കാനഡയിൽ എഞ്ചിൻ തകരാറിന് സാധ്യതയുണ്ടെന്ന് കണ്ടെത്തിയതിനെ തുടർന്ന്, നിസാൻ 38,000-ൽ അധികം വാഹനങ്ങൾ തിരിച്ചുവിളിക്കുന്നു. നോർത്ത് അമേരിക്കയിലുടനീളം നടക്കുന്ന വലിയൊരു സുരക്ഷാ നടപടിയുടെ ഭാഗമാണിത്. എഞ്ചിനിലെ ബെറിംഗിന്റെ നിർമ്മാണത്തിലെ പിഴവാണ് ഈ തകരാറിന് കാരണം. ഇത് എഞ്ചിന്റെ പ്രവർത്തനം നിലയ്ക്കാൻ വരെ ഇടയാക്കാമെന്ന് കമ്പനി അറിയിച്ചു.
2021 മുതൽ 2024 വരെയുള്ള Nissan Rogue, 2019-2020 കാലത്തെ Nissan Altima, 2019-2022 INFINITI QX50, 2022 ലെ INFINITI QX55 എന്നീ മോഡലുകളാണ് കാനഡയിൽ തിരിച്ചുവിളിക്കുന്നത്. ആകെ 37,837 വാഹനങ്ങൾ ഈ പട്ടികയിൽ ഉൾപ്പെടുന്നു. ഈ പ്രശ്നം പരിഹരിക്കുന്നതിനായി, നിസാൻ ഒരു പ്രത്യേക നടപടിക്രമം തയ്യാറാക്കിയിട്ടുണ്ട്.
2025 ഓഗസ്റ്റ് 22 മുതൽ വാഹന ഉടമകൾക്ക് ഇതിനെക്കുറിച്ചുള്ള ഔദ്യോഗിക അറിയിപ്പ് കത്തുകൾ ലഭിച്ചുതുടങ്ങും. തകരാർ കണ്ടെത്തിയാൽ, വാഹനങ്ങൾ നിസാൻ അല്ലെങ്കിൽ ഇൻഫിനിറ്റി ഡീലർഷിപ്പുകളിൽ സൗജന്യമായി പരിശോധിപ്പിക്കുകയും ആവശ്യമായ അറ്റകുറ്റപ്പണികൾ നടത്തുകയും വേണമെന്ന് കമ്പനി നിർദ്ദേശിച്ചിട്ടുണ്ട്.
ഈ തകരാറുമായി ബന്ധപ്പെട്ട് ഇതുവരെ അപകടങ്ങളോ പരിക്കുകളോ റിപ്പോർട്ട് ചെയ്തിട്ടില്ലെന്ന് നിസാൻ വ്യക്തമാക്കി. അമേരിക്കയിൽ ഇതേ കാരണംകൊണ്ട് 4.43 ലക്ഷം വാഹനങ്ങളാണ് തിരിച്ചുവിളിച്ചിട്ടുള്ളത്. തങ്ങളുടെ വാഹനത്തിന് തിരിച്ചുവിളിക്കലുണ്ടോ എന്ന് പരിശോധിക്കാൻ ഉടമകൾക്ക് nissan.ca അല്ലെങ്കിൽ infiniti.ca എന്ന വെബ്സൈറ്റിൽ വാഹനത്തിന്റെ VIN (Vehicle Identification Number) നൽകി ഉറപ്പുവരുത്താവുന്നതാണ്.
