ആൽബർട്ടയിലെ സ്ട്രാത്മോർ പട്ടണത്തിനു സമീപമുള്ള ഒരു സോളാർ ഫാം ഈ വേനൽക്കാലത്ത് പുതിയ ചരിത്രം സൃഷ്ടിക്കുകയാണ് . പ്രതിദിനം 40 മെഗാവാട്ട് വൈദ്യുതി ഉത്പാദിപ്പിക്കുന്നതിനൊപ്പം മുട്ട, തേൻ, മാംസം, കമ്പിളി എന്നിവയും ഉത്പാദിപ്പിക്കുന്നു. എഡ്മണ്ടൺ ആസ്ഥാനമായുള്ള ക്യാപിറ്റൽ പവറിന്റെ ഉടമസ്ഥതയിലുള്ള ഈ പ്രോജക്ട് കാർഷിക പ്രവർത്തനങ്ങളെ നേരിട്ട് സോളാർ ഓപ്പറേഷനുകളിലേക്ക് സംയോജിപ്പിച്ചുകൊണ്ട് പരമ്പരാഗത സോളാർ മാതൃകയെ മാറ്റിമറിക്കുന്നു.
130 ഹെക്ടറിൽ വ്യാപിച്ചുകിടക്കുന്ന 110,000 സോളാർ പാനലുകൾ സ്ഥാപിച്ചിരിക്കുന്ന ഈ സ്ഥലത്ത് ഇപ്പോൾ 400 ആടുകൾ, 40 പന്നികൾ, 100 കോഴികൾ, നിരവധി തേനീച്ച കൂടുകളും ഉണ്ട്. മാനിറ്റോബ സ്റ്റാർട്ടപ്പായ UKKÖ റോബോട്ടിക്സ് ഡിസൈൻ ചെയ്ത മൊബൈൽ അനിമൽ ഹൗസിംഗ് ഉപയോഗിക്കുന്നതാണ് ഈ നവീകരണ സമീപനത്തിന്റെ പ്രത്യേകത.മൃഗങ്ങളെ ഒരു കെട്ടിടത്തിൽ പാർപ്പിക്കുന്നതിനൊപ്പം പുതിയ പുല്ല് മേയാനും ഭൂമിയിൽ വളം തുല്യമായി വിതരണം ചെയ്യാനും വേണ്ടിയാണ് ഈ ആശയം. ദിവസത്തിൽ പല തവണ കൂപ്പ് പതുക്കെ ചെറിയ അകലത്തിൽ നീങ്ങുന്നു, സാധാരണയായി ഒരു സമയത്ത് അര മീറ്റർ വീതം. ഇത് മൃഗങ്ങൾക്ക് പുതിയ പുല്ലിലേക്ക് നിരന്തര പ്രവേശനം നൽകുകയും ഭൂമിയിൽ ഉടനീളം വളം തുല്യമായി വിതരണം ചെയ്യുകയും ചെയ്യുന്നു.
സോളാർ സൈറ്റിൽ ഇത്തരം സാങ്കേതികവിദ്യ വിന്യസിക്കുന്നത് ഇതാദ്യമാണ്. വടക്കേ അമേരിക്കയിൽ സമാനമായ സംയോജനങ്ങൾക്ക് ഇത് ഒരു ടെസ്റ്റ് കേസ് നൽകുന്നു.
കാർഷിക കൂട്ടിച്ചേർക്കൽ വെറും പുതുമയ്ക്ക് വേണ്ടി മാത്രമല്ല. കാർഷിക ഭൂമിയിലെ സോളാർ വികസനത്തെക്കുറിച്ചുള്ള വർദ്ധിച്ചുവരുന്ന ആശങ്കകൾക്കുള്ള തന്ത്രപരമായ പ്രതികരണമാണിത്. ആൽബർട്ടയിലെയും ഒന്റാറിയോയിലെയും സമീപകാല നിയന്ത്രണങ്ങൾ ഇപ്പോൾ സോളാർ പ്രോജക്ടുകൾ ചില രൂപത്തിലുള്ള കാർഷിക പ്രവർത്തനങ്ങൾ ഉൾപ്പെടുത്തണമെന്ന് ആവശ്യപ്പെടുന്നു, പ്രത്യേകിച്ച് കൃഷിയോഗ്യമായ ഭൂമിയിൽ.
