കാനഡയിൽ വേനൽക്കാലം ആരംഭിച്ചതോടെ ടിക്കുകളിലൂടെ പകരുന്ന ‘ലൈം’ രോഗം ആശങ്കാജനകമായ നിരക്കിൽ പുതിയ പ്രദേശങ്ങളിലേക്ക് വ്യാപിച്ചുകൊണ്ടിരിക്കുകയാണ്. രാജ്യത്തിന്റെ പബ്ലിക് ഹെൽത്ത് ഏജൻസി അപകടസാധ്യതയുള്ള മേഖലകളുടെ വിപുലമായ പട്ടിക പുറത്തുവിട്ടിരിക്കുന്നു. രാജ്യത്തെ 1,100 ലധികം നഗരങ്ങളിലായി ആയിരക്കണക്കിന് പോസ്റ്റൽ കോഡുകൾ ഈ പട്ടികയിൽ ഉൾപ്പെടുത്തിയിട്ടുണ്ട്.
വാങ്കൂവർ ദ്വീപ്, ബ്രിട്ടീഷ് കൊളംബിയയുടെ ലൊവർ മെയിൻലാൻഡ്, മനിറ്റോബയുടെ ദക്ഷിണഭാഗങ്ങൾ, ഒന്റാറിയോയുടെ ഗ്രേറ്റ് ലേക്ക് തീരങ്ങൾ, സെന്റ് ലോറൻസ് നദീതടം, ന്യൂബ്രൺസ്വിക്, നോവ സ്കോഷ്യ എന്നിവയാണ് പ്രധാനമായും അപകടത്തിൽപ്പെട്ട മേഖലകൾ. മാക്ഗിൽ സർവകലാശാലയിലെ ജീവശാസ്ത്ര പ്രൊഫസർ വിർജിനി മിലിയൻ വിശദീകരിക്കുന്നതനുസരിച്ച്, കാലാവസ്ഥാ വ്യതിയാനമാണ് ടിക്കുകളുടെ ആധിപത്യം വർധിപ്പിക്കുന്ന പ്രധാന ഘടകം.
ആഗോളതാപനം മൂലം തണുപ്പ് കുറയുന്നതിനാൽ ടിക്കുകൾ കൂടുതൽ വടക്കൻ പ്രദേശങ്ങളിലേക്കും വ്യാപിക്കാൻ തുടങ്ങിയിരിക്കുകയാണ്.. നഗര പാർക്കുകൾ പോലെയുള്ള ജനപങ്കാളിത്തമുള്ള സ്ഥലങ്ങളിലും ഇപ്പോൾ ടിക്കുകളെ കണ്ടെത്തുന്നുണ്ടെന്നത് വിശേഷിച്ചും ആശങ്കാജനകമാണ്. ലൈം രോഗം പകർന്നു നൽകുന്ന ബാക്ടീരിയയെ ഉൾക്കൊള്ളുന്ന കറുത്ത കാലുകളുള്ള ടിക്കുകൾ കിഴക്കൻ കാനഡയിലും പടിഞ്ഞാറൻ ടിക്കുകൾ ബ്രിട്ടീഷ് കൊളംബിയയിലും കൂടുതൽ കാണപ്പെടുന്നതായി റിപ്പോർട്ടുകൾ വ്യക്തമാക്കുന്നുണ്ട്.
‘ലൈം’ രോഗം ആരംഭത്തിൽ നിസ്സാരമായ ലക്ഷണങ്ങളായിട്ടാണ് പ്രത്യക്ഷപ്പെടുന്നതെങ്കിലും, ശരിയായ ചികിത്സ കിട്ടാതെ കാലതാമസം വന്നാൽ സന്ധിവേദന, തലവേദന, സ്മരണാശം, പേശിവേദന, മുഖം തളർച്ച തുടങ്ങിയ ഗുരുതരമായ ആരോഗ്യ പ്രശ്നങ്ങൾ ഉണ്ടാകാനുള്ള സാധ്യത വളരെ കൂടുതലാണ്. ആദ്യഘട്ടത്തിൽ തന്നെ രോഗം കണ്ടെത്തി ചികിത്സ നൽകിയാൽ പൂർണ്ണമായും സുഖപ്പെടുത്താൻ കഴിയുമെന്നാണ് വൈദ്യശാസ്ത്ര വിദഗ്ധരുടെ അഭിപ്രായം.
പൊതു ആരോഗ്യ ഏജൻസിയും വിദഗ്ധരും നൽകുന്ന മുന്നറിയിപ്പ് അനുസരിച്ച്, ടിക്കുകൾ കടിക്കാതിരിക്കാൻ വനപ്രദേശങ്ങളിലും പുൽമേടുകളിലും പോകുമ്പോൾ നീളം കൂടിയ വസ്ത്രങ്ങൾ ധരിക്കുകയും ഇൻസെക്ട് റെപ്പല്ലന്റുകൾ ഉപയോഗിക്കുകയും വേണം. ടിക്കുകൾ കടിച്ചാൽ ഉടൻ തന്നെ ശരിയായ രീതിയിൽ നീക്കം ചെയ്യുകയും തുടർന്ന് കാലതാമസമില്ലാതെ ആരോഗ്യപ്രവർത്തകരെ സമീപിക്കുകയും ചെയ്യുന്നത് അത്യാവശ്യമാണ്. പ്രതിരോധവും കൃത്യസമയത്തുള്ള ചികിത്സയും മാത്രമാണ് ഈ രോഗത്തിൽ നിന്ന് മുക്തി നേടാനുള്ള ഏറ്റവും ഫലപ്രദമായ മാർഗ്ഗമെന്നും അവർ അറിയിച്ചു.
