വിന്നിപെഗ്: വിന്നിപെഗിലെ നിർമ്മാണ സൈറ്റിൽ പുതിയ യൂണിയന് വേണ്ടി സംസാരിച്ചതിന് ജീവനക്കാരനെ പിരിച്ചുവിട്ട ഏകോൺ കമ്പനി തൊഴിൽ നിയമം ലംഘിച്ചതായി മാനിറ്റോബ ലേബർ ബോർഡ് കണ്ടെത്തി. പുതിയ യൂണിയനായ UBCJA (United Brotherhood of Carpenters & Joiners of America) യെ കൊണ്ടുവരാൻ ശ്രമിച്ച ജീവനക്കാരനെയാണ് CLAC (Christian Labour Association of Canada) പ്രതിനിധീകരിക്കുന്ന കമ്പനി പിരിച്ചുവിട്ടത്.
സെപ്റ്റംബർ 9-ന് പുറത്തിറങ്ങിയ ലേബർ ബോർഡ് ഉത്തരവിലാണ് കമ്പനി ‘അനീതിപരമായ തൊഴിൽ സമ്പ്രദായങ്ങൾ’ (Unfair Labour Practices) നടത്തിയതായി വ്യക്തമാക്കുന്നത്. യൂണിയൻ ‘റെയ്ഡി’ന്റെ സമയത്താണ് സംഭവം നടന്നതെന്നും, വിഷയത്തിൽ ഉൾപ്പെട്ട ജീവനക്കാർ ഇപ്പോൾ കമ്പനിയിൽ ജോലി ചെയ്യുന്നില്ലെന്നും ഏകോൺ ഗ്രൂപ്പ് പ്രസ്താവനയിലൂടെ അറിയിച്ചു.
ഷോപ്പ് സ്റ്റീവാർഡായിരുന്ന ‘ടി.വി.’ എന്ന ജീവനക്കാരൻ പുതിയ യൂണിയനെക്കുറിച്ച് സഹപ്രവർത്തകരുമായി സംസാരിക്കുന്നതിനിടെയാണ് പിരിച്ചുവിടൽ നടന്നത്. പുതിയ യൂണിയനെ പിന്തുണയ്ക്കുന്ന ജീവനക്കാരെ കമ്പനി ‘ബ്ലാക്ക്ലിസ്റ്റ്’ ചെയ്യുമെന്ന് സൈറ്റിലെ ഫോർമാൻ ഭീഷണിപ്പെടുത്തിയതായും വിധിയിൽ രേഖപ്പെടുത്തിയിട്ടുണ്ട്. ഈ പിരിച്ചുവിടലിന് ശേഷം തൊഴിലാളികൾ യൂണിയൻ വിഷയങ്ങളിൽ നിന്ന് അകന്നുനിന്നെന്നും, ഇത് UBCJA യുടെ പ്രവർത്തനങ്ങളെ തകർത്തെന്നും സാക്ഷികൾ മൊഴി നൽകി.
നിയമം ലംഘിച്ചതിന് ജീവനക്കാരനായ ‘ടി.വി.’ക്ക് 1,000 ഡോളറും UBCJA ക്ക് 1,000 ഡോളറും പിഴ നൽകാൻ ലേബർ ബോർഡ് ഏകോണിനോട് നിർദ്ദേശിച്ചു. എന്നാൽ, നിയമലംഘനം കാരണം യൂണിയന് അംഗീകാരം നൽകണമെന്ന UBCJA യുടെ ആവശ്യം ബോർഡ് അംഗീകരിച്ചില്ല. യൂണിയൻ മാറ്റത്തിനായി നടത്തിയ വോട്ടെടുപ്പിൽ വേണ്ടത്ര പിന്തുണ നേടാൻ UBCJA ക്ക് കഴിഞ്ഞില്ലെന്നും ബോർഡ് അറിയിച്ചു.
തൊഴിലുടമകൾ നിയമം ലംഘിക്കുമ്പോൾ 2,000 ഡോളർ പിഴയീടാക്കുന്നത് മതിയായ ശിക്ഷയല്ലെന്നും, ഇത്തരം നടപടികൾ തടയാൻ ഇത് പര്യാപ്തമല്ലെന്നും മാനിറ്റോബ ഫെഡറേഷൻ ഓഫ് ലേബർ പ്രസിഡന്റ് കെവിൻ റെബെക്ക് പ്രതികരിച്ചു. നിലവിലെ യൂണിയനായ CLAC തൊഴിലുടമകൾക്ക് അനുകൂലമായി പ്രവർത്തിക്കുന്നവരാണെന്ന് ലേബർ സ്റ്റഡീസ് പ്രൊഫസർ ഡേവിഡ് കാംഫീൽഡും അഭിപ്രായപ്പെട്ടു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Winnipeg Labor Board says employee fired after supporting new union violated law
