അമേരിക്കൻ പ്രസിഡന്റ് ഡൊണാൾഡ് ട്രംപും റഷ്യൻ പ്രസിഡന്റ് വ്ലാഡിമിർ പുടിനും അടുത്ത വെള്ളിയാഴ്ച അലാസ്കയിൽ കൂടിക്കാഴ്ച നടത്തും. ഉക്രെയ്നിലെ യുദ്ധം അവസാനിപ്പിക്കുന്നതുമായി ബന്ധപ്പെട്ട നിർണായക ചർച്ചകൾക്കായാണ് ഈ കൂടിക്കാഴ്ച. റഷ്യയുടെ മുൻ അധീനതയിലുണ്ടായിരുന്ന അലാസ്കയിൽ വെച്ചാണ് ഈ ചരിത്രപരമായ കൂടിക്കാഴ്ച നടക്കുന്നത് എന്നതും ശ്രദ്ധേയമാണ്. യുക്രെയ്ൻ യുദ്ധം 24 മണിക്കൂറിനുള്ളിൽ അവസാനിപ്പിക്കുമെന്ന് തിരഞ്ഞെടുപ്പ് വാഗ്ദാനം നൽകിയിരുന്ന ട്രംപ്, ഈ കൂടിക്കാഴ്ചയിലൂടെ സമാധാനം കൊണ്ടുവരാൻ കഴിയുമെന്ന പ്രതീക്ഷയിലാണ്.
യുദ്ധം അവസാനിപ്പിക്കാൻ ട്രംപ് നേരത്തേ മുന്നോട്ട് വെച്ച നിർദ്ദേശങ്ങൾ റഷ്യയും ഉക്രെയ്നും അംഗീകരിച്ചിരുന്നില്ല. റഷ്യക്ക് ഉക്രെയ്ൻ പ്രദേശം വിട്ടുകൊടുക്കുന്നതുമായി ബന്ധപ്പെട്ടാണ് പ്രധാന തർക്കങ്ങൾ. ക്രിമിയ, ഡോൺബാസ് മേഖലകൾ റഷ്യക്ക് നൽകണമെന്നും, പകരം കെർസൺ, സാപോറിഷ്യ പോലുള്ള ചില പ്രദേശങ്ങളിൽ നിന്ന് പിൻമാറണമെന്നും ട്രംപ് നിർദ്ദേശിച്ചതായി റിപ്പോർട്ടുകളുണ്ട്. എന്നാൽ, ഉക്രെയ്ൻ പ്രസിഡന്റ് വൊളോഡിമിർ സെലെൻസ്കി ഈ നിർദ്ദേശത്തെ തള്ളിപ്പറഞ്ഞു. രാജ്യത്തിന്റെ ഭരണഘടനയ്ക്ക് എതിരായ ഒരു നീക്കവും അംഗീകരിക്കില്ലെന്ന് അദ്ദേഹം വ്യക്തമാക്കി.
ഉക്രെയ്നെ കൂടാതെ ഒരു സമാധാന ചർച്ചയും പൂർണ്ണമാകില്ലെന്നും അദ്ദേഹം പറഞ്ഞു. പുടിനുമായി സംസാരിച്ച് പ്രശ്നങ്ങൾ പരിഹരിക്കാൻ ട്രംപ് ശ്രമിക്കുമ്പോൾ, ഉക്രെയ്ൻ പ്രതിനിധികളെ ചർച്ചയിലേക്ക് ഉൾപ്പെടുത്തുമോ എന്ന കാര്യത്തിൽ ഇപ്പോഴും വ്യക്തതയില്ല. സെലെൻസ്കിയെ ചർച്ചയിൽ ഉൾപ്പെടുത്താൻ ട്രംപിന് താൽപര്യമുണ്ടെങ്കിലും, നിലവിൽ ഇത് ട്രംപ്-പുടിൻ ഉച്ചകോടിയായിരിക്കുമെന്നാണ് വൈറ്റ് ഹൗസ് ഉദ്യോഗസ്ഥർ സൂചിപ്പിക്കുന്നത്.
അലാസ്കയിലെ കൂടിക്കാഴ്ചയിൽ ഇരുനേതാക്കളും ഒരു ധാരണയിലെത്തുമെന്നും, തുടർന്ന് സെലെൻസ്കിയെ കൂടി ഉൾപ്പെടുത്തി ചർച്ചകൾ മുന്നോട്ട് കൊണ്ടുപോകുമെന്നും വൈസ് പ്രസിഡന്റ് ജെഡി വാൻസ് സൂചന നൽകി. ചരിത്രപരമായ ഈ കൂടിക്കാഴ്ചയ്ക്ക് അലാസ്കയെ തിരഞ്ഞെടുത്തതിന് പിന്നിൽ ചില കാരണങ്ങളുണ്ട്. 1867-ൽ അമേരിക്ക റഷ്യയിൽ നിന്ന് വാങ്ങിയ പ്രദേശമാണ് അലാസ്ക. മാത്രമല്ല, ബെറിങ് കടലിടുക്ക് വഴി ഇരു രാജ്യങ്ങളും അതിർത്തി പങ്കിടുന്നുമുണ്ട്. അതുകൊണ്ട് തന്നെ അലാസ്ക ഒരു “ലോജിക്കൽ ചോയ്സ്” ആണെന്ന് റഷ്യൻ ഉദ്യോഗസ്ഥരും പറയുന്നു. ഈ കൂടിക്കാഴ്ച യുക്രെയ്ൻ വിഷയത്തിൽ ഒരു വഴിത്തിരിവാകുമോ എന്ന് ലോകം ആകാംഷയോടെ ഉറ്റുനോക്കുന്നു.
Putin and Trump unite, are there days of peace now?
