കാനഡ വിടുന്നവരുടെ എണ്ണം റെക്കോർഡിലേക്ക്, 2024-ൽ 106,134 പേർ രാജ്യം വിട്ടു. ഇത് 1967-ന് ശേഷമുള്ള ഏറ്റവും ഉയർന്ന കണക്കാണ്. സ്റ്റാറ്റ്സ്കാൻ (StatsCan) പുറത്തുവിട്ട വിവരങ്ങൾ പ്രകാരം 2025-ലും ഈ പ്രവണത തുടരുകയാണ്. 2025-ന്റെ ആദ്യ പാദത്തിൽ മാത്രം 27,000 പേർ കാനഡ വിട്ടു. ഒന്റാരിയോയിൽ നിന്നാണ് ഏറ്റവും കൂടുതൽ ആളുകൾ വിദേശത്തേക്ക് പോകുന്നത്. ബ്രിട്ടീഷ് കൊളംബിയ, ആൽബർട്ട എന്നീ പ്രവിശ്യകളും പിന്നിലുണ്ട്. അതേസമയം ക്യുബെക്കിൽ നിന്നുള്ളവർ താരതമ്യേന കുറവാണ്.
ഉയർന്ന ജീവിതച്ചെലവ്, ഭവനച്ചെലവിലെ വർദ്ധനവ്, മറ്റ് രാജ്യങ്ങളിലെ മികച്ച തൊഴിലവസരങ്ങൾ എന്നിവയാണ് ഈ പലായനത്തിന് പ്രധാന കാരണങ്ങളായി ചൂണ്ടിക്കാട്ടുന്നത്. വിദേശത്ത് കൂടുതൽ പ്രൊഫഷണൽ പരിചയം നേടാൻ ആഗ്രഹിക്കുന്ന ചെറുപ്പക്കാരാണ് കൂടുതലായി കാനഡ വിടുന്നത്.
ഈ മാറ്റം പൊതുസമൂഹത്തിൽ വലിയ ചർച്ചകൾക്ക് വഴിവെച്ചിട്ടുണ്ട്. ഇത് കാനഡയുടെ തൊഴിൽ മേഖലയെ ദീർഘകാലത്തേക്ക് എങ്ങനെ ബാധിക്കുമെന്ന ആശങ്കയും ഉയർത്തുന്നുണ്ട്. ചില വിദഗ്ദ്ധർ ഇത് ഒരു താൽക്കാലിക പ്രതിഭാസമായി കാണുമ്പോളും, ഇത് കാനഡയുടെ ഭാവിയെക്കുറിച്ചുള്ള ആശങ്കകൾ വർദ്ധിപ്പിക്കുന്നുണ്ട്.
Canada sets new emigration record
