കാനഡയിൽ ഈ വർഷം മീസിൽസ് രോഗികളുടെ എണ്ണം കൂടുന്നതിൽ എല്ലാവരും ആശങ്കയിലാണ്. പ്രധാനമായും ഒന്റാറിയോയിൽ 2,200-ൽ അധികം ആളുകൾക്ക് അഞ്ചാംപനി പിടിപെട്ടു. ഇതിൽ നൂറുകണക്കിന് പേരാണ് ആശുപത്രിയിൽ ചികിത്സ തേടിയെത്തിയത്. അതിൽ ഒരാൾ മരിക്കുകയും ചെയ്തു. എന്നാൽ, ഇപ്പോൾ ഒന്റാറിയോയിൽ രോഗവ്യാപനം കുറയുന്നതായാണ് കാണുന്നത്, ഇത് ഒരു ആശ്വാസ വാർത്തയാണ്. എന്നാൽ, നിലവിൽ ആൽബെർട്ടയിലാണ് മീസിൽസ് കേസുകൾ കുത്തനെ കൂടുന്നത്. ഇത് അവിടത്തെ ആരോഗ്യവകുപ്പിന് ഒരു വെല്ലുവിളിയായി മാറിയിട്ടുണ്ട്. ഈ സാഹചര്യം കണക്കിലെടുത്ത് എല്ലാവരും ജാഗ്രത പാലിക്കേണ്ടതും പ്രതിരോധ കുത്തിവെപ്പുകൾ എടുക്കേണ്ടതും അത്യാവശ്യമാണെന്ന് അധികൃതർ പറയുന്നു.
ഇതുവരെ 1,300-ൽ അധികം കേസുകൾ അവിടെ സ്ഥിരീകരിച്ചിട്ടുണ്ട്. ന്യൂഫൗണ്ട്ലാൻഡും ലാബ്രഡോറും ഒഴികെ കാനഡയിലെ എല്ലാ പ്രവിശ്യകളിലും മീസിൽസ് കേസുകൾ റിപ്പോർട്ട് ചെയ്യപ്പെട്ടിട്ടുണ്ട്. ഈ സാഹചര്യത്തിൽ, രോഗത്തെക്കുറിച്ചുള്ള പൊതുജനങ്ങളുടെ സംശയങ്ങൾക്ക് കാനഡയുടെ പബ്ലിക് ഹെൽത്ത് ഏജൻസി (PHAC) വിശദീകരണം നൽകി.
കുഞ്ഞായിരിക്കുമ്പോൾ മീസിൽസ് വന്നവർക്ക് വീണ്ടും രോഗം വരുമോ എന്ന ചോദ്യത്തിന്, പൊതുവായി അങ്ങനെയുണ്ടാകാറില്ലെന്നാണ് PHAC വ്യക്തമാക്കുന്നത്. ഒരിക്കൽ മീസിൽസ് വന്നവർക്ക് സാധാരണയായി ആജീവനാന്ത പ്രതിരോധശേഷി ലഭിക്കാറുണ്ട്.
വാക്സിനേഷൻ രേഖകൾ നഷ്ടപ്പെട്ടവർക്ക് എന്തുചെയ്യണം എന്നതിനെക്കുറിച്ചും നിർദ്ദേശങ്ങളുണ്ട്. വാക്സിനേഷൻ വിവരങ്ങൾ രേഖപ്പെടുത്താത്ത കുട്ടികളും മുതിർന്നവരും അവരുടെ പ്രായവും നിലവിലെ രോഗസാധ്യതയും കണക്കിലെടുത്ത് വാക്സിൻ വീണ്ടും എടുക്കാൻ PHAC ശുപാർശ ചെയ്യുന്നു. ഒന്നിലധികം ഡോസുകൾ സ്വീകരിക്കുന്നത് സുരക്ഷിതമാണെന്നും, അധിക ഡോസുകൾ ഗുരുതരമായ ആരോഗ്യപ്രശ്നങ്ങൾക്ക് കാരണമാകില്ലെന്നും വിദഗ്ദ്ധർ ചൂണ്ടിക്കാട്ടുന്നു. രാജ്യവ്യാപകമായ ഒരു വാക്സിൻ രജിസ്റ്റർ സംവിധാനത്തിന്റെ പ്രാധാന്യം മാക്മാസ്റ്റർ സർവകലാശാലയിലെ ഇമ്മ്യൂണോളജി പ്രൊഫസറായ ഡോൺ ബൗഡിഷ് ഊന്നിപ്പറഞ്ഞു. പലർക്കും രണ്ട് ഡോസ് വാക്സിൻ ലഭിച്ചിട്ടുണ്ടോ ഇല്ലയോ എന്ന കാര്യത്തിൽ വ്യക്തതയില്ലാത്ത സാഹചര്യത്തിൽ, കൃത്യമായ രജിസ്ട്രേഷൻ സംവിധാനം അത്യന്താപേക്ഷിതമാണെന്ന് അവർ കൂട്ടിച്ചേർത്തു.
