മരുന്ന് വില താങ്ങാനാവാതെ വലഞ്ഞ് ന്യൂ ബ്രൺസ്വിക്ക്; പരിഹാരവുമായി ഫാർമകെയർ പദ്ധതി

ന്യൂ ബ്രൺസ്വിക്ക്; കാനഡയിൽ എല്ലാവർക്കും മരുന്ന് ലഭ്യമാക്കാൻ ലക്ഷ്യമിടുന്ന ‘ഫാർമകെയർ’ പദ്ധതിയിൽ ന്യൂ ബ്രൺസ്വിക്ക് പ്രവിശ്യയും ചേരണമെന്ന് ആവശ്യപ്പെട്ട് ന്യൂ ബ്രൺസ്വിക്ക് ഹെൽത്ത് കോളിഷൻ രംഗത്ത്. സാധാരണ ജനങ്ങൾക്ക് താങ്ങാനാവുന്ന വിലയിൽ മരുന്ന് ലഭ്യമാക്കുക, അതിലൂടെ മെച്ചപ്പെട്ട ജീവിതം ഉറപ്പുവരുത്തുക എന്നതാണ് ഈ പദ്ധതിയുടെ പ്രധാന ലക്ഷ്യം. ഫെഡറൽ സർക്കാർ ഇതിനോടകം ബ്രിട്ടീഷ് കൊളംബിയ, മാനിറ്റോബ, പ്രിൻസ് എഡ്വേർഡ് ഐലൻഡ്, യൂക്കോൺ തുടങ്ങിയ ചില പ്രവിശ്യകളുമായി കരാറിലേർപ്പെട്ടു കഴിഞ്ഞു. ഈ മാതൃക പിന്തുടർന്ന് ന്യൂ ബ്രൺസ്വിക്ക് സർക്കാരും ഉടൻ തന്നെ കരാർ ഒപ്പിടണമെന്നാണ് കോളിഷന്റെ ആവശ്യം.

നിലവിൽ, കാനഡയിൽ മരുന്നിന് വലിയ വില നൽകേണ്ടിവരുന്നുണ്ട്. ലോകത്ത് മരുന്നിന് ഏറ്റവും കൂടുതൽ വിലയുള്ള രാജ്യങ്ങളിൽ നാലാം സ്ഥാനത്താണ് കാനഡ. അതുകൊണ്ടുതന്നെ പത്തിൽ ഒരാൾക്ക് മരുന്ന് വാങ്ങാൻ സാധിക്കുന്നില്ലെന്ന് കോളിഷൻ പറയുന്നു. ഇത് പലപ്പോഴും അവരുടെ ആരോഗ്യത്തെ ഗുരുതരമായി ബാധിക്കുന്നു. ഫാർമകെയർ പദ്ധതി നടപ്പിലാക്കിയാൽ ഈ പ്രശ്നത്തിന് ഒരു പരിധി വരെ പരിഹാരമുണ്ടാക്കാൻ സാധിക്കും. എല്ലാവർക്കും മരുന്ന് സൗജന്യമായോ കുറഞ്ഞ വിലയിലോ ലഭിക്കും.

ഫാർമകെയർ പദ്ധതിയുടെ ആദ്യ ഘട്ടത്തിൽ പ്രമേഹത്തിനുള്ള മരുന്നുകളും ഗർഭനിരോധന മരുന്നുകളും സൗജന്യമായി നൽകാനാണ് തീരുമാനം. ടൈപ്പ് 1 പ്രമേഹമുള്ള കുട്ടികളുടെ ചികിത്സക്ക് ഒരു വർഷം $18,000 വരെ ചിലവ് വരാം. ഇത് പല കുടുംബങ്ങൾക്കും വലിയ സാമ്പത്തിക ഭാരമാണ് ഉണ്ടാക്കുന്നത്. മകൾക്ക് പ്രമേഹം വന്നതോടെയാണ് കാനഡയിലെ ആരോഗ്യ സംവിധാനം പൂർണ്ണമല്ലെന്ന് മനസ്സിലായതെന്ന് സ്കോട്ട് മാക്മില്ലൻ എന്ന രക്ഷിതാവ് പറയുന്നു. ഇൻസുലിൻ, ഗ്ലൂക്കോസ് മോണിറ്ററുകൾ തുടങ്ങിയവ ജീവൻ നിലനിർത്താൻ അത്യാവശ്യമാണെന്നും, അതിന് പണം കണ്ടെത്താൻ സാധാരണക്കാർക്ക് പ്രയാസമാണെന്നും അദ്ദേഹം ചൂണ്ടിക്കാട്ടുന്നു.

നിലവിൽ, മരുന്ന് കവറേജിൽ നിരവധി പോരായ്മകൾ ഉണ്ടെന്നും അത് പലരെയും പ്രതിസന്ധിയിലാക്കുന്നുണ്ടെന്നും ന്യൂ ബ്രൺസ്വിക്ക് ഹെൽത്ത് കോളിഷൻ കോ-ചെയർ ജീൻ-ക്ലോഡ് ബാസ്‌ക് പറയുന്നു. അടുത്ത മൂന്നാഴ്ചത്തേക്ക്, മന്ത്രിമാർ, പ്രതിപക്ഷം, മറ്റ് സംഘടനകൾ എന്നിവരുമായി ചേർന്ന് സർക്കാരിനെ ഈ വിഷയത്തിൽ സ്വാധീനിക്കാൻ ശ്രമിക്കുമെന്നും അദ്ദേഹം വ്യക്തമാക്കി. ഈ പദ്ധതി നടപ്പിലായാൽ ഗർഭനിരോധന മാർഗ്ഗങ്ങൾ എളുപ്പത്തിൽ ലഭ്യമാക്കുന്നതിലൂടെ സ്ത്രീകൾക്ക് അവരുടെ ആരോഗ്യ കാര്യങ്ങളിൽ കൂടുതൽ തീരുമാനങ്ങളെടുക്കാൻ സാധിക്കുമെന്നും കോളിഷൻ കൂട്ടിച്ചേർക്കുന്നു.

New Brunswick struggling with unaffordable drug prices; PharmaCare plan offers solution

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82