കാനഡ റെവന്യൂ ഏജൻസിയുടെ (CRA) വ്യാജ വെബ്സൈറ്റിൽ ബാങ്കിംഗ് വിവരങ്ങൾ നൽകി ഒന്റാറിയോ സ്വദേശിനിയായ റൂത്ത് ജീന് 26,820 ഡോളർ (ഏകദേശം 22 ലക്ഷം രൂപ) നഷ്ടമായി. തന്റെ പുതിയ ബിസിനസിനായി സി.ആർ.എ. ബിസിനസ് അക്കൗണ്ട് തുറക്കാൻ ശ്രമിച്ചപ്പോഴാണ് ലണ്ടൻ സ്വദേശിനിയായ റൂത്ത് ജീൻ ഈ സൈബർ തട്ടിപ്പിന് ഇരയായത്.
മാർച്ചിൽ ‘CRA Business Login’ എന്ന് ഗൂഗിളിൽ തിരഞ്ഞപ്പോൾ ആദ്യം കണ്ട ലിങ്കിൽ ക്ലിക്ക് ചെയ്യുകയായിരുന്നു റൂത്ത്. CRA എന്ന് കണ്ടപ്പോൾ അത് യഥാർത്ഥ സൈറ്റാണെന്ന് കരുതിയെന്ന് റൂത്ത് ജീൻ പറഞ്ഞു. വെബ്സൈറ്റ് സോഷ്യൽ ഇൻഷുറൻസ് നമ്പറും, ഡെബിറ്റ് കാർഡ് നമ്പർ, പാസ്വേഡ്, കാർഡ് കാലാവധി തുടങ്ങിയ ബാങ്ക് വിവരങ്ങളും ആവശ്യപ്പെട്ടു. വിവരങ്ങൾ നൽകി ‘സബ്മിറ്റ്’ ചെയ്തതോടെ സ്ക്രീൻ കറുത്തുപോയെന്നും, അപ്പോഴാണ് താൻ ചതിയിൽപ്പെട്ടതായി മനസ്സിലായതെന്നും റൂത്ത് വ്യക്തമാക്കി. എന്റെ കഠിനാധ്വാനത്തിൽ സമ്പാദിച്ച പണമാണ് നഷ്ടപ്പെട്ടത്. ദുഃഖവും ദേഷ്യവും തോന്നുന്നു. എനിക്ക് ഇത് സംഭവിക്കുമെന്ന് ഞാൻ ഒരിക്കലും കരുതിയിലെന്ന് റൂത്ത് ജീൻ വിഷമത്തോടെ പറഞ്ഞു.
സമാനമായ രീതിയിൽ GIC വാങ്ങാൻ ശ്രമിച്ച ഒരു മുതിർന്നയാൾക്ക് നേരത്തെ 750,000 ഡോളർ വരെ നഷ്ടമായ സംഭവവും റിപ്പോർട്ട് ചെയ്യപ്പെട്ടിട്ടുണ്ട്. സൈബർ സുരക്ഷാ വിദഗ്ദ്ധനായ റിതേഷ് കോടക്, വ്യാജ വെബ്സൈറ്റുകൾ കണ്ടെത്താൻ അതീവ ജാഗ്രത പുലർത്തണമെന്ന് മുന്നറിയിപ്പ് നൽകി. ബാങ്ക് വിവരങ്ങൾ നൽകുന്നതിന് മുമ്പ് വെബ് അഡ്രസ് ശരിയാണോ എന്നും, പാഡ്ലോക്ക് (🔒) അടയാളം കാണുന്നുണ്ടോ എന്നും, അത് HTTPS സൈറ്റാണോ എന്നും ഉറപ്പുവരുത്തണമെന്ന് അദ്ദേഹം നിർദ്ദേശിച്ചു.
കൂടാതെ, തേർഡ് പാർട്ടി സുരക്ഷാ ടൂളുകൾ ഇൻസ്റ്റാൾ ചെയ്യാനും വിദഗ്ദ്ധർ ഉപദേശിക്കുന്നു. ഉപഭോക്താക്കളെ സംരക്ഷിക്കുന്നത് തങ്ങളുടെ പ്രധാന മുൻഗണനയാണെന്നും, നയങ്ങൾ ലംഘിക്കുന്ന പരസ്യങ്ങൾ കണ്ടെത്തിയാൽ ഉടൻ നടപടി സ്വീകരിക്കുമെന്നും ഗൂഗിൾ പ്രസ്താവനയിലൂടെ അറിയിച്ചു. 2024-ൽ 9.1 ബില്യൺ പരസ്യങ്ങൾ നിരോധിക്കുകയും 39.2 ദശലക്ഷം അക്കൗണ്ടുകൾ സസ്പെൻഡ് ചെയ്യുകയും 5.1 ബില്യൺ പരസ്യങ്ങൾ നയങ്ങൾ ലംഘിച്ചതിനാൽ തടയുകയും ചെയ്തതായി ഗൂഗിൾ വ്യക്തമാക്കി.
CRA-യോ മറ്റ് ഔദ്യോഗിക വെബ്സൈറ്റുകളോ ഉപയോഗിക്കുമ്പോൾ വെബ്സൈറ്റ് ലിങ്ക് എല്ലായ്പ്പോഴും cra.gc.ca പോലുള്ള ഔദ്യോഗിക വിലാസമാണോ എന്ന് പരിശോധിക്കാൻ ശ്രദ്ധിക്കുക. ഗൂഗിൾ തിരയൽ ഫലങ്ങൾ എപ്പോഴും വിശ്വസനീയമല്ലെന്നും ഈ സംഭവം ഓർമ്മിപ്പിക്കുന്നുണ്ട്.
