പോർട്ട് ആൽബേർണി നഗരത്തെ ചാമ്പലാക്കി കാട്ടുതീ; റോഡുകൾ അടച്ചു, ജാ​ഗ്രത നിർദേശം, അടിയന്തരാവസ്ഥ

അതിവേ​ഗം കാട്ടുതീ പടരുന്ന സാഹചര്യത്തിൽ വാൻകൂവർ ദ്വീപ് സമൂഹത്തിന് തെക്കുഭാഗത്തുള്ള പോർട്ട് ആൽബേർണി നഗത്തിൽ പ്രാദേശിക അടിയന്തരാവസ്ഥ പ്രഖ്യാപിച്ചു. ഇവിടെ 20 ചതുരശ്ര കിലോമീറ്ററിലധികം വനപ്രദേശം കത്തിനശിച്ചിട്ടുണ്ട്. മൗണ്ട് അണ്ടർവുഡ് കാട്ടുതീ ഇന്നും നിയന്ത്രണവിധേയമാകാതെ തുടരുകയാണ്. ഇത് പോർട്ട് ആൽബേർണിക്കും ബാംഫീൽഡിനും ഇടയിലുള്ള പ്രധാന റോഡ് അടച്ചു. തീപിടിത്തം മൂലം നൂറുകണക്കിന് താമസക്കാർക്കും ബിസിനസ് സ്ഥാപനങ്ങൾക്കും വൈദ്യുതി നഷ്ടപ്പെട്ടതായി ബി.സി. ഹൈഡ്രോ അറിയിച്ചു.

പോർട്ട് ആൽബേർണിക്ക് തെക്കുപടിഞ്ഞാറ് ഏകദേശം 15 കിലോമീറ്റർ അകലെയുള്ള ചൈന ക്രീക്ക് ക്യാമ്പ്ഗ്രൗണ്ട്, മറീന എന്നിവിടങ്ങളിൽ നിന്ന് ആളുകളെ ഒഴിപ്പിക്കാൻ അൽബേർണി-ക്ലയോക്വറ്റ് റീജിയണൽ ഡിസ്ട്രിക്റ്റ് ഉത്തരവിട്ടു. ഇവിടെ ഏകദേശം 250 ക്യാമ്പ്സൈറ്റുകളുണ്ട്.ചൊവ്വാഴ്ച, റീജിയണൽ ഡിസ്ട്രിക്റ്റ് ഇലക്ടറൽ ഏരിയ എ, ഇലക്ടറൽ ഏരിയ എഫ് എന്നിവിടങ്ങളിലെ ഏകദേശം 300 ഗ്രാമീണ പ്രോപ്പർട്ടികൾ ഒഴിപ്പിക്കാൻ ഉത്തരവിട്ടിരുന്നു. അയൽപ്രദേശമായ കോവിച്ചാൻ വാലി റീജിയണൽ ഡിസ്ട്രിക്റ്റും പോർട്ട് ആൽബേർണിക്കും നിറ്റിനാറ്റിനും ഇടയിലുള്ള ഇലക്ടറൽ ഏരിയ എഫിലെ വീടുകൾ ഒഴിപ്പിക്കാനും ഉത്തരവിട്ടു. പോർട്ട് ആൽബേർണിയിലെ കാമറൂൺ ഹൈറ്റ്സ് ഏരിയയ്ക്ക് ഒഴിപ്പിക്കൽ മുന്നറിയിപ്പ് നൽകിയിട്ടുണ്ട്. താമസക്കാർ ചെറിയ അറിയിപ്പിൽ വീടുകൾ വിടാൻ തയ്യാറെടുക്കണമെന്ന് അധികാരികൾ ആവശ്യപ്പെടുന്നുണ്ട്.

മൗണ്ട് അണ്ടർവുഡ് തീപിടിത്തം തിങ്കളാഴ്ചയാണ് റിപ്പോർട്ട് ചെയ്തത്. ഇത് അതിവേഗം പടർന്ന് വാൻകൂവർ ദ്വീപിലെ ഏറ്റവും വലിയ കാട്ടുതീയായി മാറി. തീപിടിത്തം റാങ്ക്-4, റാങ്ക്-5 തീവ്രതയിൽ എത്തുന്നുണ്ടെന്ന് വൈൽഡ്ഫയർ സർവീസ് അറിയിച്ചു. ഇതിനർത്ഥം ഇത് വളരെ ശക്തമായ അല്ലെങ്കിൽ അതീവ ശക്തമായ രീതിയിൽ കത്തുന്നു എന്നാണ്.

അടുത്ത 24 മുതൽ 48 മണിക്കൂറിനുള്ളിൽ പുക ഈ പ്രദേശങ്ങളിൽ തുടരുമെന്ന് പ്രതീക്ഷിക്കുന്നതിനാൽ, ഇൻലാൻഡ് വാൻകൂവർ ദ്വീപ് മേഖലയിൽ എൻവയോൺമെന്റ് കാനഡ ഒരു പ്രത്യേക വായു ഗുണനിലവാര പ്രസ്താവന പുറപ്പെടുവിച്ചു.പുകയുടെ അളവ് കൂടുമ്പോൾ ആരോഗ്യപരമായ അപകടസാധ്യതകൾ വർദ്ധിക്കും. പുറത്തിറങ്ങുന്ന സമയം പരിമിതപ്പെടുത്തുക. കായികവിനോദങ്ങൾ, പ്രവർത്തനങ്ങൾ, ഇവന്റുകൾ എന്നിവ കുറയ്ക്കുകയോ മാറ്റിവെക്കുകയോ ചെയ്യുന്നത് പരിഗണിക്കണം. 65 വയസ്സോ അതിൽ കൂടുതലോ പ്രായമുള്ളവർ, ഗർഭിണികൾ, ശിശുക്കൾ, ചെറിയ കുട്ടികൾ, നിലവിലുള്ള അസുഖങ്ങളോ വിട്ടുമാറാത്ത ആരോഗ്യപ്രശ്നങ്ങളോ ഉള്ള ആളുകൾ, പുറത്ത് ജോലി ചെയ്യുന്ന ആളുകൾ എന്നിവർ ഔട്ട്ഡോർ പ്രവർത്തനങ്ങൾ കുറയ്ക്കുകയോ മാറ്റിവെക്കുകയോ ചെയ്യണം. ലക്ഷണങ്ങൾ അനുഭവപ്പെടുകയാണെങ്കിൽ വൈദ്യസഹായം തേടണം.

തീപിടിത്തത്തിന്റെ കാരണം സംബന്ധിച്ച് ഇപ്പോഴും അന്വേഷണം നടന്നുവരികയാണ്. ബി.സി.യിൽ നിലവിൽ ഏകദേശം 90 കാട്ടുതീയാണ് കത്തുന്നത്. അതിൽ ഏഴെണ്ണം നിയന്ത്രണാതീതമാണ്.

Raging wildfire triggers state of emergency on Vancouver Island