കാനഡയിലെ എക്സ്പ്രസ് എൻട്രി അപേക്ഷയിൽ പങ്കാളിയെ ചേർക്കുമ്പോൾ ഇക്കാര്യങ്ങൾ ശ്രദ്ധിക്കണം, പണിപാളിയാൽ അപേക്ഷ നിരസിക്കലും വിലക്കും

നിങ്ങൾ കാനഡയിൽ സ്ഥിരതാമസത്തിന് ആ​ഗ്രഹിക്കുന്ന ആളാണോ? കാനഡയിലേക്കുള്ള സ്ഥിരതാമസത്തിന് (Permanent Residence – PR) എക്സ്പ്രസ് എൻട്രി (Express Entry) വഴി അപേക്ഷിക്കുമ്പോൾ, പങ്കാളിയെ അപേക്ഷയിൽ ഉൾപ്പെടുത്തണമോ വേണ്ടയോ എന്ന് തിരഞ്ഞെടുക്കാൻ സാധിക്കും. എന്നാൽ, ഈ തിരഞ്ഞെടുപ്പ് നിങ്ങളുടെ അപേക്ഷയെയും ഭാവി ജീവിതത്തെയും കാര്യമായി സ്വാധീനിക്കുന്ന ഒന്നാണ്. പങ്കാളിയെ അപേക്ഷയിൽ ഉൾപ്പെടുത്താതിരുന്നാൽ അത് തെറ്റായ വിവരങ്ങൾ നൽകലായി (misrepresentation) കണക്കാക്കുകയും, അപേക്ഷ നിരസിക്കപ്പെടാനും അഞ്ച് വർഷത്തേക്ക് കാനഡയിൽ പ്രവേശിക്കുന്നതിന് വിലക്ക് ഏർപ്പെടുത്താനും കാരണമാകാം.

Accompanying (കൂടെ വരുന്നവർ) vs. Non-accompanying (കൂടെ വരാത്തവർ)

ഏതൊരു കനേഡിയൻ ഇമിഗ്രേഷൻ അപേക്ഷയിലും നിങ്ങളുടെ പങ്കാളിയെ (spouse or common-law partner) നിർബന്ധമായും ഉൾപ്പെടുത്തണം. വിവരങ്ങൾ മറച്ചുവെക്കുന്നത് “misrepresentation” എന്ന ഗുരുതരമായ കുറ്റകൃത്യമാണ്.

Accompanying (കൂടെ വരുന്നവർ): ഈ ഓപ്ഷൻ തിരഞ്ഞെടുക്കുമ്പോൾ, പങ്കാളിയെ നിങ്ങളുടെ പി.ആർ. അപേക്ഷയിൽ ഉൾപ്പെടുത്താം. നിങ്ങളുടെ അപേക്ഷ വിജയകരമായാൽ പങ്കാളിക്കും ഒരേ സമയം പി.ആർ. ലഭിക്കും.

Non-accompanying (കൂടെ വരാത്തവർ): ഈ ഓപ്ഷൻ തിരഞ്ഞെടുക്കുമ്പോൾ, നിങ്ങൾ പി.ആർ. അപേക്ഷയിൽ പങ്കാളിയെ ഉൾപ്പെടുത്തുമെങ്കിലും, അവർ നിങ്ങൾക്കൊപ്പം കാനഡയിൽ താമസിക്കാൻ ഇപ്പോൾ വരുന്നില്ലെന്ന് വ്യക്തമാക്കണം. ഈ അപേക്ഷ അംഗീകരിക്കപ്പെട്ടാൽ നിങ്ങൾക്ക് മാത്രം പി.ആർ. ലഭിക്കും, പങ്കാളിക്ക് ലഭിക്കില്ല.

ഈ രണ്ട് ഓപ്ഷനുകളും തമ്മിലുള്ള പ്രധാന വ്യത്യാസങ്ങൾ താഴെക്കൊടുക്കുന്നു:

പങ്കാളിയെ Non-accompanying ആയി ഉൾപ്പെടുത്തുന്നത് എപ്പോൾ?

