കാനഡയുടെ ടെക് വ്യവസായം സ്വദേശീയമായി വളർത്തണമെന്ന ആവശ്യം ശക്തമാകുന്നതിനിടെ, രാജ്യത്ത് മികച്ച പ്രതിഭകളെ ആകർഷിക്കാനും നിലനിർത്താനും വലിയ സാധ്യതകളുണ്ടെന്ന് വ്യവസായ നേതാക്കൾ ചൂണ്ടിക്കാട്ടി. കിച്ചനറിൽ ആസ്ഥാനമായുള്ള ടെക് ഹബ്ബായ കമ്മ്യൂണിടെക്കിന്റെ സിഇഒ ഷെൽഡൻ മക്കോർമിക് പറയുന്നത്, നിർമ്മിത ബുദ്ധി (എഐ), ഹെൽത്ത് ടെക് തുടങ്ങിയ മേഖലകളിൽ കാനഡക്ക് സ്വന്തമായി കണ്ടുപിടിത്തങ്ങൾ നടത്താനും അവയെ രാജ്യത്ത് നിലനിർത്താനും സമയം അതിക്രമിച്ചു എന്നാണ്. എന്നാൽ ഇതിന് ആവശ്യമായത് ഡാറ്റയും ബൗദ്ധിക സ്വത്തവകാശവും സംരക്ഷിക്കുകയും, ആവശ്യമായ പ്രതിഭകളെ രാജ്യത്ത് തന്നെ പിടിച്ചുനിർത്തുകയും ചെയ്യേണ്ടതാണെന്നും അദ്ദേഹം കൂട്ടിച്ചേർത്തു.
മികച്ച ശമ്പളം, സർക്കാരിന്റെ പിന്തുണയുടെ കുറവ്, ഉയർന്ന ജീവിതച്ചെലവ് എന്നിവയാണ് പ്രതിഭകളെ നിലനിർത്തുന്നതിലെ പ്രധാന വെല്ലുവിളികൾ. കൗൺസിൽ ഓഫ് കനേഡിയൻ ഇന്നൊവേറ്റേഴ്സിന്റെ പ്രസിഡൻ്റായ ബെഞ്ചമിൻ ബർഗൻ ചൂണ്ടിക്കാണിക്കുന്നത്, ഡൊണാൾഡ് ട്രംപ് പ്രസിഡൻ്റായിരുന്ന കാലത്ത് കുറച്ച് യു.എസ്. ടെക് പ്രതിഭകൾ കാനഡയിലേക്ക് വന്നെങ്കിലും ഇപ്പോൾ ആ പ്രവണത കുറഞ്ഞു എന്നാണ്. എന്നാൽ, മാഴ്സ് ഡിസ്കവറി ഡിസ്ട്രിക്റ്റ് സിഇഒ ഗ്രേസ് ലീ റെയ്നൾഡ്സ് പറയുന്നത്, യു.എസിൽ നിന്ന് കാനഡയിലേക്ക് മാറാൻ ആഗ്രഹിക്കുന്ന ടെക് പ്രൊഫഷണലുകളുടെ വിവരങ്ങൾ തനിക്ക് കൂടുതൽ ലഭിക്കുന്നുണ്ട് എന്നാണ്.
“യു.എസ്. ടെക് വ്യവസായം വളർന്നതിൽ ഒരു പ്രധാന ഘടകമാണ് ഫെഡറൽ സർക്കാർ അവിടുത്തെ കമ്പനികളിൽ നിന്ന് ഉൽപ്പന്നങ്ങൾ വാങ്ങിയതും ഇപ്പോഴും അത് തുടരുന്നതും,” ബർഗൻ പറയുന്നു. കാനഡയിൽ തദ്ദേശീയ ഉൽപ്പന്നങ്ങൾ വാങ്ങുന്നതിൽ കുറവായതിനാൽ കമ്പനികൾക്ക് വളരാൻ ഇടമില്ലെന്നും അദ്ദേഹം അഭിപ്രായപ്പെട്ടു. എന്നാൽ, ഡിസ്റപ്ഷൻ വെഞ്ചേഴ്സ് സ്ഥാപകയായ എലൈൻ കുണ്ടയുടെ അഭിപ്രായത്തിൽ, സർക്കാർ നിക്ഷേപം മാത്രം ഈ പ്രശ്നത്തിനുള്ള പരിഹാരമാകില്ല. “മറ്റ് മാർഗങ്ങൾ ഇല്ലെങ്കിൽ അത് സർക്കാർ ആശ്രിതത്വം വർദ്ധിപ്പിക്കുമെന്ന് അവർ പറഞ്ഞു. അതിനുപകരം, ബിസിനസ് ടാക്സ് ക്രെഡിറ്റുകൾ വഴി ആളുകൾക്ക് കൂടുതൽ റിസ്ക് എടുക്കാൻ പ്രോത്സാഹനം നൽകുന്നത് മികച്ച മാർഗമായിരിക്കും.
