ന്യൂഡൽഹി: അമേരിക്കൻ പ്രസിഡന്റ് ഡോണൾഡ് ട്രംപ് പുതുതായി രൂപീകരിച്ച അന്താരാഷ്ട്ര സമാധാന സമിതിയായ ‘ബോർഡ് ഓഫ് പീസിൽ’ ചേരാനുള്ള ക്ഷണം ഇന്ത്യ പരിശോധിച്ചു വരികയാണെന്ന് വിദേശകാര്യ മന്ത്രാലയം. ഗാസയുടെ പുനർനിർമ്മാണത്തിനും പശ്ചിമേഷ്യയിലെ സമാധാനത്തിനും മുൻഗണന നൽകുന്ന ഈ പദ്ധതിയെ ഗൗരവത്തോടെയാണ് കാണുന്നതെന്നും എന്നാൽ അന്തിമ തീരുമാനം എടുത്തിട്ടില്ലെന്നും വിദേശകാര്യം മന്ത്രാലയ വക്താവ് രൺധീർ ജയ്സ്വാൾ വാർത്താ സമ്മേളനത്തിൽ അറിയിച്ചു. ഈ മാസം 19-ന് നടക്കാനിരിക്കുന്ന ബോർഡിന്റെ ആദ്യ യോഗത്തിൽ ഇന്ത്യ പങ്കെടുക്കുന്ന കാര്യത്തിലും വ്യക്തത വരുത്തിയിട്ടില്ല.
യുഎസ് സർക്കാരിൽ നിന്ന് ഔദ്യോഗികമായ ക്ഷണം ലഭിച്ചതായി സ്ഥിരീകരിച്ച വക്താവ്, പശ്ചിമേഷ്യയിലെ സമാധാന ശ്രമങ്ങളോടും സ്ഥിരതയോടും ഇന്ത്യ എന്നും പ്രതിജ്ഞാബദ്ധമാണെന്ന് വ്യക്തമാക്കി. ഗാസയുൾപ്പെടെയുള്ള മേഖലകളിൽ ദീർഘകാലാടിസ്ഥാനത്തിൽ സമാധാനം കൊണ്ടുവരാനുള്ള എല്ലാ സംരംഭങ്ങളെയും പ്രധാനമന്ത്രി നരേന്ദ്ര മോദി സ്വാഗതം ചെയ്തിട്ടുണ്ടെന്നും അദ്ദേഹം കൂട്ടിച്ചേർത്തു. ഐക്യരാഷ്ട്രസഭയുടെ സുരക്ഷാ സമിതി പ്രമേയം 2803-ന്റെ (UNSC Resolution 2803) അടിസ്ഥാനത്തിലാണ് ബോർഡ് ഓഫ് പീസ് രൂപീകരിച്ചിരിക്കുന്നത്.
ഇസ്രായേൽ-ഹമാസ് സംഘർഷത്തിന് ശേഷമുള്ള ഗാസയുടെ ഭരണനിർവ്വഹണം, പുനർനിർമ്മാണം, സാമ്പത്തിക വികസനം എന്നിവയ്ക്ക് മേൽനോട്ടം വഹിക്കുക എന്നതാണ് ഈ ബോർഡിന്റെ പ്രാഥമിക ലക്ഷ്യം. ഡോണൾഡ് ട്രംപ് തന്നെ അധ്യക്ഷനായി പ്രവർത്തിക്കുന്ന ഈ അന്താരാഷ്ട്ര സമിതിയിൽ നിലവിൽ ഇസ്രായേൽ, സൗദി അറേബ്യ, യുഎഇ, പാകിസ്ഥാൻ, ഈജിപ്ത്, തുർക്കി, ഇന്തോനേഷ്യ തുടങ്ങി 27-ഓളം രാജ്യങ്ങൾ അംഗങ്ങളാകാൻ സമ്മതിച്ചിട്ടുണ്ട്. എന്നാൽ ഫ്രാൻസ്, ജർമ്മനി തുടങ്ങിയ ചില യൂറോപ്യൻ രാജ്യങ്ങൾ ഈ പദ്ധതിയിൽ ചേരുന്നതിൽ ഇതുവരെ തീരുമാനം പ്രഖ്യാപിച്ചിട്ടില്ല.
അമേരിക്കൻ സ്റ്റേറ്റ് സെക്രട്ടറി മാർക്കോ റൂബിയോ, വേൾഡ് ബാങ്ക് പ്രസിഡന്റ് അജയ് ബംഗ തുടങ്ങിയ പ്രമുഖർ ഉൾപ്പെടുന്ന എക്സിക്യൂട്ടീവ് ബോർഡാണ് പദ്ധതിക്ക് നേതൃത്വം നൽകുന്നത്. സ്ഥിരം അംഗത്വത്തിനായി ഒരു ബില്യൺ ഡോളർ സംഭാവന ആവശ്യമാണെന്നും അല്ലാത്തവർക്ക് മൂന്ന് വർഷത്തെ കാലാവധിയായിരിക്കും ഉണ്ടാവുകയെന്നും റിപ്പോർട്ടുകൾ സൂചിപ്പിക്കുന്നു. അന്താരാഷ്ട്ര തലത്തിൽ ഐക്യരാഷ്ട്ര സഭയ്ക്ക് സമാന്തരമായ ഒരു സംവിധാനമായി ഇത് മാറുമെന്ന വിമർശനവും നിലനിൽക്കുന്നുണ്ട്.
ഇന്ത്യയെ സംബന്ധിച്ചിടത്തോളം പശ്ചിമേഷ്യയിലെ സുപ്രധാന താൽപ്പര്യങ്ങളും ഫലസ്തീൻ വിഷയത്തിലുള്ള പരമ്പരാഗത നിലപാടുകളും പരിഗണിച്ചായിരിക്കും അന്തിമ തീരുമാനമെന്ന് നയതന്ത്ര വിദഗ്ധർ വിലയിരുത്തുന്നു. മാനുഷിക സഹായങ്ങൾ നൽകുന്നതിൽ ഇന്ത്യ എപ്പോഴും മുൻപന്തിയിലുണ്ടെന്നും ഗാസയിലെ സാഹചര്യം മെച്ചപ്പെടുത്താനുള്ള ശ്രമങ്ങളിൽ ഇന്ത്യയുടെ പങ്കാളിത്തം നിർണ്ണായകമാണെന്നും മുൻ നയതന്ത്രജ്ഞർ ചൂണ്ടിക്കാട്ടുന്നു. വരും ദിവസങ്ങളിൽ ബോർഡ് ഓഫ് പീസുമായി ബന്ധപ്പെട്ട് ഡൽഹിയിൽ നിന്ന് കൂടുതൽ വ്യക്തതയുണ്ടാകുമെന്നാണ് പ്രതീക്ഷിക്കുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Will India join Trump’s ‘Board of Peace’? Ministry of External Affairs says it has received an invitation
