ഒട്ടാവ : കാനഡയുടെ തലസ്ഥാന നഗരമായ ഒട്ടാവയിൽ നടപ്പിലാക്കുന്ന അതിമഹത്തായ പരിസ്ഥിതി സൗഹൃദ ഗതാഗത പദ്ധതി കടമ്പകൾ നേരിടുന്നു. 2036-ഓടെ നഗരത്തിലെ മുഴുവൻ പൊതുഗതാഗത സംവിധാനവും വൈദ്യുത ബസുകളിലേക്ക് മാറ്റുന്നതിനുള്ള ഒരു ബില്യൺ ഡോളറിന്റെ (ഏകദേശം 6,100 കോടി രൂപ) പദ്ധതിയാണ് നടപ്പിലാക്കി വരുന്നത്.
എന്നാൽ 2024 അവസാനത്തോടെ 182 ബസുകൾ വാങ്ങാനുള്ള പദ്ധതിയിൽ വെറും 8 വൈദ്യുത ബസുകൾ മാത്രമാണ് നഗരത്തിന് സ്വന്തമാക്കാൻ കഴിഞ്ഞത്.
OC ട്രാൻസ്പോ സെന്റ് ലോറൻസ് ഗാരേജിൽ ചാർജിംഗ് സ്റ്റേഷനുകളും വൈദ്യുത അടിസ്ഥാന സൗകര്യങ്ങളും ഒരുക്കിയെങ്കിലും, നിലവിലുള്ള അടിസ്ഥാന സൗകര്യങ്ങളുമായി പുതിയ ബസുകൾ പൊരുത്തപ്പെടുത്തുന്നതിലെ പ്രശ്നങ്ങൾ, ചാർജിംഗ് സാങ്കേതികവിദ്യയിലെ പരീക്ഷണങ്ങൾ, ഡ്രൈവർമാർക്ക് പുതിയ സംവിധാനത്തോട് ഇണങ്ങിച്ചേരാനുള്ള വെല്ലുവിളികൾ എന്നിവ പദ്ധതിയുടെ പുരോഗതിയെ സാരമായി ബാധിച്ചിട്ടുണ്ട്.
മഹാമാരിയും നിർമ്മാണ പ്രശ്നങ്ങളും മൂലമുണ്ടായ കാലതാമസം ഉണ്ടായെങ്കിലും, പദ്ധതി പൂർത്തീകരിക്കാൻ നഗരം പ്രതിജ്ഞാബദ്ധമാണ്. ടൊറന്റോ ട്രാൻസിറ്റ് കമ്മീഷന്റെ അനുഭവങ്ങളിൽ നിന്ന് പാഠങ്ങൾ ഉൾക്കൊണ്ട് മുന്നോട്ട് പോകാനാണ് നഗരത്തിന്റെ തീരുമാനം
