കാനഡയുടെ കുടിവെള്ളത്തിൽ ‘ഫോർഎവർ കെമിക്കൽസ്’ ഭീഷണി: നീക്കം ചെയ്യുന്നതിൽ വെല്ലുവിളി

കാനഡയിലെ പല ജലവിതരണ യൂട്ടിലിറ്റികളെയും പോലെ, ഒന്റാറിയോയിലെ കിംഗ്‌സ്‌വില്ലിലുള്ള യൂണിയൻ വാട്ടർ സപ്ലൈയും അടുത്തിടെയാണ് ‘ഫോർഎവർ കെമിക്കൽസ്’ എന്നറിയപ്പെടുന്ന വിഷ സംയുക്തങ്ങൾ തങ്ങളുടെ ജലത്തിൽ പരിശോധിക്കാൻ തുടങ്ങിയത്. യൂണിയൻ വാട്ടർ സപ്ലൈയുടെ ജനറൽ മാനേജർ റോഡ്‌നി ബുച്ചാർഡ്, ഏകദേശം 70,000 ആളുകൾക്കും വടക്കേ അമേരിക്കയിലെ ഏറ്റവും വലിയ ഹരിതഗൃഹ കേന്ദ്രങ്ങൾക്കും നൽകുന്ന വെള്ളത്തിലെ ഈ രാസവസ്തുക്കളുടെ സാന്ദ്രത വിശകലനം ചെയ്യാൻ ഗവേഷകരുമായി സഹകരിച്ച് പ്രവർത്തിക്കുകയാണ്.

വാട്ടർപ്രൂഫ് വസ്ത്രങ്ങൾ മുതൽ മേക്കപ്പ്, സ്റ്റെയിൻപ്രൂഫ് കാർപ്പെറ്റുകൾ വരെ പല ഉൽപ്പന്നങ്ങളിലും ഉപയോഗിക്കുന്ന രാസവസ്തുക്കളാണ് PFAS അഥവാ ‘ഫോർഎവർ കെമിക്കൽസ്’. പതിനായിരത്തിലധികം വരുന്ന ഈ കൃത്രിമ സംയുക്തങ്ങൾ ദശാബ്ദങ്ങളായി നിരീക്ഷിക്കപ്പെടുകയോ നിയന്ത്രിക്കപ്പെടുകയോ ചെയ്യാതെ നഗര-വ്യാവസായിക മലിനജലം, മാലിന്യനിക്ഷേപ കേന്ദ്രങ്ങൾ, മലിനമായ പ്രദേശങ്ങൾ എന്നിവയിലൂടെ പരിസ്ഥിതിയിലേക്ക് വ്യാപിച്ചു. എന്നാൽ, ഗുരുതരമായ ആരോഗ്യപരമായ അപകടസാധ്യതകളെക്കുറിച്ചുള്ള തെളിവുകൾ വർദ്ധിക്കുന്നതോടെ സ്ഥിതി മാറുകയാണ്.
കാനഡ സർക്കാരും നിയന്ത്രണങ്ങൾ ശക്തമാക്കാൻ ഒരുങ്ങുന്നുണ്ട്. കുടിവെള്ളത്തിലെ PFAS അളവുകൾക്കായുള്ള ശുപാർശിത പരിധി ഗണ്യമായി കുറയ്ക്കുകയും, PFAS-നെ വിഷവസ്തുക്കളുടെ ഔദ്യോഗിക പട്ടികയിൽ ഉൾപ്പെടുത്താൻ പദ്ധതിയിടുകയും ചെയ്യുന്നുണ്ട്.

അതോടെ, ഈ രാസവസ്തുക്കൾ ശുദ്ധീകരിക്കാനും നീക്കം ചെയ്യാനുമുള്ള ഉത്തരവാദിത്തം മുനിസിപ്പൽ ജലവിതരണ കമ്പനികളുടെ മേലായി. തങ്ങളുടെ വെള്ളത്തിൽ ഈ രാസവസ്തുക്കൾ ഉണ്ടോ, എത്ര അളവിലുണ്ട്, അതുണ്ടെങ്കിൽ അവ നീക്കം ചെയ്യാൻ എന്ത് നവീകരണങ്ങൾ ആവശ്യമാണ് എന്നതിനെക്കുറിച്ച് രാജ്യത്തുടനീളമുള്ള ഓപ്പറേറ്റർമാർ അന്വേഷിച്ചുവരികയാണ്.

‘ഫോർഎവർ കെമിക്കൽസ്’ നൂറുകണക്കിന് വർഷങ്ങൾ എടുത്താണ് നശിക്കുന്നത് എന്നതിനാൽ, ശാസ്ത്രജ്ഞർക്ക് ഇന്നത്തെ വെള്ളത്തിലെ സാന്നിധ്യത്തെക്കുറിച്ച് മാത്രമല്ല, ഭാവിയിൽ ഈ രാസവസ്തുക്കൾ വർദ്ധിച്ചുകൊണ്ടിരിക്കുന്നതിനെക്കുറിച്ചും ആശങ്കയുണ്ട്. യൂണിയൻ വാട്ടർ സപ്ലൈ കഴിഞ്ഞ വർഷം നടത്തിയ സാമ്പിൾ പരിശോധനകളിൽ പുതിയ മാനദണ്ഡങ്ങൾക്കനുസരിച്ചുള്ള അളവിലാണ് (13 ng/l) PFAS കണ്ടെത്തിയത് എന്നത് ആശ്വാസം നൽകുന്ന കാര്യമാണ്. എന്നിരുന്നാലും, ഇത്തരം രാസവസ്തുക്കൾ എവിടെയെങ്കിലും ഉയർന്ന അളവിൽ കണ്ടെത്തുകയാണെങ്കിൽ, അവ നീക്കം ചെയ്യാനുള്ള ചെലവ് വളരെ കൂടുതലും പ്രയാസകരവുമാണ്.

സാധാരണ കുടിവെള്ള ശുദ്ധീകരണ പ്രക്രിയകൾക്ക് PFAS സംയുക്തങ്ങളെ ഫലപ്രദമായി നീക്കം ചെയ്യാൻ കഴിയില്ലെന്ന് പോളിടെക്‌നിക്ക് മോൺട്രിയൽ പ്രൊഫസറും എൻവയോൺമെന്റൽ എഞ്ചിനീയറുമായ സാറാ ഡോർണർ പറയുന്നു. ശരിയായ സാങ്കേതികവിദ്യ ഉപയോഗിച്ച് ശുദ്ധീകരണം സാധ്യമാണെങ്കിലും, മലിനീകരണം ആദ്യമേ തടയുന്നതാണ് ഏറ്റവും നല്ല സമീപനമെന്നും അവർ ചൂണ്ടിക്കാട്ടി. പല രാജ്യങ്ങളും PFAS-ന്റെ ഉപയോഗം നിയന്ത്രിക്കുകയും കുടിവെള്ളത്തിൽ ഇതിന്റെ പരിധി നിശ്ചയിക്കുകയും ചെയ്തുകൊണ്ട് ഇരുവശത്തുനിന്നും ഈ പ്രശ്നത്തെ നേരിടാൻ ശ്രമിക്കുന്നുണ്ട്.