ഒന്റാറിയോയിലെ കോടതികളിൽ അടുത്തിടെയായി വർദ്ധിച്ചുവരുന്ന ‘സൂം ബോംബിംഗ്’ സംഭവങ്ങളെ തുടർന്ന് പൊതുജനങ്ങൾക്ക് വിർച്വലായി കോടതി നടപടികളിൽ പങ്കെടുക്കുന്നതിന് വിലക്കേർപ്പെടുത്തി. ഓൺലൈൻ യോഗങ്ങളിൽ അതിക്രമിച്ചു കടന്ന് അനാവശ്യ ചിത്രങ്ങളും ശബ്ദങ്ങളും മറ്റും ഉപയോഗിച്ച് തടസ്സപ്പെടുത്തുന്ന പ്രവണതയാണ് ‘സൂം ബോംബിംഗ്’ എന്നറിയപ്പെടുന്നത്. ഈ വിഷയത്തിൽ, അസിസ്റ്റന്റ് ഡെപ്യൂട്ടി അറ്റോർണി ജനറൽ കേറ്റി വുഡ് കോടതി ജീവനക്കാർക്ക് അയച്ച മെമ്മോയിൽ, ഒന്റാറിയോ കോർട്ട് ഓഫ് ജസ്റ്റിസിലെ നടപടികൾ വെർച്വലായി നിരീക്ഷിക്കാൻ പൊതുജനങ്ങളെ അനുവദിക്കില്ലെന്ന് വ്യക്തമാക്കി. പൊതുജനങ്ങൾക്ക് കോടതി നടപടികളിൽ പങ്കെടുക്കണമെങ്കിൽ നേരിട്ട് ഹാജരാകേണ്ടി വരുമെന്നും മെമ്മോയിൽ പറയുന്നു.
അതേസമയം, ഒന്റാറിയോ സുപ്പീരിയർ കോർട്ട് ഓഫ് ജസ്റ്റിസ് പൊതുജനങ്ങൾക്ക് വെർച്വലായി നടപടികൾ നിരീക്ഷിക്കാൻ അനുമതി നൽകുന്നത് തുടരും. അഞ്ച് വർഷം മുമ്പ് പൊട്ടിപ്പുറപ്പെട്ട കോവിഡ്-19 മഹാമാരിയുടെ സമയത്താണ് വെർച്വൽ കോടതി ഹിയറിംഗുകൾ സാധാരണമായത്. അതിനുശേഷം ‘സൂം ബോംബിംഗ്’ ഉൾപ്പെടെയുള്ള പ്രശ്നങ്ങൾ വർദ്ധിച്ചുവരുന്നത് ആശങ്ക സൃഷ്ടിച്ചിരുന്നു. “അപകീർത്തികരമായ ഉള്ളടക്കങ്ങളും ലക്ഷ്യമിട്ടുള്ള സ്വഭാവരീതികളും ഉൾപ്പെടുന്ന സൂം ബോംബിംഗ് സംഭവങ്ങൾ കോടതി നടപടികൾക്ക് തടസ്സമുണ്ടാക്കിയിട്ടുണ്ട്” എന്ന് വുഡിന്റെ മെമ്മോയിൽ പറയുന്നു.
വിൻഡ്സറിലെ പ്രതിരോധ അഭിഭാഷകനായ ഗൈറ്റിസ് പാബെഡിൻസ്കാസ്, സൂം ബോംബിംഗ് നടന്ന രണ്ട് അവസരങ്ങളിൽ കോടതിയിൽ സന്നിഹിതനായിരുന്നു. “വെർച്വൽ അക്കൗണ്ട് തുറന്നപ്പോൾ അശ്ലീല വീഡിയോ പ്രദർശിപ്പിക്കുകയും, ജഡ്ജിയെ അസഭ്യം പറയുന്ന ശബ്ദം കേൾക്കുകയും ചെയ്തു,” പാബെഡിൻസ്കാസ് അനുഭവം പങ്കുവെച്ചു. ഇത്തരം സംഭവങ്ങൾ അസ്വസ്ഥതയുണ്ടാക്കുന്നതാണെങ്കിലും, പൊതുജനങ്ങൾക്ക് വെർച്വൽ പ്രവേശനം പൂർണ്ണമായി നിരോധിക്കുന്നതിന് പകരം, സാങ്കേതികവിദ്യ കൂടുതൽ മികച്ച രീതിയിൽ ഉപയോഗിച്ച് തടസ്സങ്ങൾ ഒഴിവാക്കാമായിരുന്നു എന്ന് പ്രാദേശിക പ്രതിരോധ അഭിഭാഷകനായ ലോറ ജോയ് അഭിപ്രായപ്പെട്ടു. കനേഡിയൻ നീതിന്യായ വ്യവസ്ഥയുടെ അടിസ്ഥാന തത്വമായ സുതാര്യതയും തുറന്ന കോടതികളും നിലനിർത്തേണ്ടത് പ്രധാനമാണെന്നും അവർ ഓർമ്മിപ്പിച്ചു.
