എഐ സഹായത്തോടെ പ്രായ പരിശോധന: യുഎസിൽ പരീക്ഷണം ആരംഭിച്ച് യൂട്യൂബ്

പ്രായപൂർത്തിയാകാത്തവരെയും മുതിർന്നവരെയും വേർതിരിക്കാൻ സഹായിക്കുന്ന ഒരു പുതിയ എഐ അധിഷ്ഠിത പ്രായപരിശോധനാ സംവിധാനം യുഎസിൽ പരീക്ഷിക്കാൻ ഒരുങ്ങി യുട്യൂബ്. ആളുകൾ കാണുന്ന വീഡിയോകളുടെ സ്വഭാവം വിശകലനം ചെയ്താണ് എഐ ഈ പ്രായപരിശോധന നടത്തുന്നത്. തുടക്കത്തിൽ യുട്യൂബ് ഉപഭോക്താക്കളുടെ ചെറിയൊരു വിഭാഗത്തിൽ മാത്രമാകും ഈ സംവിധാനം പരീക്ഷിക്കുക. എന്നാൽ, ലോകത്തിന്റെ മറ്റു ഭാഗങ്ങളിലെന്നപോലെ യുഎസിലും ഇത് ഫലപ്രദമാണെന്ന് തെളിഞ്ഞാൽ കൂടുതൽ പേരിലേക്ക് ഇത് വ്യാപിപ്പിക്കും. ഉപഭോക്താക്കൾ അവരുടെ അക്കൗണ്ടിൽ ലോഗിൻ ചെയ്യുമ്പോൾ മാത്രമാണ് ഈ സംവിധാനം പ്രവർത്തിക്കുക. ഒരു ഉപഭോക്താവ് അക്കൗണ്ട് തുടങ്ങുമ്പോൾ നൽകിയിരിക്കുന്ന ജനനത്തീയതി പരിഗണിക്കാതെയാണ് എഐ പ്രായം വിലയിരുത്തുന്നത്.

എഐ സംവിധാനം ഒരു ഉപഭോക്താവിനെ 18 വയസ്സിൽ താഴെയുള്ള ഒരാളായി തിരിച്ചറിയുകയാണെങ്കിൽ, യു ട്യൂബ് സൈറ്റ് നിലവിൽ പ്രായപൂർത്തിയാകാത്തവർക്ക് അനുചിതമായി കണക്കാക്കുന്ന വീഡിയോകളും മറ്റും കാണുന്നതിൽ നിന്ന് അവരെ തടയാൻ ഉപയോഗിക്കുന്ന നിയന്ത്രണങ്ങൾ ഏർപ്പെടുത്തും. സ്‌ക്രീനിൽ നിന്ന് ഇടവേളയെടുക്കാനുള്ള ഓർമ്മപ്പെടുത്തലുകൾ, സ്വകാര്യതാ മുന്നറിയിപ്പുകൾ, വീഡിയോ ശുപാർശകളിലെ നിയന്ത്രണങ്ങൾ എന്നിവ ഈ സുരക്ഷാ സംവിധാനങ്ങളിൽ ഉൾപ്പെടുന്നു. ഏകദേശം 20 വർഷമായി ഗൂഗിളിന്റെ ഉടമസ്ഥതയിലുള്ള യു ട്യൂബ്, ഒരു ഉപഭോക്താവിന് 18 വയസ്സിൽ താഴെയാണെങ്കിൽ അവർക്ക് അവരുടെ താൽപര്യങ്ങൾക്കനുസരിച്ചുള്ള പരസ്യങ്ങൾ കാണിക്കാറില്ല.

സിസ്റ്റം തെറ്റായി ഒരാളെ പ്രായപൂർത്തിയാകാത്തയാളായി തിരിച്ചറിയുകയാണെങ്കിൽ, സർക്കാർ അംഗീകൃത തിരിച്ചറിയൽ കാർഡ്, ക്രെഡിറ്റ് കാർഡ് അല്ലെങ്കിൽ ഒരു സെൽഫി എന്നിവ കാണിച്ച് ഈ പിശക് തിരുത്താൻ സാധിക്കും. പ്രായപരിശോധന വ്യക്തിപരമായ സ്വകാര്യതയെ ഹനിക്കുമെന്നും അഭിപ്രായസ്വാതന്ത്ര്യത്തിനുള്ള സംരക്ഷണം ലംഘിക്കുമെന്നും ഇലക്ട്രോണിക് ഫ്രോണ്ടിയർ ഫൗണ്ടേഷൻ, സെന്റർ ഫോർ ഡെമോക്രസി & ടെക്നോളജി തുടങ്ങിയ ചില ഡിജിറ്റൽ അവകാശ ഗ്രൂപ്പുകൾ ആശങ്ക ഉന്നയിച്ചിട്ടുണ്ട്. എന്നാൽ, ചെറുപ്പക്കാർക്കായി പ്രത്യേകം രൂപകൽപ്പന ചെയ്ത സൗകര്യങ്ങൾ വാഗ്ദാനം ചെയ്യുന്ന ആദ്യ പ്ലാറ്റ്‌ഫോമുകളിലൊന്നാണ് യു ട്യൂബ് എന്നും, യുവാക്കളുടെ സ്വകാര്യത സംരക്ഷിച്ചുകൊണ്ട് സുരക്ഷ നൽകുന്ന സാങ്കേതികവിദ്യ അവതരിപ്പിക്കുന്നതിൽ അഭിമാനമുണ്ടെന്നും യു ട്യൂബിന്റെ ഡയറക്ടർ ഓഫ് പ്രൊഡക്റ്റ് മാനേജ്‌മെൻ്റ് ജെയിംസ് ബെസർ ബ്ലോഗ് പോസ്റ്റിൽ കുറിച്ചു. ആളുകൾക്ക് ഒരു അക്കൗണ്ടിൽ ലോഗിൻ ചെയ്യാതെയും യു ട്യൂബ് വീഡിയോകൾ കാണാൻ സാധിക്കും, പക്ഷേ ഇങ്ങനെ കാണുമ്പോൾ പ്രായം തെളിയിക്കാത്തപക്ഷം ചില ഉള്ളടക്കങ്ങൾക്ക് യാന്ത്രികമായ തടസ്സങ്ങൾ ഉണ്ടാകും.

YouTube begins experimenting with AI-assisted age verification in the US