കനേഡിയൻ കുടുംബങ്ങൾക്ക് സന്തോഷവാർത്ത! ചൈൽഡ് ബെനിഫിറ്റ് തുക വർദ്ധിപ്പിച്ചു, ഇന്ന് മുതൽ പുതിയ പേയ്മെന്റ്!

സാമ്പത്തിക ബുദ്ധിമുട്ട് നേരിടുന്ന കാനഡ കുടുംബങ്ങൾക്ക് ആശ്വാസം പകർന്നുകൊണ്ട് 2025-26 സാമ്പത്തിക വർഷത്തേക്കുള്ള കാനഡ ചൈൽഡ് ബെനിഫിറ്റ് (CCB) തുക വർദ്ധിപ്പിച്ചതായി ഫെഡറൽ സർക്കാർ ഔദ്യോഗികമായി പ്രഖ്യാപിച്ചു. ചൈൽഡ്രൻ ആൻഡ് യൂത്ത് സ്റ്റേറ്റ് സെക്രട്ടറി അന്ന ഗെയ്‌നി പീറ്റർബറോയിൽ നടത്തിയ പ്രഖ്യാപനപ്രകാരം, പണപ്പെരുപ്പത്തോടനുസരിച്ച് വർദ്ധിപ്പിച്ച പുതിയ നിരക്കിൽ ആറ് വയസ്സിൽ താഴെയുള്ള ഓരോ കുട്ടിക്കും പരമാവധി 7,997 ഡോളർ വരെയും, ആറ് മുതൽ 17 വയസ്സ് വരെയുള്ള ഓരോ കുട്ടിക്കും 6,748 ഡോളർ വരെയും വർഷത്തിൽ ലഭിക്കും. വാരാന്ത്യം കാരണം സാധാരണ 20-ാം തീയതിക്ക് പകരം ഇന്ന് (ജൂലൈ 18) പുതിയ നിരക്കിലുള്ള ആദ്യ പേയ്‌മെന്റ് വിതരണം ചെയ്യും.

കഴിഞ്ഞ വർഷത്തെ അപേക്ഷിച്ച് ഏകദേശം 200 ഡോളറിന്റെ വർദ്ധനവാണ് ഈ വർഷം ഉണ്ടായിരിക്കുന്നത്. 2018 മുതൽ പണപ്പെരുപ്പത്തോടനുസരിച്ച് എല്ലാ വർഷവും CCB തുക വർദ്ധിപ്പിക്കുന്നതിനാൽ, ജീവിതച്ചെലവ് വർദ്ധനവിന് ആനുപാતികമായ ആശ്വാസം കുടുംബങ്ങൾക്ക് ലഭിക്കുന്നുണ്ട്. പലചരക്ക് സാധനങ്ങൾ, വസ്ത്രങ്ങൾ, കുട്ടികളുടെ പരിചരണം പോലുള്ള ദൈനംദിന ചെലവുകൾക്ക് ഈ തുക മാതാപിതാക്കളെ സഹായിക്കുമെന്ന് സർക്കാർ വ്യക്തമാക്കി. വാർഷിക 26 ബില്യൺ ഡോളറിലധികം നൽകുന്ന ഈ പദ്ധതി വഴി ഏകദേശം 3.5 മില്യൺ കുടുംബങ്ങൾക്കും 6 മില്യൺ കുട്ടികൾക്കും പ്രയോജനം ലഭിക്കുന്നുണ്ട്.

ഈ മാസം 1,800 ഡോളറിന്റെ “ഒറ്റത്തവണ ബോണസ്” നൽകുന്നതായി വിവിധ സോഷ്യൽ മീഡിയ അവകാശവാദങ്ങൾ ഉണ്ടായിട്ടുണ്ടെങ്കിലും, അത്തരം പേയ്‌മെന്റുകൾ ഒരു ഔദ്യോഗിക ഫെഡറൽ ഉറവിടവും സ്ഥിരീകരിക്കുകയോ പ്രഖ്യാപിക്കുകയോ ചെയ്തിട്ടില്ലെന്ന് കാനഡ റവന്യൂ ഏജൻസി വ്യക്തമാക്കി. CCB പേയ്‌മെന്റുകൾ നികുതിരഹിതമാണെന്നും ടാക്സ് റിട്ടേണുകളിൽ റിപ്പോർട്ട് ചെയ്യുന്ന അറ്റ വരുമാനത്തെ അടിസ്ഥാനമാക്കി വർഷം തോറും കണക്കാക്കുന്നതാണെന്നും കുടുംബങ്ങളെ ഓർമ്മിപ്പിച്ചു. ശരിയായ തുക ലഭിക്കുന്നത് തുടരാൻ, മാതാപിതാക്കൾ അവരുടെ 2024 ടാക്സ് ഫയലിംഗ് പൂർത്തിയാക്കിയിട്ടുണ്ടെന്നും CRA-യിലുള്ള അവരുടെ വിവരങ്ങൾ അപ്‌ഡേറ്റ് ചെയ്തിട്ടുണ്ടെന്നും ഉറപ്പാക്കണം.

ന്നു.കാനഡ ചൈൽഡ് ബെനിഫിറ്റ് കൂടാതെ, കുടുംബങ്ങളുടെ സാമ്പത്തിക പ്രശ്‌നങ്ങൾ കുറയ്ക്കാനും മെച്ചപ്പെട്ട ജീവിതം നൽകാനും കനേഡിയൻ സർക്കാർ മറ്റ് വിപുലമായ പദ്ധതികളും നടപ്പാക്കുന്നുണ്ട്. അഞ്ച് വർഷത്തിനുള്ളിൽ ഒരു ബില്യൺ ഡോളർ നിക്ഷേപിക്കുന്ന ദേശീയ സ്കൂൾ ഫുഡ് പ്രോഗ്രാം വഴി, കാനഡയിലെ കുട്ടികൾക്ക് പോഷകസമൃദ്ധമായ ഭക്ഷണം കൂടുതൽ എളുപ്പത്തിൽ ലഭ്യമാക്കും. കൂടാതെ, കനേഡിയൻ ഡെന്റൽ കെയർ പ്ലാൻ വഴി അർഹരായ കനേഡിയൻ പൗരന്മാർക്ക് പല്ലുകളുടെ ചികിത്സാ ചിലവ് കുറച്ച് ദന്ത സംരക്ഷണം എളുപ്പമാക്കുന്നുണ്ട്. അടുത്ത ഷെഡ്യൂൾ ചെയ്ത പേയ്‌മെന്റ് ഓഗസ്റ്റ് 20, 2025-നാണ് നിശ്ചയിച്ചിരിക്കുന്നത്.