ഷോണാവൺ: മഞ്ഞുകാലം ആരംഭിച്ചതോടെ തെക്കുപടിഞ്ഞാറൻ സസ്കാച്ചവനിൽ ശ്വാസകോശ സംബന്ധമായ അസുഖങ്ങൾ അതിവേഗം പടരുന്നതായി റിപ്പോർട്ട്. കോവിഡ്-19, ഇൻഫ്ലുവൻസ, റെസ്പിറേറ്ററി സിൻസിറ്റിയൽ വൈറസ് (RSV) എന്നിവ ബാധിക്കുന്നവരുടെ എണ്ണത്തിൽ വലിയ വർധനവാണ് രേഖപ്പെടുത്തുന്നത്. ഇത് സസ്കാച്ചവനിൽ മാത്രമല്ല, കാനഡയിലുടനീളം പ്രകടമാണെന്ന് പബ്ലിക് ഹെൽത്ത് മെഡിക്കൽ ഓഫീസർ ഡോ. ഡേവിഡ് ടോർ അറിയിച്ചു.
നിലവിൽ ഈ മൂന്ന് വൈറസുകളാണ് പവിശ്യയിൽ പ്രധാനമായും പടരുന്നത്. രോഗബാധിതരുടെ എണ്ണം കൃത്യമായി തിട്ടപ്പെടുത്താൻ കഴിയാത്തവിധം വേഗത്തിലാണ് രോഗം പടരുന്നത്. പ്രായമായവരിലും കുട്ടികളിലും ഒരുപോലെ കഠിനമായ ആരോഗ്യപ്രശ്നങ്ങൾ ഉണ്ടാക്കാൻ ഈ വൈറസുകൾക്ക് സാധിക്കുമെന്നത് ആശങ്ക വർദ്ധിപ്പിക്കുന്നുണ്ട്. ഒന്റാറിയോയിൽ ഇൻഫ്ലുവൻസ ബാധിച്ച് മൂന്ന് മരണം റിപ്പോർട്ട് ചെയ്ത സാഹചര്യം നിലവിലുണ്ടെങ്കിലും, സസ്കാച്ചവനിൽ നിലവിൽ സ്ഥിതിഗതികൾ അത്രത്തോളം ഗുരുതരമായിട്ടില്ല. എങ്കിലും ആശുപത്രികളിലും കെയർ ഹോമുകളിലും രോഗബാധയെത്തുടർന്നുള്ള പ്രതിസന്ധികൾ റിപ്പോർട്ട് ചെയ്തിട്ടുണ്ട്.
രോഗവ്യാപനം തടയാൻ പൊതുജനങ്ങൾ പ്രതിരോധ നടപടികൾ സ്വീകരിക്കണമെന്ന് അധികൃതർ നിർദ്ദേശിച്ചു. പവിശ്യയിലെ ജനസംഖ്യയുടെ 20 ശതമാനം മാത്രമാണ് ഇതുവരെ വാക്സിൻ സ്വീകരിച്ചിട്ടുള്ളത്. ആറ് മാസം പ്രായമുള്ള കുട്ടികൾ മുതൽ മുതിർന്നവർ വരെ കോവിഡ്, ഇൻഫ്ലുവൻസ വാക്സിനുകൾ സ്വീകരിക്കേണ്ടത് അത്യാവശ്യമാണ്. സ്കൂളുകളിലും ഡേകെയറുകളിലും കുട്ടികൾ ഇടപഴകുന്നത് വഴി രോഗം പടരാൻ എളുപ്പമാണെന്നും പല സ്കൂളുകളിലും ഹാജർനില കുറവാണെന്നും ഡോ. ടോർ ചൂണ്ടിക്കാട്ടി. ആർ.എസ്.വി പ്രതിരോധത്തിനായി നവജാതശിശുക്കൾക്ക് സൗജന്യ ആന്റിബോഡി ചികിത്സ ലഭ്യമാണെന്നും അദ്ദേഹം കൂട്ടിച്ചേർത്തു.
വാക്സിനേഷൻ എടുക്കുന്നതിനൊപ്പം ശരിയായ രീതിയിൽ ആഹാരം കഴിക്കുക, ധാരാളം വെള്ളം കുടിക്കുക, തണുപ്പിൽ നിന്ന് സംരക്ഷണം നൽകുന്ന വസ്ത്രങ്ങൾ ധരിക്കുക, ആൾക്കൂട്ടങ്ങൾ ഒഴിവാക്കുക, കൈകൾ ഇടയ്ക്കിടെ വൃത്തിയാക്കുക തുടങ്ങിയ കാര്യങ്ങളും ശ്രദ്ധിക്കണം. വാക്സിനുകൾ രോഗം പൂർണ്ണമായും തടഞ്ഞില്ലെങ്കിലും ആശുപത്രിയിൽ പ്രവേശിപ്പിക്കപ്പെടേണ്ടി വരുന്ന സാഹചര്യം ഒഴിവാക്കാനും ഗുരുതരമായ സങ്കീർണ്ണതകൾ തടയാനും സഹായിക്കുമെന്ന് ആരോഗ്യവകുപ്പ് ഓർമ്മിപ്പിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Winter illnesses on the rise in southwest Saskatchewan
