കാനഡയിൽ അഭയം തേടിയ ഇന്ത്യൻ ദമ്പതികളുടെ അപേക്ഷ ഫെഡറൽ കോടതി തള്ളി. ദമ്പതികളുടെ വാദങ്ങൾ വിശ്വാസയോഗ്യമല്ലാത്തതിനാലാണ് നടപടിയെന്ന് കോടതി വ്യക്തമാക്കി. ഖാലിസ്ഥാൻ അനുകൂല പ്രവർത്തനങ്ങളുടെ പേരിൽ ഇന്ത്യയിൽ പീഡനം നേരിടേണ്ടിവരുമെന്നായിരുന്നു ഇവരുടെ വാദം. ഫെബ്രുവരി 15ന് റെഫ്യൂജി അപ്പീൽ ഡിവിഷനും (RAD) മൂന്ന് മാസം മുൻപ് റിഫ്യൂജി പ്രൊട്ടക്ഷൻ ഡിവിഷനും (RPD) എടുത്ത തീരുമാനങ്ങൾ ന്യായമാണെന്ന് ജഡ്ജി ബെനോയിറ്റ് എം ഡച്ചസ്നെ തിങ്കളാഴ്ച പുറത്തിറക്കിയ വിധിയിൽ വ്യക്തമാക്കി.
38 വയസ്സുള്ള അമൻദീപ് സിംഗ്, 32 വയസ്സുള്ള കൻവാൽദീപ് കൗർ എന്നിവർ, തങ്ങൾ കാനഡയിലെത്തിയ ശേഷമാണ് ഖാലിസ്ഥാൻ പ്രസ്ഥാനത്തെ പിന്തുണയ്ക്കാൻ തുടങ്ങിയതെന്നും, അതിനാൽ ഇന്ത്യയിലേക്ക് തിരിച്ചയച്ചാൽ പീഡനം നേരിടേണ്ടിവരുമെന്നും ചൂണ്ടിക്കാട്ടിയിരുന്നു. തങ്ങളുടെ വാദത്തിന് തെളിവായി ഇവർ പ്രതിഷേധങ്ങളുടെ ചിത്രങ്ങളും സിഖ്സ് ഫോർ ജസ്റ്റിസ് നൽകിയ ‘പഞ്ചാബ് റഫറണ്ടം ഖാലിസ്ഥാൻ’ വോട്ടർ രജിസ്ട്രേഷൻ കാർഡുകളും ഹാജരാക്കി.
എന്നാൽ, ഈ വാദങ്ങൾ ആർപിഡി (RPD) സംശയാസ്പദമെന്ന് കണ്ടെത്തുകയും, ഈ ഖാലിസ്ഥാൻ പ്രസ്ഥാനവുമായുള്ള ബന്ധം വിശ്വാസയോഗ്യമല്ലാത്തതും ദുരുദ്ദേശ്യപരവുമാണെന്ന് ആർഎഡി (RAD) വിലയിരുത്തുകയും ചെയ്തിരുന്നു. ഈ തീരുമാനങ്ങൾ ഫെഡറൽ കോടതി അംഗീകരിക്കുകയായിരുന്നു.
ദമ്പതികൾ ആദ്യം സമർപ്പിച്ച അപേക്ഷയിൽ, സ്വത്തുതർക്കത്തിന്റെ പേരിൽ അയൽക്കാരനും അദ്ദേഹത്തിന്റെ രാഷ്ട്രീയ സ്വാധീനം ഉപയോഗിച്ച് പോലീസും ഉപദ്രവിച്ചതായി ആരോപിച്ചിരുന്നു. ഈ ആക്രമണങ്ങളിൽ ചോദ്യം ചെയ്യൽ, ഭീഷണിപ്പെടുത്തൽ, മർദ്ദനം, കൻവാൽദീപ് കൗറിന് ലൈംഗികാതിക്രമം, വിരലടയാളവും ഒപ്പും നിർബന്ധിച്ച് രേഖപ്പെടുത്തൽ എന്നിവ ഉൾപ്പെടുന്നുവെന്ന് കോടതി രേഖകൾ പറയുന്നു.
തുടർന്ന് 2018-ൽ ദില്ലിയിലേക്ക് പലായനം ചെയ്ത ഇവർ, അതേ വർഷം ജൂണിൽ ഒരു താൽകാലിക വിസയിൽ കാനഡയിൽ എത്തി. എന്നാൽ ഈ ആരോപണങ്ങളും ആർപിഡി (RPD)-യും ആർഎഡി (RAD)-യും ചോദ്യം ചെയ്തിരുന്നു.
രാഷ്ട്രീയ അഭയം എന്നാൽ ‘യഥാർത്ഥത്തിൽ പീഡന ഭീഷണി നേരിടുക’ എന്നാണ് അർത്ഥമാക്കുന്നതെന്ന് മിസ്സിസ്സാഗ ആസ്ഥാനമായുള്ള ഇമിഗ്രേഷൻ കൺസൾട്ടന്റ് കൻവർ സിയേറ പറഞ്ഞു. ഇത്തരം വ്യാജ അപേക്ഷകൾ കാരണം യഥാർത്ഥത്തിൽ അർഹരായവർക്ക് സഹായം ലഭിക്കാൻ കാലതാമസമുണ്ടാകുന്നു എന്നും അദ്ദേഹം കൂട്ടിച്ചേർത്തു.
Canada court upholds decisions to deny asylum to Indian couple
