യു.എസ്. വ്യാപാര യുദ്ധം; കാനഡയിലെ വാഹനമേധാവികളുമായി പ്രധാനമന്ത്രി കൂടിക്കാഴ്ച നടത്തി

കാനഡ-യു.എസ്. വ്യാപാര യുദ്ധം കടുക്കുന്ന സാഹചര്യത്തിൽ, പ്രധാനമന്ത്രി മാർക്ക് കാർണി കാനഡയിലെ പ്രമുഖ വാഹന നിർമ്മാതാക്കളുടെ സിഇഒമാരുമായി ബുധനാഴ്ച രാവിലെ ഒട്ടാവയിൽ ഉന്നതതല യോഗം ചേർന്നു. ഫോർഡ് കാനഡ, സ്റ്റെല്ലാന്റിസ് കാനഡ, ജിഎം കാനഡ എന്നീ കമ്പനികളുടെ സിഇഒമാരും കാനഡ വാഹന നിർമ്മാതാക്കളുടെ അസോസിയേഷൻ പ്രസിഡന്റ് ബ്രയൻ കിംഗ്‌സ്റ്റണുമാണ് പ്രധാനമന്ത്രിയുമായി കൂടിക്കാഴ്ച നടത്തിയത്. കാനഡയിലുടനീളം ഒരു സ്വദേശീയ വിതരണ ശൃംഖല (Made-in-Canada supply chain) കെട്ടിപ്പടുക്കുന്നതിന്റെ ആവശ്യകതയും, യു.എസ്. ആശ്രിതത്വം കുറച്ച് വ്യാപാര പങ്കാളിത്തം വൈവിധ്യവത്കരിക്കുന്നതും യോഗത്തിൽ പ്രധാന ചർച്ചാ വിഷയങ്ങളായി.

കാനഡയിൽ നിർമ്മിക്കുന്ന വാഹനങ്ങൾക്ക് യു.എസ്. ഏർപ്പെടുത്തിയ 25% താരിഫ് ഇപ്പോഴും നിലനിൽക്കുന്നതും, അതേസമയം യു.എസിൽ നിർമ്മിച്ച ഭാഗങ്ങൾക്ക് പ്രത്യേക പരിഗണന തുടരുന്നതും കാനഡയ്ക്ക് വെല്ലുവിളിയാണ്.
ഇലക്ട്രിക് വാഹന (EV) മാർഗ്ഗരേഖയും യോഗത്തിൽ ആശങ്കയായി ഉയർന്നു വന്നു. 2026 മുതൽ കാനഡയിൽ വിറ്റഴിക്കുന്ന ചെറുവാഹനങ്ങളിൽ 20% ഇലക്ട്രിക് വാഹനങ്ങളായിരിക്കണം എന്ന സീറോ എമിഷൻ വാഹന നിർദ്ദേശം നിർമ്മാതാക്കൾക്ക് വലിയ ആശങ്കയാണ് സൃഷ്ടിക്കുന്നത്. 2024 ഡിസംബറിൽ 18.29% ആയിരുന്ന ഇലക്ട്രിക് വാഹന വിപണി വിഹിതം, 2025 ഏപ്രിലിൽ ഫെഡറൽ ഇ.വി. റിബേറ്റ് പദ്ധതി അവസാനിച്ചതോടെ 7.53% ആയി കുറഞ്ഞുവെന്ന് കണക്കുകൾ പറയുന്നു.

പുതിയൊരു റിബേറ്റ് പദ്ധതി ആസൂത്രണം ചെയ്യുന്നതായി പരിസ്ഥിതി മന്ത്രി ജൂലി ഡാബ്രുസിൻ വ്യക്തമാക്കിയിട്ടുണ്ട്. 2026-ലെ ഇ.വി. ലക്ഷ്യം നിർമ്മാതാക്കൾക്ക് പ്രായോഗികമല്ലെന്നും, പ്രധാനമന്ത്രി പരിഹാരങ്ങളുമായി മുന്നോട്ട് വരുമെന്ന് പ്രതീക്ഷിക്കുന്നതായും ഗ്ലോബൽ ഓട്ടോമേക്കേഴ്സ് ഓഫ് കാനഡ പ്രസിഡന്റ് ഡേവിഡ് ആഡംസ് പറഞ്ഞു. കാനഡയുടെ ഡിജിറ്റൽ സേവന നികുതിയെ ചൊല്ലിയുള്ള യു.എസ്. പ്രതിഷേധത്തെ തുടർന്ന് ട്രംപ് വ്യാപാര ചർച്ചകളിൽ നിന്ന് പിന്മാറിയിരുന്നു. പിന്നീട് കാനഡ സർക്കാർ നികുതി പദ്ധതി റദ്ദാക്കിയതോടെയാണ് ചർച്ചകൾ വീണ്ടും ആരംഭിച്ചത്.

ജൂലൈ 21-നകം ഒരു പുതിയ കാനഡ-യു.എസ്. വ്യാപാര കരാർ ഉണ്ടാകണമെന്ന് കാർണി പ്രഖ്യാപിച്ചിട്ടുണ്ട്. ഈ സമയപരിധിക്കുള്ളിൽ കരാർ സാധ്യമായില്ലെങ്കിൽ പ്രതികാര നടപടികൾ ശക്തമാക്കുമെന്ന് കാനഡ മുന്നറിയിപ്പ് നൽകിയിട്ടുണ്ട്. പ്രധാനമന്ത്രി കാർണി വ്യവസായത്തെ സംരക്ഷിക്കാനും യു.എസുമായുള്ള വ്യാപാര ബന്ധം നിലനിർത്താനും ശ്രമിക്കുകയാണെന്ന് വ്യവസായ സംഘടനകൾ വിലയിരുത്തുന്നു. “വ്യാപാരബന്ധം സംരക്ഷിക്കലാണ് ഇപ്പോഴത്തെ വലിയ പ്രശ്നം,” ഡേവിഡ് ആഡംസ് വ്യക്തമാക്കി.