അമേരിക്കൻ പ്രസിഡന്റ് ഡൊണാൾഡ് ട്രംപും ടെസ്ല സിഇഒ എലൺ മസ്കും തമ്മിലുള്ള രാഷ്ട്രീയ തർക്കം പുതിയ വഴിത്തിരിവിലേക്ക് നീങ്ങുന്നു. ട്രംപിന്റെ വിവാദപരമായ ബിഗ് ബ്യൂട്ടിഫുൾ ബില്ലിനെതിരായ മസ്കിന്റെ കടുത്ത വിമർശനങ്ങൾക്കിടയിലും, ഫോക്സ് ന്യൂസിന് നൽകിയ അഭിമുഖത്തിൽ പ്രസിഡന്റ് മസ്കിനെ “അതിശയകരമായ വ്യക്തി” എന്ന് വിശേഷിപ്പിച്ചത് വളരെ ശ്രദ്ധ നേടിയിരിക്കുകയാണ്.
“അദ്ദേഹം ബുദ്ധിമാനാണ്, എല്ലായ്പ്പോഴും മികച്ച പ്രകടനം കാഴ്ചവയ്ക്കും” എന്നും ട്രംപ് കൂട്ടിച്ചേർത്തു.
ട്രംപിന്റെ പ്രസിഡൻഷ്യൽ ഉപദേഷ്ടാവായി 2025 മെയ് വരെ സേവനമനുഷ്ഠിച്ച മസ്ക്, വൈറ്റ് ഹൗസ് വിട്ടതിനുശേഷം അദ്ദേഹത്തിന്റെ നയങ്ങളോട് ശക്തമായ വിയോജിപ്പ് പ്രകടിപ്പിച്ചിരുന്നു . പ്രത്യേകിച്ച്, ഇലക്ട്രിക് വാഹന നികുതി ക്രെഡിറ്റ് റദ്ദാക്കിയത് തന്നെ അസ്വസ്ഥനാക്കിയെന്ന് ട്രംപ് പറഞ്ഞിരുന്നു. എന്നാൽ, മസ്ക് ഈ ആരോപണം നേരത്തെ തന്നെ നിഷേധിച്ചിരുന്നു. സെനറ്റിന്റെ പുതിയ നികുതി-ചെലവ് ബില്ലിനെ “പൂർണ്ണമായും ഭ്രാന്തമായതും വിനാശകരവും” എന്ന് വിശേഷിപ്പിച്ച് മസ്ക് സോഷ്യൽ മീഡിയയിൽ രൂക്ഷമായി വിമർശിച്ചു.
ഏകദേശം 1000 പേജുകളുള്ള ഈ നിർദ്ദേശത്തെ മസ്ക് “വെറുപ്പുളവാക്കുന്ന മ്ലേച്ഛത” എന്നാണ് വിശേഷിപ്പിച്ചത്. ഇത് അമേരിക്കയിൽ ദശലക്ഷക്കണക്കിന് തൊഴിലവസരങ്ങൾ ഇല്ലാതാക്കുമെന്നും രാജ്യത്തിന് തന്ത്രപരമായ ദോഷം വരുത്തുമെന്നും അദ്ദേഹം മുന്നറിയിപ്പ് നൽകി. എന്നാൽ, മസ്കിന്റെ എതിർപ്പുകൾക്കിടയിലും 51-49 വോട്ടുകൾക്ക് സെനറ്റിൽ ബിൽ പാസായി. ഇത് ഇനി ഹൗസ് ഓഫ് റെപ്രസന്റേറ്റീവ്സിൽ അന്തിമ വോട്ടെടുപ്പിനായി എത്തും.
ഈ പൊതു തർക്കം അമേരിക്കൻ രാഷ്ട്രീയത്തിൽ പുതിയ ചർച്ചകൾക്ക് വഴിയൊരുക്കുന്നുണ്ട്. എന്നിരുന്നാലും, ട്രംപിന്റെ പ്രശംസാ പരാമർശങ്ങൾ ഭാവിയിൽ ഇരുവരും തമ്മിലുള്ള സഹകരണത്തിന് സാധ്യത തുറന്നിടുന്നുവെന്ന വിലയിരുത്തലുകളും ഉയരുന്നുണ്ട്.