പങ്കാളിക്ക് വിദേശത്ത് മികച്ച കരിയർ, കുടുംബപരമായ ബാധ്യതകൾ, അല്ലെങ്കിൽ കാനഡയിലേക്ക് വരാൻ താൽപര്യമില്ലായ്മ തുടങ്ങിയ ന്യായമായ കാരണങ്ങൾ ഉണ്ടെങ്കിൽ ഈ ഓപ്ഷൻ തിരഞ്ഞെടുക്കാം.

വ്യാജ വിവരങ്ങൾ നൽകരുത്!

പി.ആർ. അപേക്ഷയിലെ സി.ആർ.എസ്. (Comprehensive Ranking System – CRS) സ്കോർ വർദ്ധിപ്പിക്കുന്നതിനായി, കാനഡയിലേക്ക് ഒരുമിച്ച് കുടിയേറാൻ ഉദ്ദേശിക്കുമ്പോഴും പങ്കാളിയെ ‘നോൺ-അക്കമ്പനിയിംഗ്’ ആയി രേഖപ്പെടുത്തുന്നത് തെറ്റായ വിവരങ്ങൾ നൽകുന്നതിന് തുല്യമാണ്. ഇത് അപേക്ഷ നിരസിക്കപ്പെടുന്നതിനും അഞ്ച് വർഷത്തെ യാത്രാ വിലക്കിനും കാരണമാകും.

സി.ആർ.എസ്. സ്കോറും പങ്കാളിയും

പങ്കാളിയുടെ വിദ്യാഭ്യാസ യോഗ്യത, ഭാഷാ പ്രാവീണ്യം, കാനഡയിലെ തൊഴിൽ പരിചയം എന്നിവയെ ആശ്രയിച്ച് നിങ്ങളുടെ സി.ആർ.എസ്. സ്കോറിൽ മാറ്റമുണ്ടാകും. ചിലപ്പോൾ പങ്കാളിയെ ഉൾപ്പെടുത്തുന്നത് നിങ്ങളുടെ സ്കോർ കുറയാൻ കാരണമായേക്കാം. എന്നാൽ, സ്കോർ വർദ്ധിപ്പിക്കാനായി മനഃപൂർവ്വം തെറ്റായ വിവരങ്ങൾ നൽകുന്നത് വലിയ പ്രശ്നങ്ങൾക്ക് വഴിവെക്കും. ഇമിഗ്രേഷൻ അധികൃതർ (IRCC) ഇതിന്റെ കാരണം ചോദിക്കാൻ സാധ്യതയുണ്ട്.

ശ്രദ്ധിക്കേണ്ട സാഹചര്യങ്ങൾ

പങ്കാളി നിലവിൽ കാനഡയിൽ: നിങ്ങൾക്കൊപ്പം കാനഡയിൽ താമസിക്കുന്ന പങ്കാളിയെ ‘നോൺ-അക്കമ്പനിയിംഗ്’ ആയി രേഖപ്പെടുത്തുന്നത് പരസ്പരവിരുദ്ധമായ കാര്യമാണ്. ഇത് അപേക്ഷയിൽ സംശയങ്ങൾക്ക് ഇടയാക്കും.

അപേക്ഷയ്ക്ക് ശേഷം പങ്കാളിയെ ചേർക്കുന്നത്: അപേക്ഷ സമർപ്പിച്ച ശേഷം പങ്കാളിയെ ‘അക്കമ്പനിയിംഗ്’ ആയി മാറ്റാൻ ശ്രമിക്കുന്നത് മുഴുവൻ അപേക്ഷയുടെയും പുനഃപരിശോധനയ്ക്ക് കാരണമാകും. ഇത് ‘misrepresentation’ ആയി കണക്കാക്കുകയും അപേക്ഷ നിരസിക്കാൻ ഇടയാക്കുകയും ചെയ്യാം. വിവാഹബന്ധത്തിലെ മാറ്റങ്ങൾ പോലുള്ള സാധുവായ കാരണങ്ങളുണ്ടെങ്കിൽ മാത്രം ഇത് ചെയ്യാം.

