കാനഡയിലെ ഭവന പ്രതിസന്ധിക്ക് പരിഹാരം കാണുന്നതിനായി, കാർണി സർക്കാർ ‘ബിൽഡ് കാനഡ ഹോംസ്’ എന്ന പേരിൽ പുതിയ ഏജൻസിക്ക് തുടക്കം കുറിച്ചു. പ്രാഥമികമായി 13 ബില്യൺ ഡോളറിൻ്റെ നിക്ഷേപത്തോടെയാണ് ഈ പദ്ധതിക്ക് രൂപം നൽകിയിരിക്കുന്നത്. താങ്ങാനാവുന്ന ഭവനങ്ങൾ അതിവേഗം നിർമ്മിക്കുക എന്നതാണ് ഏജൻസിയുടെ പ്രധാന ലക്ഷ്യം. നിലവിൽ, ആറ് ഫെഡറൽ ഉടമസ്ഥതയിലുള്ള സ്ഥലങ്ങളിൽ 4,000 വീടുകൾ നിർമ്മിക്കാനുള്ള പദ്ധതിക്ക് ഏജൻസി മേൽനോട്ടം വഹിക്കും. നിർമ്മാണ മേഖലയിലെ പ്രശ്നങ്ങൾ പരിഹരിച്ച്, സാധാരണ കനേഡിയൻ കുടുംബങ്ങൾക്ക് കുറഞ്ഞ വിലയിൽ വീടുകൾ ലഭ്യമാക്കുകയാണ് ഇതിലൂടെ സർക്കാർ ലക്ഷ്യമിടുന്നത്.
പ്രധാനമന്ത്രി മാർക്ക് കാർണി ഞായറാഴ്ച നടത്തിയ പത്രസമ്മേളനത്തിലാണ് ഈ സുപ്രധാന പ്രഖ്യാപനം നടത്തിയത്. താങ്ങാനാവുന്ന വീടുകൾ നിർമ്മിക്കുന്നതിനായി നിർമ്മാതാക്കൾക്ക് സാമ്പത്തിക പ്രോത്സാഹനങ്ങളും ചെലവ് കുറയ്ക്കാനുള്ള സഹായങ്ങളും ഏജൻസി നൽകുമെന്ന് അദ്ദേഹം വ്യക്തമാക്കി. ഡാർട്ട്മൗത്ത്, ലോംഗൂയിൽ, ഒട്ടാവ, ടൊറന്റോ, വിന്നിപെഗ്, എഡ്മന്റൺ എന്നിവിടങ്ങളിലാകും ആദ്യഘട്ടത്തിൽ വീടുകൾ നിർമ്മിക്കുക. അടുത്ത വർഷം ആദ്യ വീടുകളുടെ നിർമ്മാണം ആരംഭിക്കുമെന്നാണ് പ്രതീക്ഷ. പുതിയ ഏജൻസി സർക്കാർ ഉടമസ്ഥതയിലുള്ള സ്ഥലങ്ങൾ കണ്ടെത്തി നിർമ്മാണത്തിനായി ഉപയോഗിക്കുമെന്നും, ഇത് ഭൂമിയുടെ വില കുറയ്ക്കാൻ സഹായിക്കുമെന്നും പ്രധാനമന്ത്രി കൂട്ടിച്ചേർത്തു.
കൂടുതൽ കാര്യക്ഷമമായ നിർമ്മാണ രീതികൾ സ്വീകരിച്ച് പദ്ധതി വേഗത്തിലാക്കാൻ ഏജൻസി ശ്രദ്ധിക്കും. ഇതിനായി ഫാക്ടറി-ബിൽഡ്, മോഡുലാർ, മാസ് ടിംബർ തുടങ്ങിയ ആധുനിക നിർമ്മാണ രീതികൾ ഉപയോഗിക്കും. ഫാക്ടറിയിൽ നിർമ്മിക്കുന്ന വീടുകൾ നിയന്ത്രിത സാഹചര്യങ്ങളിൽ ഉത്പാദിപ്പിച്ച് ദിവസങ്ങൾക്കുള്ളിൽ കൂട്ടിയിണക്കാൻ സാധിക്കുമെന്നതാണ് ഇതിന്റെ പ്രധാന മേന്മ. തന്മൂലം, കാനഡയിലെ കഠിനമായ ശൈത്യകാലത്തും നിർമ്മാണ പ്രവർത്തനങ്ങൾ തടസ്സമില്ലാതെ നടത്താൻ കഴിയും. കനേഡിയൻ നിർമ്മിത വസ്തുക്കൾക്ക് മുൻഗണന നൽകുന്ന “ബൈ കനേഡിയൻ” നയവും ഏജൻസി പിന്തുടരും. ഇത് രാജ്യത്തിൻ്റെ സമ്പദ്വ്യവസ്ഥയെ ശക്തിപ്പെടുത്താനും യുഎസ് താരിഫുകൾ മൂലമുണ്ടാകുന്ന വെല്ലുവിളികളെ നേരിടാനും സഹായിക്കും.
ഭവന പ്രതിസന്ധിക്ക് സമഗ്രമായ പരിഹാരം കാണുന്നതിനായി വിവിധ പദ്ധതികൾ ഏജൻസിക്ക് കീഴിൽ കൊണ്ടുവരുന്നുണ്ട്. ഭവനരഹിതരായവർക്ക് വേണ്ടിയുള്ള 1 ബില്യൺ ഡോളറിൻ്റെ പ്രത്യേക ഫണ്ട്, അതുപോലെ താങ്ങാനാവുന്ന വാടക നിലനിർത്താൻ കമ്മ്യൂണിറ്റി ഗ്രൂപ്പുകളെ സഹായിക്കുന്ന റന്റൽ പ്രൊട്ടക്ഷൻ ഫണ്ട് എന്നിവയും ഏജൻസിയുടെ ഭാഗമാകും. വീടുകളുടെ വാടക, അല്ലെങ്കിൽ വില, കുടുംബത്തിൻ്റെ നികുതിക്ക് മുൻപുള്ള വരുമാനത്തിന്റെ 30 ശതമാനത്തിൽ താഴെയായിരിക്കണം എന്ന കാനഡ മോർട്ട്ഗേജ് ആൻഡ് ഹൗസിംഗ് കോർപ്പറേഷന്റെ നിർവചനമാണ് ഏജൻസി താങ്ങാനാവുന്ന ഭവനങ്ങൾക്ക് മാനദണ്ഡമായി സ്വീകരിച്ചിരിക്കുന്നത്. ടൊറന്റോയിലെ മുൻ ഡെപ്യൂട്ടി മേയർ അന ബൈലാവോയാണ് ഈ പുതിയ ഏജൻസിയുടെ സിഇഒ.
കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/JNSnrvnSqw1DUJljLTLp82
Carney government launches ‘Build Canada Homes’ with $13B initial investment
