ടെക്സസ് പ്രളയം: ഡസൻ കണക്കിന് ആളുകളെ കാണാതായി, മരണസംഖ്യ ഉയരുമെന്ന് സൂചന!

ടെക്സസ്: സെൻട്രൽ ടെക്സസിൽ ജീവന് ഭീഷണിയായ വെള്ളപ്പൊക്ക സാധ്യത ഇപ്പോഴും നിലനിൽക്കുന്നു. വേനൽക്കാല ക്യാമ്പുകളിലെ കുട്ടികൾ ഉൾപ്പെടെ 82 പേർക്ക് ജീവൻനഷ്ടമായെന്നാണ് റിപ്പോർട്ട്. വെള്ളപ്പൊക്കത്തെത്തുടർന്ന് കാണാതായവർക്കായി തിരച്ചിൽ തുടരുകയാണ്. മരണസംഖ്യ ഇനിയും ഉയരാൻ സാധ്യതയുണ്ട്. ഇന്നും കനത്ത മഴ തുടരുന്നതിനാൽ മധ്യ ടെക്സസിൽ ജീവൻ അപകടപ്പെടുത്തുന്ന തരത്തിലുള്ള വെള്ളപ്പൊക്ക സാധ്യത നിലനിൽക്കുന്നുണ്ട്. ആദ്യ 36 മണിക്കൂറിനുള്ളിൽ 850-ൽ അധികം ആളുകളെ രക്ഷപ്പെടുത്തിയതായി അധികൃതർ വ്യക്തമാക്കി.

പ്രളയത്തിൽ വീടുകൾ തകരുകയും ചെളിയിൽ മുങ്ങുകയും ചെയ്ത കെർ കൗണ്ടിയിലെ താമസക്കാർ ഞായറാഴ്ച മുതൽ ശുചീകരണ പ്രവർത്തനങ്ങൾ ആരംഭിച്ചു. വെള്ളം അതിവേഗം ഉയർന്നപ്പോൾ രക്ഷപ്പെട്ടതിനെക്കുറിച്ച് പലരും ഞെട്ടിക്കുന്ന അനുഭവങ്ങൾ പങ്കുവെച്ചു. 80 വയസ്സുകാരായ തൻ്റെ മാതാപിതാക്കൾ വീട്ടിൽ വെള്ളം കയറിയപ്പോൾ കുന്നിൻ മുകളിലേക്ക് രക്ഷപ്പെട്ടെന്നും, 92 വയസ്സുള്ള അയൽവാസി ആറ്റിൽ കുടുങ്ങിയതറിഞ്ഞ് അവർ തിരികെ പോയി അവരെ രക്ഷപ്പെടുത്തിയെന്നും റീഗൻ ബ്രൗൺ പറഞ്ഞു. പിന്നീട് അയൽക്കാരെല്ലാം ഒരുമിച്ച് തങ്ങളുടെ ടൂൾ ഷെഡിൽ അഭയം തേടുകയായിരുന്നു എന്നും അദ്ദേഹം കൂട്ടിച്ചേർത്തു.

കെർ കൗണ്ടിയിലെ ഒരു ക്രിസ്ത്യൻ ക്യാമ്പായ ക്യാമ്പ് മിസ്റ്റിക്-ലെ 27 ഓളം കുട്ടികളും കൗൺസിലർമാരും മരിച്ചതായി തിങ്കളാഴ്ച ക്യാമ്പ് അധികൃതർ സ്ഥിരീകരിച്ചു. ഞായറാഴ്ച, ഹിൽ കൺട്രി പ്രദേശത്ത് നിന്ന് 28 കുട്ടികളടക്കം 68 പേരുടെ മൃതദേഹങ്ങൾ കണ്ടെത്തി. ട്രേവിസ്, ബർനെറ്റ്, കെൻഡൽ, ടോം ഗ്രീൻ, വില്യംസൺ കൗണ്ടികളിൽ നിന്ന് പത്ത് മരണങ്ങൾ കൂടി റിപ്പോർട്ട് ചെയ്യപ്പെട്ടിട്ടുണ്ട്.

ശക്തമായ മഴ ചൊവ്വാഴ്ച വരെ തുടരുമെന്നും, ഇത് കൂടുതൽ ജീവൻ അപകടപ്പെടുത്തുന്ന വെള്ളപ്പൊക്കത്തിന് കാരണമാകുമെന്നും, പ്രത്യേകിച്ച് ഇതിനകം വെള്ളം നിറഞ്ഞ പ്രദേശങ്ങളിൽ സ്ഥിതി വഷളാക്കുമെന്നും ഗവർണർ മുന്നറിയിപ്പ് നൽകി. പ്രസിഡൻ്റ് ഡൊണാൾഡ് ട്രംപ് കെർ കൗണ്ടിയെ ഒരു വലിയ ദുരന്തബാധിത പ്രദേശമായി പ്രഖ്യാപിക്കുകയും ഫെഡറൽ എമർജൻസി മാനേജ്‌മെൻ്റ് ഏജൻസിയെ (FEMA) പ്രവർത്തനക്ഷമമാക്കുകയും ചെയ്തു. വെള്ളിയാഴ്ച താൻ പ്രദേശം സന്ദർശിക്കുമെന്നും, നിലവിൽ പോയാൽ രക്ഷാപ്രവർത്തനങ്ങൾക്ക് തടസ്സമാകുമെന്നും ട്രംപ് പറഞ്ഞു.
ദുരന്തമേഖലയിൽ തിരച്ചിൽ തുടരുകയാണ്. ഹെലികോപ്റ്ററുകൾ, ബോട്ടുകൾ, ഡ്രോണുകൾ എന്നിവ ഉപയോഗിച്ച് കാണാതായവരെ കണ്ടെത്താനും മരങ്ങളിലും ഒറ്റപ്പെട്ട ക്യാമ്പുകളിലും കുടുങ്ങിയവരെ രക്ഷിക്കാനുമുള്ള ശ്രമങ്ങൾ നടക്കുന്നു. ഓരോ മണിക്കൂർ കഴിയുന്തോറും കൂടുതൽ അതിജീവിച്ചവരെ കണ്ടെത്താനുള്ള സാധ്യത മങ്ങുകയാണ്. അധികൃതർ മുന്നറിയിപ്പ് നൽകിയിട്ടും, കാണാതായവരുടെ ബന്ധുക്കളും സന്നദ്ധപ്രവർത്തകരും നദീതീരങ്ങളിൽ തിരച്ചിൽ നടത്തുന്നുണ്ട്. ഈ പ്രദേശത്ത് വെള്ളപ്പൊക്ക സാധ്യതയുണ്ടായിരുന്നിട്ടും മതിയായ മുന്നറിയിപ്പുകൾ നൽകിയിരുന്നോ എന്നതിനെക്കുറിച്ച് ചോദ്യങ്ങൾ ഉയർന്നിട്ടുണ്ട്.