സോളാർ ഷിപ്പിന്റെ സഹസ്ഥാപകയും സൈറ്റിലെ കന്നുകാലി പ്രവർത്തനങ്ങളുടെ മാനേജറുമായ ജന്ന ഗ്രിയർ വിശ്വസിക്കുന്നത് രണ്ട് വ്യവസായങ്ങൾക്കും ഒരുമിച്ച് അഭിവൃദ്ധി പ്രാപിക്കാൻ കഴിയുമെന്നാണ്. “എല്ലാ പാനലിന്റെയും കീഴിൽ കൃഷി” എന്നതാണ് അവരുടെ വിഷൻ. മണ്ണിന്റെ ഗുണനിലവാരം സംരക്ഷിക്കുകയും അത് മെച്ചപ്പെടുത്തുകയും ചെയ്യുന്നതിനൊപ്പം കൂടുതൽ ഭക്ഷണം ഉത്പാദിപ്പിക്കുകയും ചെയ്യുന്നു.
ഈ ഹൈബ്രിഡ് പ്രോജക്ടിൽ തേനീച്ചകളും ഒരു പ്രധാന പങ്ക് വഹിക്കുന്നു. കാൽഗറി സ്റ്റാർട്ടപ്പായ ബീ ക്യൂബ് സൈറ്റിൽ ഒരു മൊബൈൽ ഇൻഡോർ ആപ്പിയറി സ്ഥാപിച്ചിട്ടുണ്ട്. കാലാവസ്ഥ നിയന്ത്രിതവും സെൻസർ ഘടിപ്പിച്ചതുമായ കെട്ടിടത്തിൽ 20 വരെ കൂടുകൾ സ്ഥാപിച്ചിട്ടുണ്ട്. ഡാറ്റ മോണിറ്ററിംഗിലൂടെയും ഒടുവിൽ കൃത്രിമബുദ്ധിയിലൂടെയും തേനീച്ചകളുടെ ആരോഗ്യം മെച്ചപ്പെടുത്താൻ ഈ ഹൈടെക് തേനീച്ച വളർത്തൽ സെറ്റപ്പ് ലക്ഷ്യമിടുന്നു. തേൻ ഉത്പാദനത്തിനുപരിയായി സോളാർ ഫീൽഡിൽ ഉടനീളം നട്ടുപിടിപ്പിച്ച പൂക്കളുടെ പരാഗണത്തിനും തേനീച്ചകൾ സഹായിക്കും.
സോളാർ മാനേജർ വേഡ് ഹ്യൂഷർ പറയുന്നത് “സാധാരണയായി നമ്മൾ ഒരു ഭൂമി എടുത്ത് അതിനെ സോളാർ ഫാമാക്കുമ്പോൾ അത് മറ്റൊന്നിനും ഉപയോഗിക്കാൻ കഴിയാതാകും. എന്നാൽ ഞങ്ങൾ ഇവിടെ വ്യത്യസ്തമായ ഒന്ന് കാണിക്കുകയാണ്”. “ഇതാണ് ഭാവിയുടെ വഴി. എല്ലാ സോളാർ കമ്പനികളും ഇതുപോലെയുള്ള പങ്കാളിത്തം പരിഗണിക്കേണ്ടതാണെന്ന് ഞാൻ കരുതുന്നു.”ഹ്യൂഷർ കൂട്ടിച്ചേർത്തു.
സ്ട്രാത്മോർ പ്രോജക്ട് വിജയകരമാകുകയാണെങ്കിൽ കാനഡയിലും അമേരിക്കയിലും സമാനമായ സോളാർ-കാർഷിക സംയോജന പദ്ധതികൾക്ക് അത് വഴി തുറക്കും. പുനരുപയോഗ ഊർജ്ജവും കൃഷിയും തമ്മിലുള്ള സഹകരണത്തിലൂടെ പരിസ്ഥിതി സംരക്ഷണവും ഭക്ഷ്യ സുരക്ഷയും ഒരുമിച്ച് കൈവരിക്കാനാകുമെന്ന് ഈ പരീക്ഷണം തെളിയിക്കുന്നു.