വിൻഡ്സർ സർവ്വകലാശാലയിലെ നിയമ വിഭാഗം അസോസിയേറ്റ് പ്രൊഫസർ നോയൽ സെമ്പിളും പൊതുജനങ്ങൾക്ക് കോടതികളിൽ വെർച്വൽ പ്രവേശനം നിഷേധിക്കുന്നത് പ്രശ്നകരമാണെന്ന് ചൂണ്ടിക്കാട്ടി. “തുറന്ന കോടതി എന്ന തത്വം കനേഡിയൻ നിയമവ്യവസ്ഥയുടെ അടിസ്ഥാനപരമായ ഒന്നാണ്. നീതി സ്വകാര്യമായി ഇരുണ്ട മുറികളിൽ നടക്കേണ്ടതല്ല, അത് പരസ്യമായി ചെയ്യേണ്ടതാണ്. ആ തത്വം മാനിക്കാൻ കഴിയുന്നതെല്ലാം നമ്മൾ ചെയ്യണം,” അദ്ദേഹം പറഞ്ഞു. കോടതി കാര്യങ്ങളിൽ വെർച്വലായി ഹാജരാകാൻ ആഗ്രഹിക്കുന്ന ഇരകളോ പരാതിക്കാരോ മുൻകൂർ അനുമതി തേടണമെന്ന് വുഡിന്റെ മെമ്മോയിൽ പറയുന്നു. മാധ്യമങ്ങൾക്കും വെർച്വലായി കോടതി നടപടികൾ നിരീക്ഷിക്കാൻ അനുമതി തേടേണ്ടതുണ്ട്. തിരുത്തൽ സ്ഥാപനങ്ങൾ, ഇന്റർപ്രെട്ടർമാർ, അല്ലെങ്കിൽ പോലീസ് ഡിപ്പാർട്ട്മെന്റുകൾ എന്നിവയായി ആൾമാറാട്ടം നടത്തുന്ന ‘സൂം ബോംബർമാരുടെ തന്ത്രങ്ങളെക്കുറിച്ച്’ കോടതി ജീവനക്കാർക്ക് മെമ്മോ മുന്നറിയിപ്പ് നൽകുന്നുണ്ട്.
അറ്റോർണി ജനറൽ മന്ത്രാലയത്തിന്റെ വക്താവ് പ്രസ്താവനയിൽ അറിയിച്ചത്, ഒന്റാറിയോ കോർട്ട് ഓഫ് ജസ്റ്റിസ് ഒബ്സർവർ പോളിസി ഓൺലൈനിൽ ലഭ്യമാണെന്നും, പൊതുജനങ്ങൾക്ക് നേരിട്ട് കോടതിയിൽ ഹാജരാകാൻ അനുവാദമുണ്ടെന്നുമാണ്. അതേസമയം, പ്രതിരോധ അഭിഭാഷകയായ ലിൻഡ മക്കർഡി വെർച്വൽ പ്രവേശനം നീക്കം ചെയ്തതിനെ സ്വാഗതം ചെയ്തു. ഏകദേശം 30 വർഷമായി നിയമരംഗത്ത് പ്രവർത്തിക്കുന്ന മക്കർഡിക്ക് വെർച്വൽ കോടതി നടപടികൾ പുതിയ അനുഭവമാണ്. “ഇതൊരു നിയന്ത്രണമായോ എന്തെങ്കിലും എടുത്തുമാറ്റുന്നതായോ ഞാൻ കാണുന്നില്ല,” വുഡിന്റെ പ്രഖ്യാപനത്തെക്കുറിച്ച് അവർ പറഞ്ഞു. “കോടതി നടപടികൾക്ക് തടസ്സങ്ങൾ ഉണ്ടാകാതിരിക്കാൻ ഇത് സഹായിക്കും. നിങ്ങൾക്ക് പങ്കെടുക്കണമെങ്കിൽ, കോടതിയിലേക്ക് നേരിട്ട് വരിക,” അവർ കൂട്ടിച്ചേർത്തു.
കോവിഡ്-19 മഹാമാരിക്ക് ശേഷം ഔപചാരികതകൾ കുറഞ്ഞുവരുന്നത് താൻ കണ്ടിട്ടുണ്ടെന്നും, വെർച്വലായി ഹാജരാകുന്ന സാക്ഷികൾ കിടക്കയിൽ കിടക്കുന്നതും നായ്ക്കളെ നടത്തുന്നതും ശുചിമുറിയിൽ പോകുന്നതുമെല്ലാം താൻ കേട്ടിട്ടുണ്ടെന്നും അവർ പറഞ്ഞു. “അവർക്ക് ഇതിനെ ഗൗരവമായി കാണാൻ കഴിയുന്നില്ല.”
