്ലൂ കാർഡ് സിസ്റ്റം’ വഴി യോഗ്യതയുള്ളവർക്ക് പെട്ടെന്ന് ജോലി നേടാം. കൂടാതെ, ജോലി ഇല്ലാതെ ജർമനിയിൽ വന്ന് ജോലി അന്വേഷിക്കാൻ സഹായിക്കുന്ന ‘ജോബ് സീക്കർ വിസ’യും ഇപ്പോൾ ലഭ്യമാണ്. 2024-ൽ തുടങ്ങിയ ‘ഓപ്പർച്യൂണിറ്റി കാർഡ്’ എന്ന പുതിയ സംവിധാനം, ജോലി കിട്ടുന്നതിന് മുൻപ് തന്നെ ജർമനിയിൽ പോകാൻ സഹായിക്കുന്നു.
അതുകൊണ്ട്, ഇന്ത്യയിലെ കഴിവുറ്റ ചെറുപ്പക്കാർക്ക് അമേരിക്കയെ മാത്രം ആശ്രയിക്കാതെ, യൂറോപ്പിന്റെ ഹൃദയഭാഗത്തുള്ള ജർമനിയിൽ ഒരു മികച്ച ഭാവിക്കായി ശ്രമിക്കാവുന്നതാണ്. ജർമനിയുടെ സുതാര്യമായ നയങ്ങളും ഉയർന്ന ജീവിതനിലവാരവും ഇന്ത്യക്കാർക്ക് പുതിയൊരു വഴി തുറക്കുന്നു.
H1B visa restrictions: While the American visas were put on a 'full stop', Germany opened a 'fast track'!
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
