കാട്ടുതീയോ അതോ മനഃപ്പൂർവം തീയിട്ടതോ? ന്യൂഫൗണ്ട്ലാൻഡിൽ വീണ്ടും ഒഴിപ്പിക്കൽ നിർദേശം

ന്യൂഫൗണ്ട്ലാൻഡിലെ കൺസെപ്ഷൻ ബേ നോർത്ത് മേഖലയിൽ വീണ്ടും ആളുകളെ ഭീതിയിലാക്കി കാട്ടുതീ. കിംഗ്സ്റ്റൺ, ആഡംസ് കോവ്, ബ്രോഡ് കോവ് തുടങ്ങിയ പ്രദേശങ്ങളിലെ താമസക്കാർക്ക് വീണ്ടും വീടുകളിൽ നിന്ന് സുരക്ഷിത സ്ഥലങ്ങളിലേക്ക് മാറാൻ നിർദേശം നൽകി. കഴിഞ്ഞ ഏതാനും ആഴ്ചകളായി ഈ മേഖലയിൽ തുടർച്ചയായി കാട്ടുതീ ഉണ്ടാകുന്നത് സംശയകരമാണെന്ന് അധികൃതർ വ്യക്തമാക്കി. ഇത്തരം സംഭവങ്ങളുടെ സമയവും സ്വഭാവവും മനപ്പൂർവ്വം തീയിട്ടതാകാനുള്ള സാധ്യത വർദ്ധിപ്പിക്കുന്നുവെന്ന് സ്മാൾ പോയിന്റ്-ആഡംസ് കോവ്-ബ്ലാക്ക്ഹെഡ്-ബ്രോഡ് കോവ് മേയർ കർട്ടിസ് ഡെലനി പറഞ്ഞു. ഈ വിഷയത്തിൽ പോലീസ് അന്വേഷണം ആരംഭിച്ചിട്ടുണ്ട്.

കഴിഞ്ഞ മേയ് മാസം മുതൽ ഇതുവരെ ഒൻപതോളം കാട്ടുതീ സംഭവങ്ങളാണ് ഈ മേഖലയിൽ റിപ്പോർട്ട് ചെയ്യപ്പെട്ടത്. മേയറുടെ അഭിപ്രായത്തിൽ, ഓരോ തീപിടുത്തവും സമാനമായ സാഹചര്യങ്ങളിലാണ് ഉണ്ടാകുന്നത്. ഇത് ഈ സംഭവങ്ങൾ യാദൃശ്ചികമല്ലെന്ന് സൂചിപ്പിക്കുന്നു. ഈ തുടർച്ചയായ കാട്ടുതീ പ്രദേശത്തെ ജനങ്ങളെ വലിയ ആശങ്കയിലാഴ്ത്തിയിരിക്കുകയാണ്. കഴിഞ്ഞ മേയിൽ ഉണ്ടായ ഒരു വലിയ തീപിടുത്തത്തിൽ 12 വീടുകളും 45-ഓളം മറ്റ് കെട്ടിടങ്ങളും നശിച്ചിരുന്നു. ഈ സംഭവങ്ങൾക്കെതിരെ കർശന നടപടി വേണമെന്ന് പ്രദേശവാസികൾ ആവശ്യപ്പെട്ടു.

തീപിടുത്തമുണ്ടാക്കുന്നവരെ ഉടൻ പിടികൂടണമെന്നാണ് ജനങ്ങളുടെ പ്രധാന ആവശ്യം.
അധികൃതരുടെ നിർദേശമനുസരിച്ച്, സ്മാൾ പോയിന്റ്-ആഡംസ് കോവ്-ബ്ലാക്ക്ഹെഡ്-ബ്രോഡ് കോവ്, കിംഗ്സ്റ്റൺ എന്നിവിടങ്ങളിലെ ആളുകൾക്ക് അടിയന്തിരമായി ഒഴിപ്പിക്കൽ നിർദേശം ലഭിച്ചു. വിക്ടോറിയയിലെ പേർസാൽവിക് സ്കൂൾ കോംപ്ലക്സിൽ ആളുകൾക്ക് താമസ സൗകര്യങ്ങൾ ഒരുക്കിയിട്ടുണ്ട്. 72 മണിക്കൂറിനുള്ളിൽ ആവശ്യമായ ഭക്ഷണം, വെള്ളം, മരുന്നുകൾ, പ്രധാനപ്പെട്ട രേഖകൾ എന്നിവ കൈവശം വെക്കാനും അധികൃതർ നിർദേശം നൽകി. നിലവിൽ, 156 ഹെക്ടറിലധികം സ്ഥലത്ത് തീ പടർന്ന് പിടിച്ചിരിക്കുകയാണ്. കാട്ടുതീ അണയ്ക്കാൻ വിമാനങ്ങളും ഹെലികോപ്റ്ററുകളും ഉൾപ്പെടെയുള്ള സംവിധാനങ്ങൾ ഉപയോഗിച്ച് ശ്രമം തുടരുകയാണെന്ന് ഫിഷറീസ്, ഫോറസ്ട്രി ആൻഡ് അഗ്രിക്കൾച്ചർ വകുപ്പ് അറിയിച്ചു.

അതേസമയം, തീപിടുത്തങ്ങൾ മനപ്പൂർവമുണ്ടാക്കിയതാണെന്ന സാധ്യത ഗൗരവമായി കാണുന്നുണ്ടെന്നും ഈ പ്രദേശങ്ങളിൽ കൂടുതൽ നിരീക്ഷണം ഏർപ്പെടുത്തുമെന്നും ഫോറസ്ട്രി മന്ത്രി ലിസ ഡെംപ്സ്റ്റർ അറിയിച്ചു. വരണ്ട കാലാവസ്ഥയും ശക്തമായ കാറ്റും രക്ഷാപ്രവർത്തനങ്ങൾക്ക് വെല്ലുവിളിയാകുന്നുണ്ട്. എങ്കിലും കാറ്റിന്റെ ദിശ മാറുന്നത് രക്ഷാപ്രവർത്തനങ്ങൾക്ക് സഹായകമാകുമെന്നാണ് കാലാവസ്ഥാ വിദഗ്ധരുടെ പ്രതീക്ഷ. പ്രദേശത്തെ ഉയർന്ന താപനിലയും വരണ്ട കാലാവസ്ഥയും കാട്ടുതീ സാധ്യത വർദ്ധിപ്പിക്കുന്നുണ്ടെന്നും അധികൃതർ മുന്നറിയിപ്പ് നൽകി.

Wildfire or arson? Evacuation orders lifted in Newfoundland