കാനഡയിൽ സ്റ്റാർട്ടപ്പുകൾക്ക് ആവശ്യമായ പ്രാരംഭ നിക്ഷേപം ലഭിക്കുന്നില്ലെന്ന് ഗ്രേസ് ലീ റെയ്നൾഡ്സ് അഭിപ്രായപ്പെടുന്നു. അമേരിക്കൻ കമ്പനികൾക്ക് ഫണ്ടും വാങ്ങുന്നവരെയും വളരെ എളുപ്പത്തിൽ ലഭിക്കുന്നുണ്ട്. പ്രതിഭകളെ രാജ്യത്ത് നിലനിർത്തേണ്ടതിന്റെ പ്രാധാന്യം ബിൽഡ് കാനഡ സിഇഒ ലൂസി ഹാർഗ്രീവ്സ് ഊന്നിപ്പറഞ്ഞു. “നാം ഏറ്റവും ആദ്യം ചെയ്യേണ്ടത്, ഇപ്പോഴുള്ള പ്രതിഭകളെ വിട്ടുപോകാതെ ഉറപ്പ് വരുത്തുന്നതാണ്. വാട്ടർലൂ പോലുള്ള സർവകലാശാലകളിൽ നിന്നുള്ള ലോകപ്രശസ്തരായ ബിരുദധാരികളിൽ പലരും മറ്റ് രാജ്യങ്ങളിലേക്ക് പോകുകയാണ്,” അവർ പറഞ്ഞു. യു.എസ്. ടെക് തൊഴിലാളികളുടെ ശരാശരി ശമ്പളം $122,604 ആയിരിക്കുമ്പോൾ, കാനഡയിൽ ഇത് $83,698 മാത്രമാണ്. ഏകദേശം 46% വ്യത്യാസമാണ് ഇവിടെയുള്ളത്. കാനഡയിൽ ജീവിതച്ചെലവ് കുറവല്ലെന്നും, മികച്ച യു.എസ്. എക്സിക്യൂട്ടീവുകളെ ആകർഷിക്കാൻ ശ്രമിക്കുമ്പോൾ ശമ്പള വ്യത്യാസം വലിയ പ്രതിബന്ധമാകുന്നുവെന്നും ബർഗൻ ചൂണ്ടിക്കാട്ടി.
സ്റ്റാർട്ടപ്പുകൾക്ക് പ്രാരംഭ നിക്ഷേപം അനുവദിക്കാൻ സർക്കാരും വ്യവസായവും ഒരുമിച്ച് പ്രവർത്തിക്കണം. പ്രതിഭകളെ ആകർഷിക്കാൻ ടാക്സ് ഇൻസെന്റീവുകൾ നൽകണം. ശമ്പളം വർദ്ധിപ്പിച്ച് മത്സരക്ഷമത കൂട്ടണം. തദ്ദേശീയ ഉൽപ്പന്നങ്ങളെ സർക്കാർ പ്രോത്സാഹിപ്പിക്കണം. കാനഡയിലെ ടെക് മേഖലക്ക് വലിയ വളർച്ചാ ശേഷിയുണ്ടെന്ന് വ്യക്തമാണ്. എന്നാൽ വിദേശ രാജ്യങ്ങളിലേക്ക് പ്രതിഭകൾ കുടിയേറുന്നത് തടയാനും, ടെക് സംരംഭങ്ങൾക്ക് വളരാൻ ആവശ്യമായ സാമ്പത്തിക പിന്തുണയും മറ്റ് പ്രോത്സാഹനങ്ങളും ഉറപ്പാക്കാനുമുള്ള നയപരമായ ഇടപെടലുകളാണ് ഇപ്പോൾ ഏറ്റവും അത്യാവശ്യം.
