ഇന്ത്യ – കാനഡ ബന്ധം വീണ്ടും വഷളായേക്കാമെന്ന രീതിയിലുള്ള ചർച്ചകളാണ് ഇപ്പോൾ നടക്കുന്നത്. ഖാലിസ്ഥാൻ അനുകൂല പഞ്ചാബി ഗായകൻ ജാസി ബിയെ ബ്രിട്ടീഷ് കൊളംബിയ (ബിസി) അസംബ്ലിയിലേക്ക് ക്ഷണിച്ചതിനെത്തുടർന്നാണ് ഇന്ത്യ-കാനഡ ബന്ധങ്ങൾക്കിടയിലുള്ള ഖാലിസ്ഥാൻ പ്രശ്നം വീണ്ടും ഉയർന്നുവന്നത്. ബ്രിട്ടീഷ് കൊളംബിയ കൺസർവേറ്റീവ് എംഎൽഎ സ്റ്റീവ് കൂനർ ജാസിയോടൊപ്പമുള്ള ഒരു വീഡിയോയും സോഷ്യൽ മീഡിയയിൽ വൈറലായിട്ടുണ്ട്. വോട്ട് ബാങ്ക് രാഷ്ട്രീയം കാരണം ഖാലിസ്ഥാൻ അനുഭാവികളെ പിന്തുണയ്ക്കുന്ന കാനഡയുടെ പ്രവണതയായിട്ടാണ് ഇത് വിലയിരുത്തപ്പെടുന്നത്. മുൻ പ്രധാനമന്ത്രി ജസ്റ്റിൻ ട്രൂഡോ അധികാരത്തിലിരുന്ന കാലത്ത് ഇന്ത്യയും കാനഡയും തമ്മിലുള്ള ബന്ധം വഷളായതിന്റെ കേന്ദ്രബിന്ദു ഈ വിഷയമായിരുന്നു. ബ്രിട്ടീഷ് കൊളംബിയ അസംബ്ലിയിലെ ഏറ്റവും പുതിയ സംഭവം ഇന്ത്യയും നിരീക്ഷിച്ച് വരികയാണ്.
അതേസമയം, ബിസി നിയമസഭയിലേക്കുള്ള തന്റെ സന്ദർശനത്തിന്റെ നിരവധി ഫോട്ടോകൾ ജാസി ബി ഇൻസ്റ്റാഗ്രാമിൽ പോസ്റ്റ് ചെയ്തു. “പ്രീമിയർ ഡേവിഡ് എബി, കെസി, ഹൗസ് സ്പീക്കർ രാജ് ചൗഹാൻ, സ്പെൻസർ ചന്ദ്ര ഹെർബർട്ട് എന്നിവർ ആതിഥേയത്വം വഹിക്കുന്ന ബ്രിട്ടീഷ് കൊളംബിയയുടെ ഒന്നാം സെഷൻ 43-ാമത് പാർലമെന്റിന്റെ നിയമസഭയിൽ പങ്കെടുക്കാൻ ക്ഷണിക്കപ്പെട്ടതിൽ ഞാൻ വളരെയധികം നന്ദിയുള്ളവനാണ്,” ജാസി ബി ഇങ്ങനെയാണ് സമൂഹമാധ്യമത്തിൽ പോസ്റ്റ് ചെയ്തത്.
