ഒട്ടാവയിൽ വിവിധയിടങ്ങളിൽ ഇന്ന് ഉച്ചയോടെ കനത്ത ഇടിമിന്നലിനും കൊടുംങ്കാറ്റിനും സാധ്യതയെന്ന് എൻവയോൺമെന്റ് കാനഡ. ആലിപ്പഴ വീഴ്ചയ്ക്കും കനത്ത മഴയ്ക്കും സാധ്യതയുണ്ടെന്നും മുന്നറിയിപ്പുണ്ട്. ഒട്ടാവ നോർത്ത്, കനാറ്റ, ഓർലിയാൻസിൽ എന്നിവിടങ്ങളിലാണ് പ്രധാനമായും ജാഗ്രതാ നിർദേശമുള്ളത്. കിഴക്കൻ ഒന്റാരിയോയിൽ മണിക്കൂറിൽ 100 കിലോമീറ്റർ വേഗത്തിൽ കാറ്റ് വീശാനും കനത്ത ആലിപ്പഴ വീഴ്ചയ്ക്കും സാധ്യതയുണ്ട്. ഇന്ന് രാവിലെ 99 ശതമാനം വരെ ഈർപ്പം കൂടിയിട്ടുണ്ട്.
മുന്നറിയിപ്പ് നിലനിൽക്കുന്ന പ്രദേശങ്ങളിലെ ജനങ്ങൾ അസ്ഥിരകാലാവസ്ഥ ഉണ്ടായാൽ ബേസ്മെന്റിലോ ഉൾഭാഗത്തെ മുറിയിലോ അഭയം തേടണമെന്ന് അധികൃതർ മുന്നറിയിപ്പ് നൽകിയിട്ടുണ്ട്. അതേസമയം, കൊടുങ്കാറ്റും മഴയും ഉണ്ടായാലും ചൂടിൽ നിന്ന് ആശ്വാസമുണ്ടാകില്ലെന്ന് എൻവയോൺമെന്റ് കാനഡ പറയുന്നു. തിങ്കളാഴ്ച ചെറിയ ആശ്വാസം ലഭിക്കാമെങ്കിലും പിന്നീട് ചൂട് പഴയപടി തുടരും. ചൊവ്വാഴ്ചയോടെ ചൂടും ഈർപ്പവും നിറഞ്ഞ കാലാവസ്ഥ തിരിച്ചെത്തും. പകൽ സമയത്തെ ഉയർന്ന താപനില 29 മുതൽ 32 ഡിഗ്രി സെൽഷ്യസ് വരെ എത്തിയേക്കാം.
ഹ്യുമിഡെക്സ് 40 വരെയെത്തും. രാത്രിയിലെ താപനില 20 ഡിഗ്രിയിൽ താഴെയായി തുടരും.
