കാനഡയിലെ തൊഴിലാളികൾക്ക് ആശ്വാസവാർത്തയുമായി സ്റ്റാറ്റിസ്റ്റിക്സ് കാനഡയുടെ പുതിയ കണക്കുകൾ പുറത്ത്. 2025 ഏപ്രിലിൽ കാനഡയിലെ തൊഴിലാളികളുടെ ശരാശരി ആഴ്ചശമ്പളം 1,297 ഡോളറായി ഉയർന്നു. ഇത് കഴിഞ്ഞ വർഷത്തേക്കാൾ 4.4% വർദ്ധനവ് രേഖപ്പെടുത്തുന്നു. അതേസമയം, ഇതേ കാലയളവിൽ ഉപഭോക്തൃ വിലനിലവാര വർദ്ധനവ് വെറും 1.7% മാത്രമായിരുന്നു. ഇത് തൊഴിലാളികളുടെ വാങ്ങൽ ശേഷിയിൽ വർധനവുണ്ടായി എന്ന് സൂചിപ്പിക്കുന്നു. മാസാടിസ്ഥാനത്തിൽ 0.8% വളർച്ചയും ഉണ്ടായിട്ടുണ്ട്, ഇത് മാർച്ചിലെ നിരക്കിനെക്കാൾ കൂടുതലാണ്.
വിവിധ മേഖലകളിൽ ശമ്പള വളർച്ച ശ്രദ്ധേയമാണ്. ഇൻഫർമേഷൻ, കൾച്ചറൽ ഇൻഡസ്ട്രികൾ മേഖലയിൽ 10% വർധനവോടെ ആഴ്ചശമ്പളം 1,875 ഡോളറായി. റിയൽ എസ്റ്റേറ്റ് മേഖലയിൽ 9.7% വർധനവോടെ ശരാശരി ശമ്പളം 1,361 ഡോളറാണ്. ഏറ്റവും കൂടുതൽ വരുമാനം ലഭിക്കുന്ന മേഖലയായി ഖനനം, എണ്ണ-വാതകങ്ങൾ, ക്വാറിയിംഗ് എന്നിവ തുടരുന്നു. ഇവിടെ ശമ്പളത്തിൽ 5% വർധനവുണ്ടായി, ശരാശരി ആഴ്ചശമ്പളം 2,492 ഡോളറാണ്. അതേസമയം, അക്കമഡേഷൻ & ഫുഡ് സർവീസ് മേഖലയിൽ 4.6% വർധനവുണ്ടായെങ്കിലും ഏറ്റവും കുറഞ്ഞ ശരാശരി ശമ്പളമായ 521.16 ഡോളറാണ് രേഖപ്പെടുത്തിയത്. ആർട്സ്, എന്റർടൈൻമെന്റ് & റിക്രിയേഷൻ മേഖലയിൽ ശരാശരി 759.63 ഡോളറാണ് ശമ്പളം.
ശമ്പള വർധനവിനൊപ്പം വാർഷികാടിസ്ഥാനത്തിൽ ജോലി ഒഴിവുകളിൽ കുറവും കണ്ടു. ഹെൽത്ത് കെയർ & സോഷ്യൽ അസിസ്റ്റൻസ് മേഖലയിൽ 23.9% കുറവ് രേഖപ്പെടുത്തി. അക്കമഡേഷൻ & ഫുഡ് സർവീസിൽ 21.7% കുറവും കൺസ്ട്രക്ഷൻ മേഖലയിൽ 13.8% കുറവും ഉണ്ടായി. പ്രവിശ്യകളിൽ ഏറ്റവും കൂടുതൽ ഇടിവ് രേഖപ്പെടുത്തിയത് ന്യൂഫൗണ്ട്ലാൻഡ് & ലാബ്രഡോറിൽ (26.3%) ആണ്. ന്യൂ ബ്രൺസ്വിക് (16.8%), ആൽബെർട്ട (9.4%), ബ്രിട്ടീഷ് കൊളംബിയ (8.5%) എന്നിവിടങ്ങളിലും കുറവ് പ്രകടമാണ്. മറ്റ് ആറ് പ്രവിശ്യകളിൽ ഒഴിവുകളിൽ കാര്യമായ മാറ്റമൊന്നും ഉണ്ടായിട്ടില്ല.
തൊഴിൽ സാധ്യതകളുടെ കുറവിനൊപ്പം ശമ്പള വർധന കാനഡയുടെ തൊഴിൽ വിപണിയിലെ വ്യത്യസ്ത ചലനങ്ങൾ സൂചിപ്പിക്കുന്നുണ്ട്. ചില മേഖലകളിലെ ശക്തമായ വളർച്ചയും മറ്റ് മേഖലകളിലെ കുറഞ്ഞ ശമ്പളവും ഒഴിവുകളും തമ്മിൽ വലിയ അന്തരമാണ് നിലവിലുള്ളത്. കാനഡയിലെ സാമ്പത്തിക മേഖലയുടെ ഈ വ്യത്യസ്തമായ പ്രവണതകൾ ഭാവിയിൽ എങ്ങനെയാകുമെന്ന് കണ്ടുതന്നെ അറിയണം.
