ന്യൂയോർക്ക്: പ്രമുഖ ബിസ്ക്കറ്റ് നിർമ്മാതാക്കളായ മോണ്ടെലെസ് ഇന്റർനാഷണൽ, സൂപ്പർമാർക്കറ്റ് ശൃംഖലയായ ആൽഡിയ്ക്കെതിരെ ഫെഡറൽ കോടതി കേസെടുത്തു. ഓറിയോ, ചിപ്സ് അഹോയ്, വീറ്റ് തിൻസ് തുടങ്ങിയ ഉത്പന്നങ്ങളുടെ പാക്കേജിംഗുമായി ആൽഡിയുടെ സ്വന്തം ബ്രാൻഡ് ഉത്പന്നങ്ങളുടെ പാക്കേജിംഗിന് വളരെയധികം സാമ്യമുണ്ടെന്നും ഇത് ഉപഭോക്താക്കൾക്കിടയിൽ ആശയക്കുഴപ്പമുണ്ടാക്കുന്നുവെന്നും മോണ്ടെലെസ് ആരോപിക്കുന്നു.
മോണ്ടെലെസ് സമർപ്പിച്ച കേസ് രേഖകളിൽ, ആൽഡിയുടെ ചോക്ലേറ്റ് സാൻഡ്വിച്ച് കുക്കികളും ഓറിയോയും സമാനമായ നീല പാക്കേജിംഗിൽ ലഭ്യമാണെന്ന് ചൂണ്ടിക്കാട്ടുന്നു. കൂടാതെ, ആൽഡിയുടെ തിൻ വീറ്റ് ഉത്പന്നം വീറ്റ് തിൻസിന് സമാനമായ സ്വർണ്ണ നിറത്തിലുള്ള ബോക്സിലും, ഗോൾഡൻ റൗണ്ട് ഉത്പന്നം റിറ്റ്സ് ക്രാക്കേഴ്സിന് സമാനമായ ചുവന്ന ബോക്സിലും വിൽക്കുന്നുണ്ടെന്നും ആരോപണമുണ്ട്.
ഇത്തരം സാമ്യങ്ങൾ തങ്ങളുടെ ബ്രാൻഡിന്റെ പ്രശസ്തിക്ക് കോട്ടം വരുത്തുന്നതായി മോണ്ടെലെസ് അവകാശപ്പെടുന്നു. ആൽഡിക്ക് പലതവണ മുന്നറിയിപ്പുകൾ നൽകിയിട്ടും ചില ഉത്പന്നങ്ങളുടെ പാക്കേജിംഗിൽ മാറ്റങ്ങൾ വരുത്തിയിട്ടില്ലെന്നും മോണ്ടെലെസ് പറയുന്നു. സാമ്പത്തിക നഷ്ടപരിഹാരവും സമാനമായ ഉത്പന്നങ്ങൾ വിൽക്കുന്നത് നിർത്താൻ കോടതി ഉത്തരവും മോണ്ടെലെസ് ആവശ്യപ്പെട്ടിട്ടുണ്ട്. കുറഞ്ഞ വിലയിൽ സ്വന്തം ബ്രാൻഡ് ഉത്പന്നങ്ങൾ വിൽക്കുന്നതിൽ പ്രശസ്തരായ ആൽഡിക്ക് ഓസ്ട്രേലിയയിലും യു.കെയിലും സമാനമായ കേസുകൾ മുൻപും നേരിടേണ്ടി വന്നിട്ടുണ്ട്.
