പ്രൈഡ് ആഘോഷത്തിന് ആഴ്ചകൾ മാത്രം ബാക്കിനിൽക്കെ ടോറന്റോയിലെ സംഘാടകർ വലിയ സാമ്പത്തിക വെല്ലുവിളി നേരിടുന്നു. ഗൂഗിൾ, ഹോം ഡിപ്പോ തുടങ്ങിയ മുഖ്യ ധനസഹായക്കാരുടെ അപ്രതീക്ഷിത പിന്മാറ്റം സംഘടനയെ 9 ലക്ഷം ഡോളറിന്റെ കടുത്ത ഫണ്ട് പ്രതിസന്ധിയിലേക്ക് തള്ളിവിട്ടിരിക്കുന്നു.
ആവശ്യമായ സഹായം ലഭിച്ചില്ലെങ്കിൽ ഈ വർഷത്തെ ആഘോഷങ്ങളുടെ തോത് കുറയ്ക്കേണ്ടി വരുമെന്ന് സംഘാടകർ അറിയിച്ചു. ഈ സാമ്പത്തിക പ്രതിസന്ധിക്ക് കാരണം, വൈവിധ്യം, സമത്വം, ഉൾപ്പെടുത്തൽ (Diversity, Equity, Inclusion – DEI) എന്നീ സംരംഭങ്ങൾക്കുള്ള പിന്തുണയിൽ വന്നിട്ടുള്ള കുറവാണെന്ന് പ്രൈഡ് ടോറന്റോയുടെ എക്സിക്യൂട്ടീവ് ഡയറക്ടർ കോജോ മൊഡെസ്റ്റെ പറയുന്നു.
പ്രസിഡൻ്റ് ഡൊണാൾഡ് ട്രംപിൻ്റെ ഭരണകാലത്ത് അമേരിക്കയിൽ ആരംഭിച്ച രാഷ്ട്രീയ മാറ്റങ്ങളാണ് ഈ പ്രവണതയ്ക്ക് പിന്നിലെ പ്രധാന കാരണം. ഈ വർഷം ആദ്യം നിസ്സാൻ കാനഡ, ക്ലോറോക്സ് തുടങ്ങിയ കമ്പനികളും ഈ പരിപാടിയിൽ നിന്ന് പിന്മാറിയിരുന്നു.
ടോറന്റോ നഗരം 3.5 ലക്ഷം ഡോളർ സംഭാവന നൽകുകയും അടുത്ത മൂന്ന് വർഷത്തിനുള്ളിൽ സഹായം വർദ്ധിപ്പിക്കാമെന്ന് വാഗ്ദാനം ചെയ്യുകയും ചെയ്തിട്ടുണ്ട്.
എന്നാൽ, കാനഡയിലെ പ്രവിശ്യാ-ഫെഡറൽ സർക്കാരുകളിൽ നിന്ന് സമാനമായ സഹായം ലഭിക്കാത്തതിൽ മൊഡെസ്റ്റെ നിരാശ പ്രകടിപ്പിച്ചു. ലോകത്തിലെ ഏറ്റവും വലിയ പ്രൈഡ് ഫെസ്റ്റിവലുകളിലൊന്നായ പ്രൈഡ് ടൊറോണ്ടോ നഗരത്തിലെ ഗേ വില്ലേജ് മേഖലയ്ക്ക് വലിയ സാമ്പത്തിക സഹായം നൽകുന്നുണ്ട്. ഈ പരിപാടി പല പ്രാദേശിക ബിസിനസുകൾക്കും അവരുടെ വാർഷിക വരുമാനത്തിൻ്റെ പകുതിയിലേറെയും നേടിക്കൊടുക്കുന്നതായും അദ്ദേഹം ചൂണ്ടിക്കാട്ടി.
നോ ഫ്രിൽസ്, ഷോപ്പേഴ്സ് ഡ്രഗ് മാർട്ട്, എസ്ഇഐയു ഹെൽത്ത്‌കെയർ തുടങ്ങിയ പുതിയ ചില സ്പോൺസർമാർ സഹായവുമായി മുന്നോട്ട് വന്നിട്ടുണ്ട്. കൂടാതെ, 175-ലധികം വ്യക്തിഗത ദാതാക്കളിൽ നിന്ന് ഇതുവരെ 10,000 ഡോളറിലധികം സംഭാവന ലഭിക്കുകയും ചെയ്തു. എന്നിരുന്നാലും, ആസൂത്രണം ചെയ്തതുപോലെ പൂർണ്ണമായ ആഘോഷം നടത്തുന്നതിന് കൂടുതൽ സംഘടനകളും വ്യക്തികളും മുന്നോട്ട് വരേണ്ടതുണ്ടെന്ന് മൊഡെസ്റ്റെ വ്യക്തമാക്കി.
