മാനിറ്റോബയുടെ വടക്കൻ മേഖലയിലെ ഗാർഡൻ ഹിൽ അനിസിനിനേവ് നേഷൻ ഗ്രാമത്തിലേക്ക് കാട്ടുതീ പടർന്നതിനെത്തുടർന്ന് ജനങ്ങളെ അടിയന്തരമായി ഒഴിപ്പിക്കാൻ ഉത്തരവിട്ടു. സ്ഥിതി അതീവ ഗുരുതരമായതിനാലാണ് ഈ നിർണായക തീരുമാനം എടുത്തതെന്ന് അധികൃതർ അറിയിച്ചു. ഗ്രാമത്തിലെ ജനപ്രതിനിധിയും ചീഫ് ഡിനോ ഫ്ലെറ്റും കൗൺസിലും ചേർന്നാണ് ഒഴിപ്പിക്കൽ പ്രഖ്യാപിച്ചത്. “നമ്മുടെ ജനങ്ങളുടെ ജീവനും സുരക്ഷയും ഉറപ്പാക്കാനാണ് ഈ അടിയന്തര നടപടി. ഇതൊരു അസാധാരണവും ദുരന്തപൂർണ്ണവുമായ സമയമാണ്,” ചീഫ് ഫ്ലെറ്റ് വ്യക്തമാക്കി.
മുതിർന്നവരുടെയും കുട്ടികളുടെയും അടിയന്തര ചികിത്സ ആവശ്യമുള്ളവരുടെയും സുരക്ഷയ്ക്കാണ് പ്രഥമ പരിഗണന നൽകുന്നതെന്നും അദ്ദേഹം കൂട്ടിച്ചേർത്തു. എല്ലാവരുടെയും ജാഗ്രതയും സഹകരണവും ഈ ഘട്ടത്തിൽ അത്യാവശ്യമാണെന്നും, ജനങ്ങൾക്കായി പ്രാർത്ഥിക്കണമെന്നും അദ്ദേഹം അഭ്യർത്ഥിച്ചു. വിന്നിപെഗിൽ നിന്ന് 475 കിലോമീറ്റർ വടക്ക്-പടിഞ്ഞാറ് സ്ഥിതി ചെയ്യുന്ന, ഏകദേശം 4,500 ആളുകൾ താമസിക്കുന്ന ഒരു വിദൂര പ്രദേശമാണ് ഗാർഡൻ ഹിൽ. അതീവ ശ്രദ്ധയോടെയും വേഗത്തിലുമാണ് ഒഴിപ്പിക്കൽ നടപടികൾ പുരോഗമിക്കുന്നത്.
സമീപ പ്രദേശങ്ങളിലും കാട്ടുതീ ഭീഷണി
ഗാർഡൻ ഹില്ലിന് പുറമെ സമീപ പ്രദേശങ്ങൾക്കും കാട്ടുതീ ഭീഷണിയുണ്ട്. വിന്നിപെഗിന് 590 കിലോമീറ്റർ വടക്ക്-പടിഞ്ഞാറ് സ്ഥിതി ചെയ്യുന്ന സ്നോ ലേക്ക് പട്ടണത്തിലും ബുധനാഴ്ച രാത്രി നിർബന്ധിത ഒഴിപ്പിക്കൽ ഉത്തരവ് പുറപ്പെടുവിച്ചു. 12 മണിക്കൂർ മുൻപുള്ള മുന്നറിയിപ്പിന് ശേഷം രാത്രി 10 മണിയോടെയാണ് ഈ വിവരം ഫേസ്ബുക്കിലൂടെ അറിയിച്ചത്. ഈ പട്ടണത്തിന് 25 കിലോമീറ്റർ ചുറ്റളവിൽ മൂന്ന് വലിയ തീപിടിത്തങ്ങൾ സജീവമാണ്.
ഒട്ടാവയുടെ നിർദേശപ്രകാരം കനേഡിയൻ സൈന്യത്തെ ഒഴിപ്പിക്കൽ പ്രവർത്തനങ്ങൾക്കായി നിയോഗിച്ചിട്ടുണ്ടെന്ന് ഫെഡറൽ എമർജൻസി മാനേജ്മെന്റ് മന്ത്രി എലീനോർ ഓൾഷെസ്കി തന്റെ എക്സ് (മുമ്പ് ട്വിറ്റർ) പോസ്റ്റിലൂടെ അറിയിച്ചു. നേരത്തെ പ്രളയക്കെടുതിയിൽ വലഞ്ഞിരുന്ന ഗാർഡൻ ഹിൽ ഫസ്റ്റ് നേഷൻ നിവാസികൾക്ക് ഈ കാട്ടുതീ ദുരന്തം കൂടുതൽ കഠിനമായ അനുഭവമാണ് നൽകുന്നത്.
