ഒട്ടാവ: കാനഡയിലെ ലിബറൽ പാർട്ടിയുടെ അടുത്ത ദേശീയ സമ്മേളനം 2026 ഏപ്രിൽ 9 മുതൽ 11 വരെ മോണ്ട്രിയലിൽ നടക്കുമെന്ന് ലിബറൽ പാർട്ടിയുടെ ദേശീയ ബോർഡ് അറിയിച്ചു. പ്രധാന മന്ത്രിയും പാർട്ടി നേതാവുമായ മാർക്ക് കാർണി തന്റെ ആദ്യ പാർട്ടി സമ്മേളനത്തിന് അധ്യക്ഷത വഹിക്കും. 2025 മാർച്ച് 9-ന് നടന്ന നേതൃത്വ തിരഞ്ഞെടുപ്പിൽ ആദ്യ വോട്ടെടുപ്പിൽ തന്നെ വിജയിച്ച കാർണി, ഒരു വർഷത്തിനു ശേഷം നടക്കുന്ന ഈ സമ്മേളനത്തിൽ പാർട്ടിയുടെ ഭാവി നയങ്ങൾ വിശദീകരിക്കുമെന്ന് പ്രതീക്ഷിക്കപ്പെടുന്നുണ്ട്.
സമ്മേളനത്തിൽ നയ സംബന്ധിച്ച ചർച്ചകളും മുഖ്യാതിഥികളുടെ പ്രസംഗങ്ങളും നടക്കും. അതോടൊപ്പം അടുത്ത ദേശീയ ബോർഡ് അംഗങ്ങളെ അംഗങ്ങൾ തിരഞ്ഞെടുക്കും.
പാർട്ടിയുടെ നയപരമായ ദിശ നിർണയിക്കുന്നതിൽ ഈ സമ്മേളനത്തിന് നിർണായക പങ്കുണ്ടാകുമെന്ന് രാഷ്ട്രീയ നിരീക്ഷകർ വിലയിരുത്തുന്നു. 2023-ൽ രാജ്യ തലസ്ഥാനത്ത് നടന്ന മുൻ സമ്മേളനത്തിൽ ഏകദേശം 4,000 കനേഡിയൻ പൗരന്മാർ പങ്കെടുത്തിരുന്നു, എന്നാൽ 2026-ലെ സമ്മേളനത്തിൽ കൂടുതൽ പേർ പങ്കെടുക്കുമെന്നാണ് പ്രതീക്ഷ.
പ്രതിപക്ഷമായ കൺസർവേറ്റീവ് പാർട്ടി അവരുടെ അടുത്ത സമ്മേളന തീയതി ഇതുവരെ പ്രഖ്യാപിച്ചിട്ടില്ല. രാജ്യത്തിന്റെ ഭാവി നയങ്ങൾ രൂപീകരിക്കുന്നതിൽ ലിബറൽ പാർട്ടിക്ക് മുന്നിട്ട് നിൽക്കാനുള്ള ശ്രമങ്ങളുടെ ഭാഗമായാണ് ഈ സമ്മേളനം വിളിച്ചുചേർക്കുന്നതെന്ന് രാഷ്ട്രീയ വിദഗ്ധർ ചൂണ്ടിക്കാട്ടുന്നു. കാർണിയുടെ നേതൃത്വത്തിൽ എങ്ങനെ പാർട്ടി മുന്നോട്ട് പോകുമെന്നുള്ള സൂചനകൾ ഈ സമ്മേളനത്തിൽ ലഭിക്കുമെന്ന് പ്രതീക്ഷിക്കപ്പെടുന്നു.
