വാഹനത്തിൽ കുട്ടിയെ മറന്ന് വെച്ച സംഭവത്തിൽ പോലീസിനെ സഹായിക്കാൻ തയ്യാറാകാതിരുന്നതിന് പിന്നാലെ സുരക്ഷാ നയങ്ങൾ പരിഷ്കരിച്ച് ഊബർ കാനഡ. അടിയന്തര സാഹചര്യങ്ങളിൽ ഡ്രൈവർമാരുമായി ആശയവിനിമയം നടത്താൻ കസ്റ്റമർ സപ്പോർട്ട് ഏജന്റുമാർക്ക് അധികാരം നൽകി. കഴിഞ്ഞ മാർച്ചിൽ നോർത്ത് യോർക്കിൽ വെച്ചാണ് സംഭവം നടന്നത്. ഊബർ ടാക്സിയിൽ അഞ്ച് വയസ്സുകാരിയായ മകൾ ഉറങ്ങിപ്പോയതറിയാതെ അമ്മ ഇറങ്ങിയതിന് പിന്നാലെ ഡ്രൈവർ വാഹനം മുന്നോട്ടെടുത്തു.
തുടർന്ന് പോലീസിനെയും, ഊബർ അധികൃതരെയും വിവരം അറിയിച്ചെങ്കിലും ഡ്രൈവറുമായി ബന്ധപ്പെടാൻ ഊബർ അധികൃതർ വിസമ്മതിക്കുകയായിരുന്നു.സുരക്ഷാസംബന്ധമായ കാര്യങ്ങളിൽ പരിശീലനം ലഭിച്ച പോലീസ് ഉദ്യോഗസ്ഥർക്ക് മാത്രമേ ഡ്രൈവറുമായി ബന്ധപ്പെടാൻ അനുവാദമുള്ളൂ എന്നായിരുന്നു കമ്പനിയുടെ നിലപാട്. എന്നാൽ, ഒരു മണിക്കൂറിലധികം നീണ്ട തിരച്ചിലിന് ശേഷം ഊബറിന്റെ സഹായമില്ലാതെ തന്നെ പോലീസ് കുട്ടിയെ കണ്ടെത്തി. മാർച്ചിൽ നടന്ന ഈ സംഭവത്തിന് ശേഷം ആഭ്യന്തര അന്വേഷണം നടത്തിയ ഊബർ ഇപ്പോൾ തങ്ങളുടെ സുരക്ഷാ മാനദണ്ഡങ്ങളിൽ മാറ്റം വരുത്തിയിരിക്കുകയാണ്.
അടിയന്തര സാഹചര്യങ്ങളിൽ കസ്റ്റമർ സപ്പോർട്ട് ഏജന്റുമാർക്ക് ഡ്രൈവർമാരുമായി നേരിട്ട് ബന്ധപ്പെടാനും ആശയവിനിമയം നടത്താനും അനുമതി നൽകിക്കൊണ്ട് സുരക്ഷാ നയങ്ങൾ പരിഷ്കരിച്ചതായി ഊബർ കാനഡ വെള്ളിയാഴ്ച പ്രസ്താവനയിലൂടെ അറിയിച്ചു. ഈ സംഭവം പോലെയുള്ള പ്രത്യേക സാഹചര്യങ്ങളിൽ ഉപഭോക്താക്കളെ സഹായിക്കാൻ കസ്റ്റമർ സപ്പോർട്ട് ഏജന്റുമാർക്ക് അധികാരം നൽകുന്നതാണ് പുതിയ മാറ്റം. നയങ്ങളിലെ ഈ മാറ്റത്തിൽ സന്തോഷമുണ്ടെന്ന് കുട്ടിയുടെ അമ്മയായ ജൂലിയ വിസ്കോമി പ്രതികരിച്ചു. ടൊറന്റോ പോലീസ് ഉദ്യോഗസ്ഥരുമായി ഊബർ കാനഡ കൂടിക്കാഴ്ച നടത്തുകയും അടിയന്തര ഘട്ടങ്ങളിൽ തങ്ങളുടെ സുരക്ഷാ സംവിധാനങ്ങൾ എങ്ങനെ പ്രവർത്തിക്കുമെന്ന് വിശദീകരിക്കുകയും ചെയ്തിട്ടുണ്ട്.
Uber Canada rewrites safety policies, now lets drivers contact drivers directly in emergencies!
