കാനഡയിൽ അഞ്ചാംപനി കേസുകൾ ക്രമാതീതമായി വർദ്ധിച്ചുകൊണ്ടിരിക്കുകയാണ്. രാജ്യത്തുടനീളം ഇതിനോടകം 3,700-ൽ അധികം കേസുകൾ സ്ഥിരീകരിച്ചു കഴിഞ്ഞു. വസന്തകാലത്ത് ഒന്റാരിയോയിൽ 2,200-ൽ അധികം കേസുകളും ഒരു മരണവും റിപ്പോർട്ട് ചെയ്യപ്പെട്ടപ്പോൾ, നിലവിൽ ആൽബർട്ടയിൽ ഏകദേശം 1,300 കേസുകളുമായി രോഗവ്യാപനം അതിരൂക്ഷമാണ്. ന്യൂഫൗണ്ട്ലാൻഡ് ആൻഡ് ലാബ്രഡോർ ഒഴികെയുള്ള എല്ലാ പ്രവിശ്യകളിലും അഞ്ചാംപനി റിപ്പോർട്ട് ചെയ്യപ്പെട്ടിട്ടുണ്ട്. ഈ സാഹചര്യം കാനഡയിലെ പൊതുജനാരോഗ്യത്തിന് ഗുരുതരമായ വെല്ലുവിളിയായി മാറിയിരിക്കുകയാണ്.
അഞ്ചാംപനി ഒരു വ്യക്തിക്ക് മുൻപ് ബാധിച്ചിട്ടുണ്ടെങ്കിൽ അവർക്ക് സാധാരണയായി ആജീവനാന്ത പ്രതിരോധശേഷി ലഭിക്കുമെന്നാണ് കാനഡയുടെ പൊതു ജനാരോഗ്യ ഏജൻസി (PHAC) വ്യക്തമാക്കുന്നത്. എന്നാൽ, വാക്സിനേഷൻ രേഖകൾ നഷ്ടപ്പെട്ടവർ വീണ്ടും വാക്സിൻ എടുക്കാൻ PHAC നിർദ്ദേശിക്കുന്നു. അധിക ഡോസുകൾ സ്വീകരിക്കുന്നത് സുരക്ഷിതമാണെന്നും ദോഷകരമായ പാർശ്വ ഫലങ്ങളൊന്നും ഉണ്ടാകില്ലെന്നും അധികൃതർ ഉറപ്പു നൽകുന്നു. പൊതു ജനങ്ങൾക്ക് സാധാരണയായി പ്രതിരോധശേഷി പരിശോധിക്കേണ്ടതില്ലെങ്കിലും, ആരോഗ്യ പ്രവർത്തകർക്കും ചില ഗർഭിണികൾക്കും രക്ത പരിശോധനയിലൂടെ അഞ്ചാംപനി ആന്റിബോഡികൾ പരിശോധിക്കാവുന്നതാണ്. 1970-ന് മുൻപ് ജനിച്ചവർക്ക് വാക്സിൻ നിലവിൽ വരുന്നതിന് മുൻപ് അഞ്ചാംപനി വ്യാപകമായിരുന്നതിനാൽ സ്വാഭാവിക പ്രതിരോധശേഷി ലഭിച്ചിട്ടുണ്ടെന്ന് കരുതപ്പെടുന്നു.
കാനഡയിലേക്ക് പ്രവേശിക്കുന്നവർക്ക് അഞ്ചാംപനിക്കെതിരായ വാക്സിനേഷൻ തെളിവ് നിർബന്ധമാക്കിയിട്ടില്ല. ചില പുതിയ കുടിയേറ്റക്കാർക്ക് മെഡിക്കൽ പരിശോധനകളിൽ വാക്സിനേഷൻ ഉൾപ്പെടുത്താറുണ്ടെങ്കിലും, രാജ്യത്തേക്ക് വരുന്നവർക്ക് വാക്സിനേഷൻ ഉറപ്പാക്കുന്നതിനും അന്താരാഷ്ട്ര വാക്സിനേഷൻ രേഖകൾ ലഭ്യമാക്കുന്നതിനും കൂടുതൽ നടപടികൾ ആവശ്യമാണെന്ന് വിദഗ്ദ്ധർ ചൂണ്ടിക്കാട്ടുന്നു. വിവിധ പ്രവിശ്യകളിലേക്ക് താമസം മാറിയവർക്കും രേഖകൾ നഷ്ടപ്പെട്ടവർക്കും വാക്സിനേഷൻ വിവരങ്ങൾ എളുപ്പത്തിൽ ലഭ്യമാക്കാൻ ഒരു ദേശീയ വാക്സിൻ രജിസ്ട്രി അനിവാര്യമാണെന്നും അവർ അഭിപ്രായപ്പെടുന്നു.
അഞ്ചാംപനി, മുണ്ടിനീര്, റുബെല്ല (MMR) വാക്സിൻ കൃത്യസമയത്ത് എടുക്കേണ്ടതിന്റെ പ്രാധാന്യം ആരോഗ്യ ഉദ്യോഗസ്ഥർ ഊന്നിപ്പറയുന്നു. രണ്ട് ഡോസ് വാക്സിൻ ഏകദേശം 100% ദീർഘകാല സംരക്ഷണം നൽകുമെന്നാണ് റിപ്പോർട്ടുകൾ. ഈ രോഗവ്യാപനത്തെ നിയന്ത്രിക്കുന്നതിനും പൊതുജനാരോഗ്യം സംരക്ഷിക്കുന്നതിനും കൃത്യമായ വാക്സിനേഷൻ രീതികൾ പാലിക്കേണ്ടത് അത്യാവശ്യമാണ്.
