ടൊറന്റോ നഗരത്തിലെ മൂന്ന് ബൈക്ക് പാതകൾ നീക്കം ചെയ്യാനും പുതിയ ബൈക്ക് പാതകൾ സ്ഥാപിക്കുന്നത് പരിമിതപ്പെടുത്താനും ആവശ്യപ്പെട്ടുകൊണ്ടുള്ള പ്രവിശ്യാ നിയമം ഒന്റാറിയോ കോടതി ഈ ആഴ്ച റദ്ദാക്കി. ഈ നിയമത്തിനെതിരെ സൈക്കിൾ അഡ്വക്കസി ഗ്രൂപ്പായ സൈക്കിൾ ടൊറന്റോയും മറ്റ് രണ്ട് വ്യക്തികളും കോടതിയെ സമീപിച്ചിരുന്നു. ഈ വിധി അവർക്ക് വലിയ വിജയം സമ്മാനിച്ചു. ‘ഗ്രിഡ്ലോക്ക് കുറയ്ക്കുന്നതിനും നിങ്ങളുടെ സമയം ലാഭിക്കുന്നതിനുമുള്ള നിയമം’ (Reducing Gridlock, Saving You Time Act) എന്ന ബിൽ 212 കഴിഞ്ഞ ഒക്ടോബറിലാണ് അവതരിപ്പിച്ചത്.
നഗരത്തിലെ ബ്ലൂർ സ്ട്രീറ്റ്, യോംഗ് സ്ട്രീറ്റ്, യൂണിവേഴ്സിറ്റി അവന്യൂ എന്നിവിടങ്ങളിലെ ബൈക്ക് പാതകൾ നീക്കം ചെയ്യണമെന്ന് ഈ നിയമം ആവശ്യപ്പെട്ടിരുന്നു. ബൈക്ക് പാതകൾ നീക്കം ചെയ്യുന്നത് ആളുകളുടെ ജീവനും സുരക്ഷയ്ക്കും ഭീഷണിയാണെന്ന് കോടതി കണ്ടെത്തി. കനേഡിയൻ ചാർട്ടർ ഓഫ് റൈറ്റ്സ് ആൻഡ് ഫ്രീഡംസിൻ്റെ ലംഘനമാണിതെന്നും കോടതി വിലയിരുത്തി. ഈ തീരുമാനത്തെ സാധൂകരിക്കുന്ന തെളിവുകൾ ഹാജരാക്കുന്നതിൽ സർക്കാർ പരാജയപ്പെട്ടുവെന്നും കോടതി ചൂണ്ടിക്കാട്ടി.
വിധി പുറത്തുവന്നതിന് ശേഷം അപ്പീൽ നൽകുമെന്ന് സർക്കാർ അറിയിച്ചിട്ടുണ്ട്. എന്നാൽ, ആദ്യ കേസിൽ തെളിവുകൾ ഹാജരാക്കാൻ സാധിക്കാത്തതുകൊണ്ട് അപ്പീലിലും സർക്കാരിന് തിരിച്ചടിയുണ്ടാകാൻ സാധ്യതയുണ്ടെന്ന് നിയമ വിദഗ്ദ്ധർ പറയുന്നു. ബൈക്ക് പാതകൾക്ക് എതിരെയുള്ള തങ്ങളുടെ നിലപാട് പൊതുജനങ്ങളെ, പ്രത്യേകിച്ച് തങ്ങളുടെ വോട്ടർമാരെ ആകർഷിക്കാൻ സഹായിക്കുമെന്ന് സർക്കാർ വിശ്വസിക്കുന്നതായും രാഷ്ട്രീയ നിരീക്ഷകർ ചൂണ്ടിക്കാട്ടുന്നു. ഈ വിഷയം വീണ്ടും വാർത്താ തലക്കെട്ടുകളിലേക്ക് എത്തിക്കുന്നത് രാഷ്ട്രീയമായി തങ്ങൾക്ക് നേട്ടമുണ്ടാക്കുമെന്നും അവർ കണക്കുകൂട്ടുന്നു.
അപ്പീലിൽ പരാജയപ്പെട്ടാൽപോലും, ഭരണഘടനാപരമായ അവകാശങ്ങളെ അസാധുവാക്കാൻ സർക്കാരിന് ‘നോട്ട്വിത്സ്റ്റാൻഡിംഗ് ക്ലോസ്’ ഉപയോഗിക്കാമെന്ന് നിയമ വിദഗ്ധർ പറയുന്നു. എന്നാൽ ഈ അധികാരം ഉപയോഗിക്കുന്നതിൽ പൊതുജനാഭിപ്രായം ഒരു പ്രധാന ഘടകമായിരിക്കുമെന്ന് അവർ കൂട്ടിച്ചേർത്തു. അവകാശങ്ങൾ ലംഘിക്കുന്ന സർക്കാരുകളെ വോട്ടർമാർ ശിക്ഷിച്ചേക്കാമെന്നും രാഷ്ട്രീയ നിരീക്ഷകർ വിലയിരുത്തുന്നു.
