കാനഡയിലെ നോവാ സ്കോഷ്യ, ന്യൂ ബ്രൺസ്വിക്ക് പ്രവിശ്യകളിൽ കനത്ത ഉഷ്ണതരംഗ മുന്നറിയിപ്പ് പുറപ്പെടുവിച്ചു. ഈ മാസം അവസാന ദിവസങ്ങളിൽ മാരിടൈംസ് മേഖലയിൽ ഉടനീളം വളരെ ഉയർന്ന ചൂടും ഈർപ്പവുമുള്ള കാലാവസ്ഥയായിരിക്കും അനുഭവപ്പെടുകയെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു.
നോവാ സ്കോഷ്യയിൽ, വടക്കൻ, മധ്യ ഭാഗങ്ങളിലും, അന്നാപോളിസ് വാലിയിലും, സൗത്ത് ഷോറിന്റെ ചില ഭാഗങ്ങളിലും ഉഷ്ണതരംഗ മുന്നറിയിപ്പുകൾ വ്യാപിപ്പിച്ചിട്ടുണ്ട്.
തിങ്കൾ മുതൽ ബുധൻ വരെ പകൽ താപനില 31 ഡിഗ്രി സെൽഷ്യസ് വരെ ഉയരാൻ സാധ്യതയുണ്ടെന്നും, എന്നാൽ ഹ്യുമിഡെക്സ് മൂല്യം 38 ഡിഗ്രി സെൽഷ്യസിനടുത്ത് അനുഭവപ്പെടുമെന്നും എൻവയോൺമെന്റ് കാനഡ മുന്നറിയിപ്പ് നൽകി. “വളരെ ചൂടും ഈർപ്പവുമുള്ള ഒരു വായുപ്രവാഹം അടുത്ത കുറച്ച് ദിവസത്തേക്ക് ഈ പ്രദേശത്ത് നിലനിൽക്കും. രാത്രികാല താപനിലയും ഉയർന്നു നിൽക്കുന്നതിനാൽ കാര്യമായ ആശ്വാസം പ്രതീക്ഷിക്കുന്നില്ല. വ്യാഴാഴ്ചയോടെ കാലാവസ്ഥ സാധാരണ നിലയിലേക്ക് എത്താൻ തുടങ്ങും എന്നും മുന്നറിയിപ്പിൽ പറയുന്നു.
ന്യൂ ബ്രൺസ്വിക്കിലും സമാനമായ സാഹചര്യമാണ്. എന്നിരുന്നാലും, ഒരു ശീതക്കാറ്റ് കടന്നുപോകുന്നതിനാൽ ബുധനാഴ്ചയോടെ ഇവിടെ കാലാവസ്ഥയിൽ മാറ്റം വരും. പ്രവിശ്യയുടെ മധ്യ, തെക്കുകിഴക്കൻ ഭാഗങ്ങളിൽ ഉഷ്ണതരംഗ മുന്നറിയിപ്പ് തുടരുകയാണ്. ഇവിടെ തിങ്കൾ, ചൊവ്വ ദിവസങ്ങളിൽ താപനില ഏകദേശം 30 ഡിഗ്രി സെൽഷ്യസായിരിക്കും, ഹ്യുമിഡെക്സ് മൂല്യം 36 ഡിഗ്രിയോളവും അനുഭവപ്പെടും.
പ്രിൻസ് എഡ്വേർഡ് ഐലൻഡിൽ (പി.ഇ.ഐ) നിലവിൽ ഉഷ്ണതരംഗ മുന്നറിയിപ്പുകളൊന്നും പുറപ്പെടുവിച്ചിട്ടില്ല. തിങ്കളാഴ്ച ഷാർലറ്റ്ടൗണിൽ 26 ഡിഗ്രി സെൽഷ്യസും ചൊവ്വാഴ്ച 28 ഡിഗ്രി സെൽഷ്യസും ആയിരിക്കും താപനില. അമിത ചൂടിൽ നിന്ന് സ്വയം എങ്ങനെ സംരക്ഷിക്കാമെന്നതിനെക്കുറിച്ചുള്ള വിവരങ്ങൾ ഓൺലൈനിൽ ലഭ്യമാണ്.
