ഈ സപ്ലിമെന്റുകൾ ഉപയോ​ഗിക്കരുതേ! കാത്തിരിക്കുന്നത് ​ഗുരുതര ആരോ​ഗ്യപ്രശ്നങ്ങൾ; ഹെൽത്ത് കാനഡയുടെ മുന്നറിയിപ്പ്

മൂഡ് സ്വിംഗ്സ് , സ്ട്രെസ് എന്നിവയ്ക്കുള്ള ചിലതരം ഹോർമോൺ സപ്ലിമെന്റുകൾ ഉണ്ടാക്കാൻ സാധ്യതയുള്ള ഗുരുതരമായ ആരോഗ്യപ്രശ്‌നങ്ങളെക്കുറിച്ച് മുന്നറിയിപ്പുമായി ഹെൽത്ത് കാനഡ. “നാട്രോൾ ഡിഎച്ച്ഇഎ മൂഡ് & സ്ട്രെസ്” (Natrol DHEA Mood & Stress) പോലുള്ളവ, ഗുരുതരമായ ആരോഗ്യപ്രശ്‌നങ്ങൾ ഉണ്ടാക്കാൻ സാധ്യതയുണ്ടെന്നാണ് മുന്നറിയിപ്പിൽ പറയുന്നത്.മഇത്തരം അംഗീകാരമില്ലാത്ത ഉൽപ്പന്നങ്ങൾക്കെതിരെ ഉപഭോക്താക്കൾ അതീവ ജാഗ്രത പുലർത്തണമെന്നും അധികൃതർ വ്യക്തമാക്കി.

DHEA ശരീരത്തിൽ പുരുഷ, സ്ത്രീ ഹോർമോണുകളുടെ അളവ് അസാധാരണമായി വർദ്ധിപ്പിക്കാൻ സാധ്യതയുണ്ടെന്ന് ഹെൽത്ത് കാനഡ ചൂണ്ടിക്കാട്ടുന്നു. ഇത് വന്ധ്യത, മുഖക്കുരു, അസാധാരണമായ രോമവളർച്ച എന്നിവയ്ക്ക് കാരണമായേക്കാം. കൂടാതെ, പ്രോസ്റ്റേറ്റ്, സ്തനാർബുദം പോലുള്ള ജീവന് ഭീഷണിയായേക്കാവുന്ന അവസ്ഥകൾക്കും ഇത് വഴിവെച്ചേക്കാം. ഹൃദയമിടിപ്പ്, രക്തം കട്ടപിടിക്കൽ, കരൾ പ്രവർത്തനം എന്നിവയെ ബാധിക്കുന്ന പ്രശ്നങ്ങളുള്ളവർ, ഗർഭിണികൾ, മുലയൂട്ടുന്ന അമ്മമാർ എന്നിവർ DHEA പൂർണ്ണമായും ഒഴിവാക്കണമെന്ന് ഹെൽത്ത് കാനഡ നിർദ്ദേശിക്കുന്നു. ചില മാനസികാരോഗ്യ മരുന്നുകളുമായി ഇത് പ്രതിപ്രവർത്തിക്കാനും ചില മാനസികാരോഗ്യ പ്രശ്‌നങ്ങൾ രൂക്ഷമാക്കാനും മൂഡ് ഡിസോർഡറുകളുള്ളവരിൽ ഉന്മാദാവസ്ഥയ്ക്കുള്ള സാധ്യത വർദ്ധിപ്പിക്കാനും സാധ്യതയുണ്ട്.

മുന്നറിയിപ്പ് വന്നതോടെ റീട്ടെയിൽ റെവോൾട്ട് (Retail Revolt) ഈ സപ്ലിമെന്റുകളുടെ വിൽപ്പന നിർത്തിവെക്കുകയും സ്റ്റോക്ക് ഹെൽത്ത് കാനഡയ്ക്ക് കൈമാറുകയും ചെയ്തതായി അധികൃതർ അറിയിച്ചു. ഈ സപ്ലിമെന്റുകൾ വാങ്ങിയിട്ടുള്ളവർ ഉടനടി ഉപയോഗം നിർത്തിവെക്കാനും ആരോഗ്യപരമായ ആശങ്കകളുണ്ടെങ്കിൽ ഒരു ഡോക്ടറെ സമീപിക്കാനും ഹെൽത്ത് കാനഡ നിർദ്ദേശിക്കുന്നു. ഏതെങ്കിലും തരത്തിലുള്ള പാർശ്വഫലങ്ങൾ ഉണ്ടായാൽ ഉടനടി ഹെൽത്ത് കാനഡയെ അറിയിക്കണം. കൈവശമുള്ള ഉൽപ്പന്നങ്ങൾ സുരക്ഷിതമായി ഫാർമസിയിൽ തിരികെ നൽകാനും ഉപഭോക്താക്കളോട് ആവശ്യപ്പെട്ടിട്ടുണ്ട്.

അംഗീകാരമില്ലാത്ത ആരോഗ്യ ഉൽപ്പന്നങ്ങൾ വാങ്ങുന്നത് ഒഴിവാക്കാൻ, ഉൽപ്പന്ന ലേബലുകൾ പരിശോധിച്ച് അവയ്ക്ക് ഹെൽത്ത് കാനഡയുടെ അംഗീകാരമുണ്ടോയെന്ന് ഉറപ്പുവരുത്തണമെന്ന് മുന്നറിയിപ്പിൽ പറയുന്നു. അംഗീകൃത ആരോഗ്യ ഉൽപ്പന്നങ്ങളിൽ എട്ടക്ക ഡിജിറ്റൽ ഐഡന്റിഫിക്കേഷൻ നമ്പർ (DIN), നാച്ചുറൽ പ്രൊഡക്റ്റ് നമ്പർ (NPN) അല്ലെങ്കിൽ ഹോമിയോപതിക് ഡ്രഗ് നമ്പർ (DIN-HM) എന്നിവ ഉണ്ടാകും. ഹെൽത്ത് കാനഡയുടെ ഡ്രഗ് പ്രൊഡക്റ്റ് ഡാറ്റാബേസിലും ലൈസൻസുള്ള നാച്ചുറൽ ഹെൽത്ത് പ്രൊഡക്റ്റ് ഡാറ്റാബേസിലും ഉൽപ്പന്നങ്ങൾക്ക് അംഗീകാരമുണ്ടോയെന്ന് പരിശോധിക്കാവുന്നതാണ്.