കിംഗ്സ് കൗണ്ടി: കിംഗ്സ് കൗണ്ടിയിൽ കാട്ടുതീ പടർന്നതിനെ തുടർന്ന് ഒഴിപ്പിക്കൽ ഉത്തരവ് പുറപ്പെടുവിച്ചു. ലേക്ക് ജോർജ് പ്രദേശത്താണ് തീപിടിത്തമുണ്ടായത്. നോവ സ്കോഷ്യ എമർജൻസി മാനേജ്മെന്റ് വിഭാഗമാണ് ഇതുസംബന്ധിച്ച അറിയിപ്പ് പുറത്തുവിട്ടത്. ലേക്ക് ജോർജിന്റെ തെക്ക്-വടക്ക് അതിർത്തികൾക്കിടയിൽ താമസിക്കുന്നവർ ഉടൻതന്നെ സുരക്ഷിത സ്ഥലങ്ങളിലേക്ക് മാറണമെന്ന് നിർദ്ദേശമുണ്ട്.
ഉച്ചയ്ക്ക് ശേഷം അഞ്ച് മണിയോടെ ലേക്ക് ജോർജ് മേഖലയിൽ ഒഴിപ്പിക്കൽ മുന്നറിയിപ്പ് നൽകിയിരുന്നു. വരണ്ടതും ശക്തമായ കാറ്റുള്ളതുമായ കാലാവസ്ഥയാണ് തീ വീണ്ടും പടരാൻ കാരണമായതെന്ന് നോവ സ്കോട്ടിയയുടെ പ്രകൃതിവിഭവ വകുപ്പ് അറിയിച്ചു. ഏകദേശം 80 ഹെക്ടർ സ്ഥലത്താണ് നിലവിൽ തീ പടർന്നുപിടിച്ചിരിക്കുന്നത്. രക്ഷാപ്രവർത്തനങ്ങൾക്കായി ക്യൂബെക്കിൽ നിന്ന് രണ്ട് വിമാനങ്ങൾ എത്തിച്ചേർന്നിട്ടുണ്ട്.
കൂടാതെ, ന്യൂ ബ്രൺസ്വിക്ക്, നോർത്ത് വെസ്റ്റ് ടെറിട്ടറീസ് എന്നിവിടങ്ങളിൽ നിന്നുള്ള വിമാനങ്ങളും അഗ്നിശമന സേനാംഗങ്ങളും രക്ഷാപ്രവർത്തനങ്ങളിൽ സജീവമാണ്. ലേക്ക് ജോർജ് പ്രദേശത്തുനിന്നും മാറുന്നവർക്കായി ന്യൂ മിനാസിലെ ലൂയിസ് മില്ലെറ്റ് സെന്ററിൽ ഒരു എമർജൻസി റിസപ്ഷൻ സെന്റർ തുറന്നിട്ടുണ്ട്. വളർത്തുമൃഗങ്ങൾ, പ്രധാനപ്പെട്ട രേഖകൾ, മരുന്ന്, ഭക്ഷണം, മറ്റ് അത്യാവശ്യ സാധനങ്ങൾ എന്നിവ കൈവശം കരുതണമെന്ന് നിർദ്ദേശമുണ്ട്.
തീപിടിത്തത്തെ തുടർന്ന് കിംഗ്സ് കൗണ്ടിയിൽ വായു ഗുണനിലവാര മുന്നറിയിപ്പും നൽകിയിട്ടുണ്ട്. പുക കാരണം പ്രദേശത്തും സമീപപ്രദേശങ്ങളിലും വായു മലിനീകരണം ഉണ്ടാകാൻ സാധ്യതയുണ്ടെന്ന് മുന്നറിയിപ്പിൽ പറയുന്നു. 65 വയസ്സിന് മുകളിലുള്ളവർ, ഗർഭിണികൾ, കുട്ടികൾ, വിട്ടുമാറാത്ത രോഗങ്ങളുള്ളവർ, തുറന്ന സ്ഥലങ്ങളിൽ ജോലി ചെയ്യുന്നവർ എന്നിവർ കൂടുതൽ ശ്രദ്ധിക്കണമെന്നും അധികൃതർ അറിയിച്ചു.
പുക കൂടുതലുള്ളപ്പോൾ പുറത്ത് പോകുന്നത് ഒഴിവാക്കാനും, വാതിലുകളും ജനലുകളും അടച്ചിടാനും നിർദ്ദേശമുണ്ട്. അത്യാവശ്യ ഘട്ടങ്ങളിൽ പുറത്തുപോകേണ്ടി വന്നാൽ, നന്നായി നിർമ്മിച്ച N95 മാസ്ക് പോലുള്ള റെസ്പിറേറ്റർ മാസ്കുകൾ ഉപയോഗിക്കുന്നത് പുക ശ്വസിക്കുന്നത് തടയാൻ സഹായിക്കുമെന്നും മുന്നറിയിപ്പിൽ വ്യക്തമാക്കുന്നു.
Wildfires rage in Kings County; authorities order complete evacuation of area!
🍁 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