മീസിൽസിനുള്ള പ്രതിരോധശേഷി പരിശോധിക്കാമോ എന്ന ചോദ്യത്തിന്, സാധാരണഗതിയിൽ ഇത് പൊതുജനങ്ങൾക്ക് ശുപാർശ ചെയ്യുന്നില്ലെന്നാണ് PHAC അറിയിക്കുന്നത്. എന്നിരുന്നാലും, ആരോഗ്യപ്രവർത്തകർ, ഗർഭിണികൾ തുടങ്ങിയ ചില പ്രത്യേക വിഭാഗക്കാർക്ക് രക്തപരിശോധനയിലൂടെ ആന്റിബോഡി സാന്നിധ്യം പരിശോധിക്കാറുണ്ട്. 1970-ന് മുമ്പ് ജനിച്ചവരോ, അല്ലെങ്കിൽ രണ്ട് ഡോസ് വാക്സിൻ കൃത്യമായി സ്വീകരിച്ചവരോ രോഗബാധയിൽ നിന്ന് സുരക്ഷിതരായിരിക്കുമെന്നാണ് പൊതുവായ വിലയിരുത്തൽ. കാനഡയിലേക്ക് പ്രവേശിക്കുന്നവരിൽ നിന്ന് മീസിൽസിനുള്ള വാക്സിനേഷൻ രേഖകൾ നിലവിൽ നിർബന്ധമാക്കിയിട്ടില്ലെന്നും PHAC വ്യക്തമാക്കി.
സ്ഥിരം താമസക്കാർക്കും ചില താൽക്കാലിക താമസക്കാർക്കും ഇമിഗ്രേഷൻ മെഡിക്കൽ പരിശോധന നിർബന്ധമാണെന്ന് ഇമിഗ്രേഷൻ, റെഫ്യൂജീസ് ആൻഡ് സിറ്റിസൺഷിപ്പ് കാനഡ (IRCC) അറിയിച്ചു. ഈ പരിശോധനയുടെ ഭാഗമായി ചിലർക്ക് MMR (Measles, Mumps, Rubella) വാക്സിൻ നൽകാറുണ്ട്. കുടിയേറ്റക്കാരും അഭയാർത്ഥികളും മുൻപ് വാക്സിൻ ലഭിക്കാത്ത സാഹചര്യങ്ങളിൽ അത് സ്വീകരിക്കാൻ മടി കാണിക്കാറില്ലെന്ന് ആരോഗ്യപ്രവർത്തകർ പറയുന്നു. എന്നിരുന്നാലും, വിദേശ യാത്രകൾക്ക് മുമ്പുള്ള വാക്സിനേഷൻ സംവിധാനങ്ങൾ കൂടുതൽ മെച്ചപ്പെടുത്തുന്നതിനും, ആശുപത്രികളിൽ അന്താരാഷ്ട്ര വാക്സിൻ രേഖകൾ എളുപ്പത്തിൽ ലഭ്യമാക്കുന്നതിനും ഫെഡറൽ സർക്കാർ കൂടുതൽ ശ്രദ്ധ നൽകേണ്ടതുണ്ടെന്നും നിർദ്ദേശങ്ങൾ ഉയർന്നിട്ടുണ്ട്.
