അമിതവണ്ണം ഇന്ന് പ്രായഭേദമെന്യേ പലരും നേരിടുന്ന ഒരു പ്രധാന പ്രശ്നമാണ്. അനാരോഗ്യകരമായ ജീവിതശൈലിയും ഭക്ഷണക്രമവുമാണ് ഇതിന് പ്രധാന കാരണം. പലപ്പോഴും വണ്ണം കുറയ്ക്കാൻ കുറുക്കുവഴികൾ തേടി ആരോഗ്യത്തെ അപകടത്തിലാക്കുന്നവരുമുണ്ട്. എന്നാൽ, ചിട്ടയായ ഭക്ഷണക്രമത്തിലൂടെയും കൃത്യമായ വ്യായാമത്തിലൂടെയും ഈ പ്രശ്നത്തെ നമുക്ക് എളുപ്പത്തിൽ നിയന്ത്രിക്കാൻ കഴിയും.
ആദ്യം വേണ്ടത് മനസ്സിന്റെ തയ്യാറെടുപ്പ്
അമിതവണ്ണം കുറയ്ക്കാൻ ആദ്യം വേണ്ടത് അതിനായി മാനസികമായി തയ്യാറെടുക്കുക എന്നതാണ്. മറ്റൊരാൾക്ക് ഫലം കണ്ട വഴികൾ അതേപടി പിന്തുടരാതെ, നിങ്ങളുടെ ശരീരത്തിന് അനുയോജ്യമായ മാറ്റങ്ങളാണ് വരുത്തേണ്ടത്. നമ്മുടെ ഇപ്പോഴത്തെ ഭക്ഷണരീതിയെക്കുറിച്ച് മനസ്സിലാക്കി അതിനനുസരിച്ച് വ്യായാമവും ഭക്ഷണവും ക്രമീകരിക്കണം.
കുറുക്കുവഴികൾ ഒഴിവാക്കാം
ചിലർ പെട്ടെന്ന് തടി കുറയ്ക്കാൻ ഭക്ഷണനിയന്ത്രണം അമിതമാക്കാറുണ്ട്. ഇത് ക്ഷീണത്തിനും തളർച്ചയ്ക്കും കാരണമാകും. കൂടാതെ, അമിതമായി ഭക്ഷണം നിയന്ത്രിക്കുമ്പോൾ ശരീരത്തിലെ മസിലുകളാണ് നഷ്ടപ്പെടുന്നത്, കൊഴുപ്പല്ല. ഇത് ആരോഗ്യത്തെ ദോഷകരമായി ബാധിക്കും. അതുകൊണ്ട് പട്ടിണി കിടന്ന് തടി കുറയ്ക്കാൻ ശ്രമിക്കരുത്.
ഭക്ഷണനിയന്ത്രണം എങ്ങനെ?
ദിവസേന കഴിക്കുന്ന ഭക്ഷണത്തിൽ ചെറിയ മാറ്റങ്ങൾ വരുത്തുന്നതാണ് ആരോഗ്യകരമായ രീതി. കാർബോഹൈഡ്രേറ്റിൻ്റെയും കൊഴുപ്പിന്റെയും അളവ് കുറയ്ക്കുക. അതിനുപകരം, പ്രോട്ടീനും ഫൈബറും കൂടുതലായി ഉൾപ്പെടുത്തുക.
ഉദാഹരണത്തിന്: രാവിലെ ആറ് ഇഡ്ഡലി കഴിക്കുന്ന ഒരാൾ അത് നാലാക്കി കുറയ്ക്കുക. പകരം ഒരു കാരറ്റും കുക്കുമ്പറും ചേർത്ത സാലഡും ഒരു മുട്ടയുടെ വെള്ളയും കഴിക്കാം. ഇത് ആഹാരത്തെ സമീകൃതമാക്കുകയും വിശപ്പില്ലാതെ സഹായിക്കുകയും ചെയ്യും. ഉച്ചഭക്ഷണത്തിലും ഇതേ രീതി പിന്തുടരാം. ചോറിൻ്റെ അളവ് കുറച്ച്, അതിനു പകരം പ്രോട്ടീൻ കൂടുതലുള്ള കറികളായ ചിക്കനോ, മീനോ, പനീറോ ഉൾപ്പെടുത്താം.
വ്യായാമവും സമീകൃതാഹാരവും
ശരീരത്തിനാവശ്യമായ ഊർജ്ജത്തേക്കാൾ കുറഞ്ഞ അളവിൽ ഭക്ഷണം കഴിക്കുമ്പോഴാണ് ശരീരഭാരം കുറയുന്നത്. എന്നാൽ അമിതമായി ഊർജ്ജം നിയന്ത്രിച്ചാൽ ശരീരം കുറഞ്ഞ ഊർജ്ജത്തിൽ പ്രവർത്തിക്കാൻ പഠിക്കുകയും ഭാരം കുറയാതിരിക്കുകയും ചെയ്യും. അതുകൊണ്ട് അമിതമായ ഭക്ഷണ നിയന്ത്രണത്തെക്കാൾ പ്രധാനം സമീകൃതാഹാരം കൃത്യമായ അളവിൽ കഴിക്കുന്നതും ഒപ്പം ചിട്ടയായ വ്യായാമം ചെയ്യുന്നതുമാണ്.
Don't starve yourself to lose weight! Let's look at some calorie counts.
