കാനഡയുടെ കിഴക്കൻ പ്രവിശ്യകളിൽ അതിശക്തമായ ചൂട് തുടരുമെന്ന് എൻവയോൺമെന്റ് കാനഡ മുന്നറിയിപ്പ് നൽകി. ഒന്റാറിയോ, ക്യുബെക്, നോവാ സ്കോഷ്യ എന്നിവിടങ്ങളിൽ തിങ്കളാഴ്ച രാവിലെ ഉഷ്ണതരംഗ മുന്നറിയിപ്പ് (Heat Warning) പുറപ്പെടുവിച്ചിട്ടുണ്ട്. ഈ വേനൽക്കാലത്തെ ആദ്യത്തെ പ്രധാന ഉഷ്ണതരംഗമാണിതെന്നും, അപകടകരമായ ചൂടും ഈർപ്പവും തുടരുമെന്നും എൻവയോൺമെന്റ് കാനഡ വ്യക്തമാക്കി.
പ്രധാന നഗരങ്ങളിലെ താപനില നിലവിൽ 30°C കടന്നു. ടൊറന്റോയിൽ 33°C, മോൺട്രിയലിൽ 35°C, ഹാലിഫാക്സിൽ 29°C എന്നിങ്ങനെയാണ് രേഖപ്പെടുത്തിയിരിക്കുന്ന താപനില. എന്നാൽ കിഴക്കൻ കാനഡയിൽ അസാധാരണമായ ചൂട് അനുഭവപ്പെടുമ്പോൾ, കാനഡയുടെ പടിഞ്ഞാറൻ ഭാഗങ്ങളിൽ കാലാവസ്ഥ താരതമ്യേന സുഖകരമാണ്. വാങ്കൂവറിൽ 22°C, എഡ്മന്റണിൽ 22°C, റെജൈനയിൽ 21°C, വിന്നിപെഗിൽ 26°C എന്നിങ്ങനെയാണ് അവിടങ്ങളിലെ താപനില.
ഈ വർഷം പടിഞ്ഞാറൻ കാനഡയിൽ മിതമായതും സാധാരണ നിലയിലുള്ളതുമായ വേനൽക്കാലമാണ് അനുഭവപ്പെടുന്നത്. ഈ തീവ്രമായ കാലാവസ്ഥ ആരോഗ്യപ്രശ്നങ്ങളുണ്ടാക്കാൻ സാധ്യതയുള്ളതിനാൽ അധികൃതർ സുരക്ഷാ നിർദ്ദേശങ്ങൾ പുറത്തിറക്കിയിട്ടുണ്ട്.
ചൂട് കൂടുതലുള്ള സമയങ്ങളിൽ പുറത്ത് പോകുന്നത് പരമാവധി ഒഴിവാക്കാനും, ധാരാളം ശുദ്ധജലം കുടിക്കാനും നിർദ്ദേശമുണ്ട്. പകൽ സമയങ്ങളിൽ കായികാധ്വാനമുള്ള ജോലികൾ ഒഴിവാക്കി സന്ധ്യാസമയങ്ങളിൽ പ്രവർത്തനങ്ങൾ ആസൂത്രണം ചെയ്യാനും പൊതുജനങ്ങൾക്ക് നിർദേശം നൽകിയിട്ടുണ്ട്. കൂടാതെ, വയോധികർക്കും കുട്ടികൾക്കും പ്രത്യേക ശ്രദ്ധ നൽകേണ്ടത് അത്യാവശ്യമാണെന്നും അധികൃതർ പറഞ്ഞു.
