കാനഡയിൽ നിലവിൽ ഏറ്റവും കൂടുതൽ വളർച്ച രേഖപ്പെടുത്തുന്ന 15 തൊഴിൽ മേഖലകളുടെ പട്ടിക പ്രമുഖ പ്രൊഫഷണൽ നെറ്റ്വർക്കിങ് പ്ലാറ്റ്ഫോമായ LinkedIn പുറത്തുവിട്ടു. കഴിഞ്ഞ മൂന്ന് വർഷത്തെ ഉപഭോക്തൃ വിവരങ്ങൾ വിശകലനം ചെയ്ത് തയ്യാറാക്കിയ ‘ജോബ്സ് ഓൺ ദി റൈസ്’ റിപ്പോർട്ടിലാണ് ഇക്കാര്യം വ്യക്തമാക്കുന്നത്. തൊഴിൽ വിപണിയിൽ ആർട്ടിഫിഷ്യൽ ഇന്റലിജൻസ് ചെലുത്തുന്ന സ്വാധീനം പട്ടികയിൽ പ്രകടമാണെന്ന് റിപ്പോർട്ടിലുണ്ട്.
പട്ടികയിലെ ആദ്യ രണ്ട് സ്ഥാനങ്ങളിലും ആർട്ടിഫിഷ്യൽ ഇന്റലിജൻസ് മേഖലയിലെ തൊഴിലുകളാണ് ഇടംപിടിച്ചിരിക്കുന്നത്. AI മോഡലുകൾ വികസിപ്പിക്കുന്ന ‘ആർട്ടിഫിഷ്യൽ ഇന്റലിജൻസ് എഞ്ചിനീയർമാർ’ ഒന്നാം സ്ഥാനത്തും, സ്ഥാപനങ്ങളെ AI സാങ്കേതികവിദ്യ ഉപയോഗിക്കാൻ സഹായിക്കുന്ന ‘AI കൺസൾട്ടന്റുമാർ’ രണ്ടാം സ്ഥാനത്തുമുണ്ട്. എഐ/മെഷീൻ ലേണിംഗ് റിസർച്ചർമാർ പട്ടികയിൽ നാലാം സ്ഥാനത്താണ്. സാങ്കേതിക മേഖലയ്ക്ക് പുറമെ നിർമ്മാണം, ആരോഗ്യം, സെയിൽസ് എന്നീ മേഖലകളിലും വലിയ വളർച്ചയുള്ളതായി ലിങ്ക്ഡ്ഇൻ അറിയിച്ചു.
വൈദ്യുത സംവിധാനങ്ങൾ രൂപകൽപ്പന ചെയ്യുന്ന പവർ സിസ്റ്റംസ് എഞ്ചിനീയർമാരും എൻജിനീയറിങ് പദ്ധതികൾ പരിശോധിക്കുന്ന കമ്മീഷനിംഗ് മാനേജർമാരും ആദ്യ അഞ്ച് സ്ഥാനങ്ങളിൽ ഉൾപ്പെടുന്നു. ചീഫ് പ്രൊഡക്റ്റ് ഓഫീസർമാർ, ക്ലിനിക്കൽ സർവീസ് മാനേജർമാർ, ഫ്രോഡ് ഇൻവെസ്റ്റിഗേറ്റർമാർ, കൺസ്ട്രക്ഷൻ മാനേജർമാർ എന്നിവരാണ് തൊഴിൽ വളർച്ചയിൽ തൊട്ടുപിന്നിലുള്ളത്. പുതിയ സംരംഭങ്ങൾ തുടങ്ങുന്ന ഫൗണ്ടർമാർ പട്ടികയിൽ പത്താം സ്ഥാനത്തുണ്ട്.
കാർ സെയിൽസ് മാനേജർമാർ, ഹൃദ്രോഗ വിദഗ്ധരായ കാർഡിയോളജിസ്റ്റുകൾ, ഐടി സപ്പോർട്ട് സ്പെഷ്യലിസ്റ്റുകൾ എന്നിവരും കാനഡയിലെ വളരുന്ന തൊഴിൽ മേഖലകളിൽ ഉൾപ്പെടുന്നു. മാനസികാരോഗ്യ രംഗത്ത് കൗൺസിലിംഗ് നൽകുന്ന സൈക്കോതെറാപ്പിസ്റ്റുകൾ പതിനാലാം സ്ഥാനത്താണ്. ഡാറ്റാ മാനേജ്മെന്റ് രംഗത്തെ ഡാറ്റാബേസ് അനലിസ്റ്റുകളാണ് പതിനഞ്ചാം സ്ഥാനത്തുള്ളത്.
തൊഴിൽ മേഖലകളിൽ വലിയ മാറ്റങ്ങൾ സംഭവിച്ചുകൊണ്ടിരിക്കുന്ന സാഹചര്യത്തിൽ പുതിയ അവസരങ്ങൾ തിരിച്ചറിയുന്നത് ഉദ്യോഗാർത്ഥികൾക്ക് ഗുണകരമാകുമെന്ന് ലിങ്ക്ഡ്ഇൻ വിലയിരുത്തി. സാങ്കേതിക വിദ്യക്കൊപ്പം തന്ത്രപ്രധാനമായ ആസൂത്രണ മികവ് ആവശ്യമുള്ള തസ്തികകളിലേക്കും കാനഡയിൽ ആവശ്യക്കാർ ഏറുന്നതായാണ് റിപ്പോർട്ടിലെ കണ്ടെത്തലുകൾ വ്യക്തമാക്കുന്നത്.
കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt
These 15 jobs will be in high demand in Canada! LinkedIn releases list
