കനേഡിയൻ പ്രധാനമന്ത്രി മാർക്ക് കാർണിയും യുഎസ് പ്രസിഡന്റ് ഡൊണാൾഡ് ട്രംപും വ്യാഴാഴ്ച വളരെ ഫലപ്രദമായ ഒരു സംഭാഷണം നടത്തിയതായി പ്രധാനമന്ത്രിയുടെ ഓഫീസ് അറിയിച്ചു. രണ്ട് നേതാക്കളും വ്യാപാരത്തെക്കുറിച്ചും, പുതിയ സാമ്പത്തിക, സുരക്ഷാ സഹകരണത്തെക്കുറിച്ചും ചർച്ച ചെയ്തു. യുക്രെയ്നിലും യൂറോപ്പിലും ഒരു ദീർഘകാല സമാധാനം കൊണ്ടുവരുന്നതിനെക്കുറിച്ചും അവർ സംസാരിച്ചു. അടുത്ത കൂടിക്കാഴ്ച ഉടൻ നടത്താമെന്നും അവർ തീരുമാനിച്ചു.
കാർണിയുടെ നേതൃത്വത്തിലാണ് സംഭാഷണം ആരംഭിച്ചതെന്നും അത് ഒരുപാട് സമയമെടുത്തെന്നും അതിൽ പ്രധാനപ്പെട്ട കാര്യങ്ങൾ സംസാരിച്ചു എന്നുമാണ് മുതിർന്ന സർക്കാർ വൃത്തങ്ങൾ പറഞ്ഞത്. കാനഡയും അമേരിക്കയും തമ്മിൽ നിലനിൽക്കുന്നതും നീണ്ടു പോകുന്നതുമായ വ്യാപാര യുദ്ധത്തിനിടയിലും, ഒരു പുതിയ സാമ്പത്തിക സുരക്ഷാ കരാറിലെത്താനുള്ള സ്വയം നിശ്ചയിച്ച സമയപരിധി കഴിഞ്ഞ് മൂന്നാഴ്ചയ്ക്ക് ശേഷവുമാണ് ഈ സംഭാഷണം നടക്കുന്നത്.
ട്രംപ് ഫെബ്രുവരിയിൽ വലിയ താരിഫ് ഏർപ്പെടുത്തി വ്യാപാര യുദ്ധം ആരംഭിച്ചു. അതിർത്തിയിലെ ആശങ്കകൾക്ക് മറുപടിയായി കാനഡ ഫെന്റനിൽ യുഎസിലേക്ക് കടത്തിവിടുന്നത് തടയുന്നതിൽ വീഴ്ച വരുത്തിയെന്ന് ആരോപിച്ചായിരുന്നു ഇത്. ഓഗസ്റ്റ് 1 ന് കാർണിയും ട്രംപും ഒരു പുതിയ കരാറിലെത്താൻ കഴിയാതെ വന്നപ്പോൾ, യുഎസ് പ്രസിഡന്റ് കനേഡിയൻ ഉൽപ്പന്നങ്ങളുടെ തീരുവ 35 ശതമാനമായി വർദ്ധിപ്പിച്ചു. എന്നിരുന്നാലും, ഇരു രാജ്യങ്ങളും തമ്മിലുള്ള സ്വതന്ത്ര വ്യാപാര കരാർ കാരണം മിക്ക ഉൽപ്പന്നങ്ങൾക്കും ഈ താരിഫുകളിൽ നിന്ന് ഇളവുണ്ട്. സ്റ്റീൽ, അലുമിനിയം, ചെമ്പ്, ഓട്ടോമൊബൈൽ എന്നിവയ്ക്ക് ട്രംപ് ആഗോളതലത്തിൽ പ്രത്യേക താരിഫുകളും ഏർപ്പെടുത്തിയിട്ടുണ്ട്, അതിൽ നിന്ന് കനേഡിയൻ ഉൽപ്പന്നങ്ങൾക്ക് ഒഴിവാക്കലുകളില്ല.
