ഗ്രേറ്റർ ടൊറന്റോ ഏരിയയിൽ (GTA) അതിതീവ്രമായ ചൂട് തുടരുകയാണ്. ഞായറാഴ്ച ആരംഭിച്ച ഈ ഉഷ്ണതരംഗം ചൊവ്വാഴ്ച രാത്രിയോടെ ശമിക്കുമെന്ന് എൻവയോൺമെന്റ് കാനഡ അറിയിച്ചു. പകൽസമയത്ത് താപനില 30°C മുതൽ 35°C വരെയും, അന്തരീക്ഷത്തിലെ ഈർപ്പത്തിന്റെ അളവ് പരിഗണിച്ച് അനുഭവപ്പെടുന്ന ചൂട് (Humidex) 40 മുതൽ 45 വരെയും എത്താൻ സാധ്യതയുണ്ടെന്നുമാണ് പ്രവചനം.
ഈ സാഹചര്യത്തിൽ ആരോഗ്യ വിദഗ്ധർ പൊതുജനങ്ങൾക്ക് ജാഗ്രതാ നിർദേശങ്ങൾ നൽകിയിട്ടുണ്ട്. ശരീരത്തിന്റെ താപനില 37°C-ൽ നിലനിർത്താൻ ഹൃദയമിടിപ്പും ശ്വാസമെടുപ്പും കൂടുന്നത് ചിന്താശേഷിയെ ബാധിക്കാമെന്ന് യൂനിറ്റി ഹെൽത്ത് ടൊറന്റോയിലെ ഡോ. സമാന്ത ഗ്രീൻ മുന്നറിയിപ്പ് നൽകി. ടൊറന്റോ, മിസ്സിസാഗ, ബ്രാംപ്ടൺ, റിച്ച്മണ്ട് ഹിൽ, വോൺ, മാർഖം, ന്യൂമാർക്കറ്റ്, ജോർജീന, ഡർഹാം മേഖലയിലെ പിക്കറിംഗ്, ഓഷാവ, അക്സ്ബ്രിഡ്ജ്, ബീവർട്ടൺ, സിംകോ, ഹാൾട്ടൺ ഹിൽസ്, മിൽട്ടൺ തുടങ്ങിയ പ്രദേശങ്ങളിലാണ് ഉഷ്ണതരംഗ മുന്നറിയിപ്പ് പ്രധാനമായും ബാധിക്കുന്നത്.
ഇതിനിടെ, പിയേഴ്സൺ വിമാനത്താവളത്തിൽ താപനില പുതിയ റെക്കോർഡ് സ്ഥാപിച്ചു. 1921 ജൂൺ 23-ലെ 32.8°C എന്ന പഴയ റെക്കോർഡ് മറികടന്ന്, താപനില 35.8°C ആയി ഉയർന്നു. ചൊവ്വാഴ്ച ഉച്ചമുതൽ രാത്രി 8 മണിവരെ 40% വരെ ഇടിമിന്നലോട് കൂടിയ മഴയ്ക്കും സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു. ചൂടുമായി ബന്ധപ്പെട്ട ആരോഗ്യപ്രശ്നങ്ങളായ ഹീറ്റ് സ്ട്രോക്കിന്റെ ലക്ഷണങ്ങളായ ചർമ്മത്തിലെ ചുവപ്പ്, ചൂട്, തലവേദന, തലകറക്കം, ഛർദ്ദി, അസ്വസ്ഥത, ബോധാവസ്ഥയിലുള്ള മാറ്റങ്ങൾ എന്നിവ ശ്രദ്ധിക്കണമെന്നും, ഈ ലക്ഷണങ്ങൾ കണ്ടാൽ ഉടൻതന്നെ തണുത്ത സ്ഥലത്തേക്ക് മാറുകയും പ്രാഥമിക ചികിത്സ നൽകി ആശുപത്രിയിൽ എത്തിക്കുകയും ചെയ്യണമെന്നും അധികൃതർ നിർദേശിച്ചു.
ചൂട് കൂടിയ സമയങ്ങളിൽ പുറത്തിറങ്ങുന്നത് ഒഴിവാക്കുക, കൂളിംഗ് സെന്ററുകൾ, ലൈബ്രറികൾ, കമ്മ്യൂണിറ്റി സെന്ററുകൾ തുടങ്ങിയ പൊതു ഇടങ്ങൾ ഉപയോഗപ്പെടുത്തുക, ധാരാളം വെള്ളം കുടിക്കുക, അയഞ്ഞ വസ്ത്രങ്ങൾ ധരിക്കുക എന്നിവയെല്ലാം ഈ സാഹചര്യത്തിൽ സ്വീകരിക്കേണ്ട മുൻകരുതലുകളാണ്. കൂടാതെ, പ്രായമായവരെയും ഒറ്റയ്ക്ക് താമസിക്കുന്നവരെയും നിരന്തരം നിരീക്ഷിക്കണമെന്നും അധികൃതർ ഓർമ്മിപ്പിച്ചു. ഈ കാലാവസ്ഥയിൽ നഗരവാസികൾ അതീവ ജാഗ്രത പാലിക്കണമെന്ന് അധികൃതർ ആവർത്തിച്ച് അഭ്യർത്ഥിച്ചു.
