ആർട്ടിഫിഷ്യൽ ഇന്റലിജൻസ് (AI) രംഗത്തെ പ്രതിഭകളെ സ്വന്തമാക്കാൻ ലോകത്തെ ടെക് ഭീമന്മാർ മത്സരിക്കുമ്പോൾ, അതിശയിപ്പിക്കുന്ന ഒരു വാർത്തയാണ് ഇപ്പോൾ പുറത്തുവരുന്നത്. മെറ്റ സിഇഒ മാർക്ക് സക്കർബർഗ്, വെറും 24 വയസ്സുള്ള എഐ ഗവേഷകനായ മാറ്റ് ഡീറ്റ്കെയെ തങ്ങളുടെ സൂപ്പർഇന്റലിജൻസ് ലാബിലേക്ക് റിക്രൂട്ട് ചെയ്യാൻ ₹2,196 കോടി രൂപയുടെ (ഏകദേശം $265 മില്യൺ) ഭീമമായ ശമ്പള പാക്കേജ് വാഗ്ദാനം ചെയ്തു. ഈ തുക കാരണം ഡീറ്റ്കെയ്ക്ക് സ്വന്തം സ്റ്റാർട്ടപ്പ് തുടങ്ങാനുള്ള തീരുമാനം മാറ്റേണ്ടി വന്നു.
ആദ്യഘട്ടത്തിൽ മെറ്റയുടെ ₹1,098 കോടി രൂപയുടെ (ഏകദേശം $125 മില്യൺ) ഓഫർ മാറ്റ് ഡീറ്റ്കെ നിരസിച്ചിരുന്നു. തന്റെ സ്റ്റാർട്ടപ്പായ ‘വെർസെപ്റ്റി’ൽ ശ്രദ്ധ കേന്ദ്രീകരിക്കാനായിരുന്നു അദ്ദേഹത്തിന്റെ തീരുമാനം. എന്നാൽ, ഈ യുവപ്രതിഭയെ തങ്ങളുടെ ടീമിൽ എത്തിക്കുന്നതിന്റെ പ്രാധാന്യം മനസ്സിലാക്കിയ സക്കർബർഗ് നേരിട്ട് ഡീറ്റ്കെയുമായി കൂടിക്കാഴ്ച നടത്താൻ തീരുമാനിച്ചു. ഈ കൂടിക്കാഴ്ചയിലാണ് ആദ്യത്തെ ഓഫറിന്റെ ഇരട്ടിയായി, ₹2,196 കോടി രൂപയുടെ ഞെട്ടിക്കുന്ന പാക്കേജ് മുന്നോട്ട് വെച്ചത്. ആദ്യ വർഷം മാത്രം ₹879 കോടി രൂപ (ഏകദേശം $100 മില്യൺ) നൽകുമെന്നായിരുന്നു വാഗ്ദാനം. ഈ പുതിയ ഓഫർ ഡീറ്റ്കെയെ മെറ്റയുടെ ഭാഗമാക്കാൻ പ്രേരിപ്പിച്ചു.
അക്കാദമിക് രംഗത്തും എഐ ഗവേഷണ ലോകത്തും മാറ്റ് ഡീറ്റ്കെ ഒരു ശ്രദ്ധേയ വ്യക്തിത്വമാണ്. വാഷിംഗ്ടൺ സർവ്വകലാശാലയിൽ പി.എച്ച്.ഡി. വിദ്യാർത്ഥിയായിരുന്ന അദ്ദേഹം, പഠനം പാതിവഴിയിൽ ഉപേക്ഷിച്ച് സിയാറ്റിലിലെ അലൻ ഇൻസ്റ്റിറ്റ്യൂട്ട് ഫോർ എഐ (AI2) എന്ന സ്ഥാപനത്തിൽ ചേർന്നു. അവിടെ വെച്ചാണ് ടെക്സ്റ്റ്, ചിത്രങ്ങൾ, ഓഡിയോ എന്നിവ മനസ്സിലാക്കാൻ കഴിവുള്ള ‘മോൾമോ’ എന്ന മൾട്ടിമോഡൽ ചാറ്റ്ബോട്ട് ഡീറ്റ്കെ വികസിപ്പിച്ചത്. അദ്ദേഹത്തിന്റെ ഈ കണ്ടുപിടുത്തം NeurIPS 2022-ൽ ഒരു ‘ഔട്ട്സ്റ്റാൻഡിങ് പേപ്പർ അവാർഡ്’ നേടിക്കൊടുത്തു. ഈ നേട്ടങ്ങളാണ് ഡീറ്റ്കെയെ എഐ ലോകത്തെ ഏറ്റവും മികച്ച പ്രതിഭകളിൽ ഒരാളാക്കി മാറ്റിയത്.
ലോകത്തിലെ ഏറ്റവും മികച്ച എഐ ടീമിനെ കെട്ടിപ്പടുക്കുന്നതിൽ മെറ്റ വലിയ താൽപ്പര്യമാണ് കാണിക്കുന്നത്. ഇതിനായി ഒരു ബില്യൺ ഡോളറിൽ അധികം തുക ഇതിനോടകം തന്നെ നിക്ഷേപിച്ചതായാണ് റിപ്പോർട്ടുകൾ. ഓപ്പൺഎഐ, ഗൂഗിൾ, ആപ്പിൾ തുടങ്ങിയ പ്രമുഖ കമ്പനികളിൽ നിന്ന് പ്രതിഭകളെ ആകർഷിക്കാൻ മെറ്റ ശ്രമിക്കുന്നുണ്ട്. ഡീറ്റ്കെയെ കൂടാതെ, ആപ്പിളിന്റെ എഐ മോഡൽസ് ടീമിന്റെ മുൻ മേധാവി ആയിരുന്ന റൂമിംഗ് പാങിനെയും മെറ്റ സ്വന്തമാക്കി. 200 മില്യൺ ഡോളറിന് മുകളിൽ ശമ്പള പാക്കേജാണ് പാങ്ങിനും വാഗ്ദാനം ചെയ്തതെന്നാണ് സൂചന. ഈ നീക്കങ്ങൾ എഐ രംഗത്ത് തങ്ങളുടെ ആധിപത്യം ഉറപ്പിക്കാനുള്ള മെറ്റയുടെ ശ്രമങ്ങളുടെ ഭാഗമാണ്.
AI brainstorming; Meta offers Rs 2,000 crore to acquire smart techie