കാനഡയ്ക്ക് സ്വന്തമായി പ്രതിരോധ താരിഫുകളും നിലവിലുണ്ട്. വ്യാപാര തർക്കം ഏറ്റവും കൂടുതൽ ബാധിച്ച വ്യവസായങ്ങൾക്ക് സഹായം നൽകുന്നതിനുള്ള നടപടികളും സ്വീകരിച്ചിട്ടുണ്ട്. അമേരിക്കയിലുള്ള അമിതമായ ആശ്രയം ഒഴിവാക്കി കനേഡിയൻ സമ്പദ്വ്യവസ്ഥയെ സംരക്ഷിക്കാൻ ഫെഡറൽ ഗവൺമെന്റ് കയറ്റുമതി വിപണികൾ വൈവിധ്യവൽക്കരിക്കാൻ ശ്രമിക്കുന്നു. അതേസമയം, നിരവധി പ്രവിശ്യകൾ യുഎസ് മദ്യം കടകളിൽ നിന്ന് നീക്കം ചെയ്യുകയും കനേഡിയൻ ജനത കൂട്ടത്തോടെ തെക്കോട്ടുള്ള യാത്രകൾ കുറയ്ക്കുകയും ചെയ്തിട്ടുണ്ട്. ട്രംപും അദ്ദേഹത്തിന്റെ ടീമും ഈ നടപടികളെ എതിർക്കുകയും, രാജ്യം മോശമായി കൈകാര്യം ചെയ്യുന്നു എന്ന് പറയുകയും ചെയ്തതായി യുഎസ് അംബാസഡർ വ്യക്തമാക്കി.
ട്രംപും കാർണിയും തമ്മിലുള്ള വ്യാഴാഴ്ചത്തെ ചർച്ച, ഒരു പുതിയ സാമ്പത്തിക സുരക്ഷാ കരാർ ഒപ്പുവെക്കുന്നതിനുള്ള ഇരു രാജ്യങ്ങളും തമ്മിലുള്ള തുടർച്ചയായ ചർച്ചകളുടെ ഏറ്റവും പുതിയ ഉദാഹരണമാണ്. കനേഡിയൻ നിയമനിർമ്മാതാക്കൾ പലരും കഴിഞ്ഞ മാസങ്ങളിൽ വാഷിംഗ്ടൺ സന്ദർശിച്ച് അവരുടെ അമേരിക്കൻ എതിരാളികമായി കൂടിക്കാഴ്ച നടത്തിയിരുന്നു. കാനഡ, യുഎസ്, മെക്സിക്കോ എന്നിവ തമ്മിലുള്ള സ്വതന്ത്ര വ്യാപാര കരാർ 2026 ൽ പുനഃപരിശോധിക്കും.
വിദേശകാര്യ മന്ത്രി അനിത ആനന്ദ് വ്യാഴാഴ്ച യുഎസ് സ്റ്റേറ്റ് സെക്രട്ടറി മാർക്കോ റൂബിയോയുമായി കൂടിക്കാഴ്ച നടത്തി. റഷ്യ-ഉക്രെയ്ൻ യുദ്ധം അവസാനിപ്പിക്കുന്നതിനുള്ള ചർച്ചകൾ, ഹെയ്തിയിലെ സുരക്ഷ, ഗാസയിൽ ഹമാസിന്റെ തുടർച്ചയായ സമാധാന തടസ്സങ്ങൾ” എന്നിവ ആനന്ദും റൂബിയോയും തമ്മിലുള്ള കൂടിക്കാഴ്ചയിൽ ചർച്ചാവിഷയമായിരുന്നു എന്ന് യുഎസ് സ്റ്റേറ്റ് ഡിപ്പാർട്ട്മെന്റിന്റെ സംഗ്രഹം പറയുന്നു. കൂടാതെ, വ്യാഴാഴ്ചത്തെ യോഗത്തിൽ, അധിനിവേശ വെസ്റ്റ് ബാങ്കിൽ ഒരു സെറ്റിൽമെന്റ് പദ്ധതിക്ക് അനുമതി നൽകിയ ഇസ്രായേലിന്റെ നടപടിയെ അപലപിക്കുന്നതിനായി യൂറോപ്പ്, ഓസ്ട്രേലിയ, ജപ്പാൻ, യുണൈറ്റഡ് കിങ്ഡം എന്നിവിടങ്ങളിൽ നിന്നുള്ള 20 വിദേശകാര്യ മന്ത്രിമാരോടൊപ്പം ആനന്ദും പങ്കെടുത്തു.
