ഒട്ടാവ: കാനഡ ഫെഡറൽ സർക്കാരിന്റെ ചെലവ് ചുരുക്കൽ പദ്ധതിയുടെ ഭാഗമായി പ്രഖ്യാപിച്ച പ്രത്യേക സ്വയം വിരമിക്കൽ ആനുകൂല്യത്തിനായി ഏകദേശം 10,000 ജീവനക്കാർ അപേക്ഷ നൽകി. ജൂലൈ 24-ന് അവസാനിച്ച പദ്ധതി പ്രകാരം, മുൻകൂട്ടി വിരമിക്കുമ്പോൾ സാധാരണയായി ഉണ്ടാകുന്ന പെൻഷൻ വെട്ടിക്കുറവ് ഒഴിവാക്കി നൽകുമെന്ന പ്രഖ്യാപനമാണ് കൂടുതൽ പേരെ ആകർഷിച്ചത്. യോഗ്യരായ 68,000 ജീവനക്കാരിൽ നിന്നാണ് ഈ അപേക്ഷകൾ ലഭിച്ചത്. 2025-ലെ ബജറ്റിൽ മാർക്ക് കാർണി സർക്കാർ പ്രഖ്യാപിച്ച മൂന്ന് വർഷത്തെ പദ്ധതിയുടെ ഭാഗമായാണ് പൊതുമേഖലയിലെ ജീവനക്കാരുടെ ഏകദേശം 16,000 ജോലികൾ കുറയ്ക്കുന്നത്.
അടുത്ത അഞ്ച് വർഷത്തിനിടെ 1.5 ബില്യൺ ഡോളർ ചെലവ് പ്രതീക്ഷിക്കുന്ന ഈ പദ്ധതിയിലൂടെ പെൻഷൻ വിഹിതം കുറയുന്ന വഴി പ്രതിവർഷം 82 മില്യൺ ഡോളർ ലാഭിക്കാൻ കഴിയുമെന്നാണ് സർക്കാരിന്റെ കണക്കുകൂട്ടൽ. ജൂലൈ 28 വരെയുള്ള കണക്കനുസരിച്ച് ലഭിച്ച 10,006 അപേക്ഷകളിൽ 6,855 എണ്ണം പൂർണ്ണമായും യോഗ്യമാണെന്ന് സർക്കാർ സ്ഥിരീകരിക്കുകയും 41 അപേക്ഷകൾ തള്ളുകയും ചെയ്തു. പൊതുസേവന മേഖലയിലെ ആകെ ജീവനക്കാരുടെ എണ്ണം 2027 മാർച്ച് മാസത്തോടെ 3.3 ലക്ഷമായി ക്രമീകരിക്കാനാണ് സർക്കാർ ലക്ഷ്യമിടുന്നത്. അപേക്ഷകളുടെ പൂർണ്ണമായ പരിശോധന പൂർത്തിയാക്കി 2027-ന്റെ തുടക്കത്തിൽ അന്തിമ വിവരങ്ങൾ പുറത്തുവിടും.
അതേസമയം, യൂണിയനുകളുമായി യാതൊരുവിധ മുൻകൂടിയാലോചനകളും നടത്താതെയാണ് സർക്കാർ പദ്ധതി നടപ്പാക്കിയതെന്ന് ആരോപിച്ച് പ്രൊഫഷണൽ ഇൻസ്റ്റിറ്റ്യൂട്ട് ഓഫ് ദ പബ്ലിക് സർവീസ് ഓഫ് കാനഡ (PIPSC), പബ്ലിക് സർവീസ് അലയൻസ് എന്നീ സംഘടനകൾ ഫെഡറൽ ലേബർ റിലേഷൻസ് ട്രൈബ്യൂണലിൽ പരാതി നൽകി. പരിചയസമ്പന്നരായ ജീവനക്കാർ പെട്ടെന്ന് വിരമിക്കുന്നത് പൊതുസേവന മേഖലയുടെ പ്രവർത്തനക്ഷമതയെ സാരമായി ബാധിക്കുമെന്നും സർക്കാരിന്റെ ദൈനംദിന സേവനങ്ങൾ തടസ്സപ്പെടുമെന്നും യൂണിയൻ നേതൃത്വം ആശങ്ക പ്രകടിപ്പിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Government moves to cut costs; 10,000 federal employees in Canada apply for voluntary retirement.