ചെയ്യേണ്ടതും ചെയ്യാൻ പാടില്ലാത്തതുമായ കാര്യങ്ങൾ പരിശോധിക്കാം

പാടില്ലാത്ത കാര്യങ്ങൾ:

പങ്കാളിയെക്കുറിച്ച് പറയാതിരിക്കുക: പങ്കാളിയുടെ വിവരങ്ങൾ മറച്ചുവയ്ക്കുന്നത് ഗുരുതരമായ കുറ്റമാണ്.

അയോഗ്യത മറച്ചുവെക്കാൻ ശ്രമിക്കുക: പങ്കാളിക്ക് എന്തെങ്കിലും നിയമപരമായോ ആരോഗ്യപരമായോ ഉള്ള അയോഗ്യതകൾ ഉണ്ടെങ്കിൽ അത് ‘നോൺ-അക്കമ്പനിയിംഗ്’ ആയി രേഖപ്പെടുത്തി ഒഴിവാക്കാൻ ശ്രമിക്കരുത്.

തെറ്റായ രേഖകൾ നൽകുക: ബന്ധത്തെക്കുറിച്ചുള്ള തെറ്റായ വിവരങ്ങളോ രേഖകളോ നൽകുന്നത് സൂക്ഷ്മ പരിശോധനയ്ക്ക് കാരണമാകും.

ചെയ്യേണ്ട കാര്യങ്ങൾ:

കൃത്യമായ രേഖകൾ സമർപ്പിക്കുക: വിവാഹ സർട്ടിഫിക്കറ്റ്, ബന്ധം വ്യക്തമാക്കുന്ന തെളിവുകൾ, വിശദീകരണ കത്ത് (Letter of Explanation) എന്നിവ കൃത്യമായി സമർപ്പിക്കുക.

സ്പോൺസർഷിപ്പ് നിയമങ്ങൾ മനസ്സിലാക്കുക: ഭാവിയിൽ പങ്കാളിയെ സ്പോൺസർ ചെയ്യാൻ ഉദ്ദേശിക്കുന്നുണ്ടെങ്കിൽ, ഫാമിലി ക്ലാസ് സ്പോൺസർഷിപ്പ് (Family Class sponsorship) നിയമങ്ങൾ മനസ്സിലാക്കുന്നത് നല്ലതാണ്.

രണ്ട് പേർക്കും പ്രത്യേകം പ്രൊഫൈൽ സമർപ്പിക്കാമോ?

ഒരു ദമ്പതികളിലെ ഓരോ വ്യക്തിക്കും പ്രത്യേകം എക്സ്പ്രസ് എൻട്രി പ്രൊഫൈലുകൾ ഉണ്ടാക്കാവുന്നതാണ്. ഉദാഹരണത്തിന്, ഒരാൾ പ്രധാന അപേക്ഷകനായും മറ്റേയാൾ പങ്കാളിയായും ഓരോ പ്രൊഫൈലിൽ രേഖപ്പെടുത്താം. ഇതിന് താഴെപ്പറയുന്ന കാര്യങ്ങൾ ശ്രദ്ധിക്കണം:

രണ്ട് പ്രൊഫൈലുകളും കൃത്യവും യഥാർത്ഥ വിവരങ്ങളുള്ളതുമായിരിക്കണം.ഒരപേക്ഷയ്ക്ക് ഇൻവിറ്റേഷൻ ടു അപ്ലൈ (ITA) ലഭിച്ചാൽ, ഉയർന്ന സ്കോറുള്ള അപേക്ഷയുമായി മുന്നോട്ട് പോകുകയും മറ്റേ പ്രൊഫൈൽ പിൻവലിക്കുകയോ കാലഹരണപ്പെടാൻ അനുവദിക്കുകയോ ചെയ്യാം. ഈ രീതി, വ്യത്യസ്ത തൊഴിൽ മേഖലകളിൽ നിന്നുള്ളവർക്കും ഫ്രഞ്ച് ഭാഷാ പ്രാവീണ്യമുള്ളവർക്കും കൂടുതൽ പ്രയോജനകരമാണ്.

Immigrating as a couple through Express Entry: what you need to know about listing a partner as non-accompanying